Macarıstan, Rusiya və Finlandiya vətəndaşları yenidən Bakıya gəlmək istəyirlər
2017-ci il Formula 1 Azərbaycan Qran Prisinin biletləri bu gündən onlayn qaydada satışa çıxarılıb. Trend-in məlumatın görə, bunu Bakı Şəhər Halqasının Marketinq və kommunikasiya şöbəsinin rəhbəri Nigar Arpadarai mətbuat konfransında deyib.
Onun sözlərinə görə, ilk 2 ay müddətində bilet alan Formula 1 azarkeşləri üçün qiymətlərdə 30 faizədək endirim olacaq.
N.Arpadarai bildirib ki, Beynəlxalq Avtomobil Federasiyanın elan etdiyi 2017-ci il Formula 1 dünya çempionatının təqviminə görə Azərbaycan paytaxtı Bakı şəhərinin mərkəzi küçələrində baş tutacaq sayca 2-ci Formula 1 yarışı gələn il 23-25 iyunda keçiriləcək. Nəzərdə tutulan tarixin bir həftə sonraya keçirilməsində məqsəd ötən Qran Prinin 24 saat davam edən "Le Man" yarışı ilə üst-üstə düşməsinin qarşısını almaqdır.
Bakı Şəhər Halqasının Kommersiya şöbəsinin rəhbəri Bülent Özerdim deyib ki, 4 günlük endirimli biletlərin qiyməti 150-550 manat arasında dəyişir.
B.Özerdim bildirib ki, yarış üçün ayaqüstü biletlər də satılır. Yarış trekin çeşidli yerlərində, ayaqüstü zona və platformalarda izləmək istəyənlərə satılan bu bir günlük biletlər həftənin 5, 6 və 7-ci günləri üçün olacaq. Bu yerlərin qiymətləri 60-150 manat arasında dəyişir. Ən ucuz qiymət 5-ci gün, ən bahalı qiymətlər isə bazar günü üçün olan biletlərdə olacaq.
O əlavə edib ki, endirim üçün təyin olunmuş müddət bitdikdən sonra hazırkı qədər böyük endirim olmayacaq: "Dolların məzənnəsinin dəyişməsindən asılı olmayaraq, Azərbaycan vətəndaşları üçün qiymətlər dəyişməyəcək. Ancaq xarici ölkələrin vətəndaşları üçün dolların məzənnəsinə uyğun olaraq qiymət dəyişə bilər. Xarici valyuta ilə bilet alanlar üçün biletlərin qiymətləri həmin günün məzənnəsinə görə hesablanacaq".
B.Özərdim deyib ki, Bakı Şəhər Halqası Əməliyyat Şirkəti "Nielsen Sport" vasitəsilə azarkeşlərin Formula 1-in ən yeni treki ilə bağlı yarışdan əvvəl və sonrakı düşüncələri ilə bağlı sorğu keçirib. B.Özərdim deyib ki, 16 ölkədə keçirilən sorğuda beynəlxalq auditoriyanın 2016 Avropa Qran Prisi haqqında məlumatlılığı, tanışlığı və marağı öyrənilib: "Ölkələrin hamısından, xüsusilə Braziliya, İspaniya və Finlandiyadan olan iştirakçılar Bakının Formula 1 təqviminə əlavə olunmasını böyük məmnuniyyətlə qarşılayıblar. Bu ölkələrin əksəriyyətindən, xüsusilə Macarıstan, Rusiya və Finlandiyadan olan sorğu iştirakçıları 2017-ci ildə keçiriləcək növbəti Formula 1 yarışını yerində canlı izləmək üçün Bakıya gəlmək istədiklərini bildiriblər".
B.Özərdim deyib ki, bundan başqa, Bakıda ilk dəfə keçirilmiş Formula 1 yarışı ABŞ, Macarıstan və İspaniya vətəndaşları arasında məlumatlılığı xeyli dərəcədə artırıb və Bakı haqqında məlumatı olanların sayı çoxalıb: " Xüsusən də Almaniya, İspaniya və Fransada iştirakçılar arasında Formula 1-in yarış obyektlərindən Bakı treki haqqında məlumatlılıq səviyyəsi yüksək dərəcədə artıb".
Nigar Arpadarai isə bildirib ki, gələn il keçiriləcək Formula 1 yarışları üçün infrastruktur işləri daha az miqyaslı olacaq. Onun sözlərinə görə, bu ilki Formula 1 yarışının keçirilməsi üçün keçən ilki xərclər iki yerə bölünürdü: " Ötən ilki xərclərimiz iki istiqamət üzrə idi. İnfrastruktur üçün müəyyən tikinti işləri aparılırdı, beton tribunalar, lövhələr quraşdırılırdı, asfalt qatı yenidən salınmışdı".
N.Arpadai deyib ki, bu il bütün bu infrastruktur işləri daha az olacaq: "Asfalt qatı salınmayacaq, Niyazi küçəsində qəmbər daşları ilə örtülən hissə asfalt qatla örtüləcək. Digər infrastruktur işlərimiz isə daha az miqyaslı olacaq. Çünki lazım olan bütün avadanlıqlar var. Həmin avadanlıqlar, tribunalar, baryerlər, təhlükəsizlik qurğuları yarışdan öncə gətirilib quraşdırılacaq".
N.Arpadai deyib ki, bu il marketinqə xərclər ayrılacaq, məsələn konsertlər təşkil olunacaq: "Çünki əsas məqsədimiz Bakıya daha çox insanı cəlb etməkdir. Biz buraya daha çox əyləncə sevən insanları cəlb etmək istəyirik. Ona görə daha maraqlı əyləncə proqramımız olacaq, dünya ulduzları iştirak edəcək. Buna görə əminəm ki, yarışa daha çox insan gələcək".
