Gənclər və İdman Nazirliyi, o cümlədən Təhsil Nazirliyinin birgə dəstəyi ilə Azərbaycan Qocyu-Ryu Karate-Do və Kabudo Növləri Federasiyası Beynəlxalq Juqo Kobute və Kempo-Ryu Federesiyasının "Azərbaycan Qarabağ" devizi altında Beynəlxalq Seminarı keçirildi. Seminarı Beynəlxalq Kempo-Karate və Kabudo Federasiyasının vitse-prezidenti, əməkdar məşqçi, fəxri bədən tərbiyəsi və idman işçisi, VIII-Dan kəmər sahibi Tarverdi Allahverdiyev açdı. O çıxışında seminarın məqsədini açıqladı:
- Biz hər il müxtəlif devizlər altında seminar təşkil edirik. Bu seminarı keçirməkdə məqsədimiz odur ki, bizim gənclərimiz, yeniyetmələrimiz bilavasitə idmana - yəni sağlam yola, sağlam ruha, sağlam fikrə yönəlsinlər. Onlar asudə vaxtlarını məhz idmanla məşğul olaraq keçirsinlər. Bu həm onların özlərinə, həm də vətənimizin, dövlətimizin dünyada tanınmasına xidmət edən bir amaldır.
Bu il isə seminarın adını bu deviz altında keçirməyimiz heç də təsadüfi deyil. Bildiyimiz kimi, bu il aprel ayında igidlərimiz torpaqlarımızın müəyyən bir qismini geri qaytardı. Bu o deməkdir ki, gənclərimiz cənab Ali Baş Komandanın əmri ilə bütün torpaqlarımızı düşməndən azad etmək gücünə malikdir.
Bir növ, hesabat xarakteri daşıyan seminarda respublikamızın tanınmış idman ustaları, o cümlədən, idmana həvəsi olan gənclər və yeniyetmələr də iştirak edirdi. Tədbirə bölgələrimizdən də idmançılar qatıldı. Onlardan cəbhə bölgəsi olan Füzuli rayon idmançıları, o cümlədən baş məşqçi İsrail Əsgərov, Masallı rayon idmançıları, baş məşqçi Sabir Lətifov, Şirvan şəhərindən Əliqulu Abbasov və yetirmələri, Hacıqabuldan Elnur Şəfiyev, Qobustan rayonundan İbad Rzazadə, Bakının Yasamal Rayon Olimpiya Kompleksindən qocaman idman ustası Aydın Dadaşov və yetirmələri, Xətai rayon "Ruslan" idman mərkəzindən Fariz Mirzəyev və yetirmələri, Qaradağ rayonundan Samir Məstiyev, Fərid Tağıyev, hərbçi-idmançı Günay Əliyeva, Müşfiq Həzili, Fərid Əzizov və digər idmançıların nümunəvi çıxışları tamaşaçılar tərəfindən alqışlarla və çox böyük maraqla qarşılandı.
Möhtəşəm tədbirin sonunda nümunəvi çıxışları ilə seçilən tələbə və müəllim heyəti, o cümlədən tədbirdə iştirak edən media nümayəndələri müxtəlif hədiyyələr, diplom və sertifikatlarla təltif olundu. Sonda xatirə şəkilləri çəkildi.
Yeri gəlmişkən, onu da qeyd edək ki, yığmamız dekabr ayının 2-də Xarkov şəhərində keçiriləcək dünya çempionatına qatılacaq. İdmançılarımıza uğurlar diləyirik.
Xəbər xidməti
