MSK sədri seçkilərin şəffaf keçirilməsinə hər hansı əngəl olmayacağına tam zəmanət verdi
Şəffaflıq seçkilərdə ən əsas amildir və hesab edirəm ki, aşkarlıq baxımından seçki məntəqələrində kifayət qədər missiya yerinə yetirən insanlar olacaq. “Trend”-in məlumatına görə, bunu Mərkəzi Seçki Komissiyasının sədri Məzahir Pənahov dünən keçirilən mətbuat konfransında deyib.
M.Pəhanov bildirib ki, seçki məntəqələrində müşahidəçilər üçün xüsusi rahatlıq yaratmağa çalışılıb: “Bütün seçki dairələri və seçki məntəqələri müasir və yaxşı şəraiti olan binalarda yerləşib. Çalışmışıq elə şərait yaradaq ki, müşahidəçilərin öz funksiyalarını yerinə yetirmək üçün heç bir əngəl olmasın”.
MSK sədri bildirib ki, seçkilərdə cavabhedliyi olan qurumlarla maarifləndirmə işi aparılıb: “Misal üçün cəzaçəkmə müsəssisələrində olan insanlar da səs verəcək. Bunun üçün Ədliyyə Nazirliyinin Penitensiar Xidməti ilə birgə tədbir keçirib, o cümlədən Səhiyyə Nazirliyi və digər qurumlarla tədbirlər təşkil edilib.
Seçkilər günü təhlükəsizlik ən mühüm məsələlərdən biridir və təhlükəsizliyi təmin etmək üçün polis orqanlarının məsuliyyəti var. Ona görə də Mərkəzi Seçki Komissiyası Daxili İşlər Nazirliyi ilə birgə tədbir keçirib”.
M.Pənahov vurğulayıb ki, aşağı seçki komissiyalarının üzvləri, kompüter mütəxəssisləri üçün seminarlar təşkil edilib, müşahidəçilər, KİV-lər və digər iştirakçılar üçün yaddaş kitabçaları hazırlanıb paylanılıb. MSK sədri əlavə edib ki, əlil insanların da səs verməsi üçün lazımi addımlar atılıb: “Bu baxımdan hesab edirəm ki, seçkilərin şəffaf keçirilməsi üçün hər hansı bir əngəl qalmayıb”.
"Azərbaycanda keçirilən prezident seçkilərini 51 xarici KİV-dən 118 təmsilçi işıqlandıracaq". Məlumatı Mərkəzi Seçki Komissiyasının (MSK) sədri Məzahir Pənahov səsləndirib.
MSK sədri deyib ki, xarici KİV təmsilçilərinin fəaliyyətinə yerli KİV təmsilələri kimi hərtərəfli şərait yaradılacaq.
M.Pənahov qeyd edib ki, həm Azərbaycanın daxilində, həm də xaricində bütün seçicilərin səs verməsi üçün lazımi şərait yaradılıb.
MSK sədri bildirib ki, müşahidəçilərin çeşidi kifayət qədər genişdir və müşahidə aparmaqla bağlı heç bir müraciətə yox cavabı verilməyib: “Biz müşahidə aparmaq üçün bütün müraciətlərə müsbət cavab vermişik və bu da çox yaxşı haldır”.
Onun sözlərinə görə, "125 seçki dairəsi, 5641 seçki məntəqəsi seçkilərə hazırdır. Bu seçki məntəqələrindən 41-i ölkə xaricində yaradılıb". MSK sədri deyib ki, seçkilərlə bağlı müşahidə aparmaq istəyən heç bir şəxsə nə hər hansı Seçki Dairəsində, MSK-da mənfi cavab verilməyib.
Aprelin 11-nə təyin edilmiş prezident seçkiləri ilə əlaqədar Mərkəzi Seçki Komissiyası (MSK) və dairə seçki komissiyaları tərəfindən akkreditə olunmuş müşahidəçilərin sayı açıqlanıb.
MSK-nın Media və ictimai əlaqələr şöbəsindən APA-ya verilən məlumata görə, prezident seçkiləri ilə əlaqədar 894 beynəlxalq müşahidəçi akkreditə olunub.
Akkreditə olunmuş yerli müşahidəçilərin sayı isə 58 min 175 nəfərdir.
Türkdilli Ölkələrin Parlament Assambleyasının (TÜRKPA) Beynəlxalq Müşahidəçilər Missiyasının üzvləri 11 aprel Azərbaycanda keçiriləcək erkən prezident seçkilərini müşahidə etmək məqsədilə Bakıya gəlib. TÜRKPA-dan Trend-ə verilən məlumata görə, missiyanın tərkibinə Qazaxıstan Parlamenti Məclisinin üzvü Berik Ospanov, Qırğızıstan Joqorku Keneşinin üzvləri Duişon Torokulov və Salaidin Aydarov, Türkiyə Böyük Millət Məclisinin üzvləri Haluk İpek və Ceyhun İrgil daxildir.
TÜRKPA müşahidəçilərinin Milli Məclisin sədri Oqtay Əsədov, Xarixi İşlər nazirinin müavini Mahmud Məmməd-Quliyev və Mərkəzi Seçki Komissiyasının sədri Məzahir Pənahovla görüşləri nəzərdə tutulub.
Seçki günü Müşahidə Missiyası seçki prosesini izləmək məqsədilə Bakı, Sumqayıt və Abşeron rayonun bir sıra seçki məntəqələrini ziyarət edəcək.
11 aprel tarixində, axşam radələrində TÜRKPA parlamentarilərinin müşahidə fəaliyyəti ilə bağlı ilkin nəticələrinin təqdimatı gözlənir. Növbəti gün isə TÜRKPA və Türk Şurası müşahidə missiyaları seçkilərin nəticələrinə dair birgə bəyanat təqdim edəcək.
MSK sədri bildirib ki, adının seçici siyahısında olub-olmamasından asılı olmayaraq, səsvermə hüququ olan bütün insanlar birbaşa seçki məntəqəsinə yaxınlaşaraq öz sənədini təqdim etməklə səs verə bilər. O qeyd edib ki, müəyyən qisim insanların hansısa səbəbdən seçici siyahısına düşməməsi və ya bu siyahıya düşməkdən yayınması ola bilər. Buna baxmayaraq, onlar da öz sənədlərini təqdim etməklə səs verə bilər.
M.Pənahov bildirib ki, bəzi ölkələrdə seçici siyahısında adı olmayan insanların səsvermə hüququ olmur, lakin Azərbaycanda belə deyil: "Vətəndaş adının seçici siyahısında olub-olmamasından asılı olmayaraq, birbaşa seçki məntəqəsinə yaxınlaşıb səs verə bilər".
MSK sədri əlavə edib ki, seçkilərlə bağlı bütün müraciət və şikayətlərə dərhal cavab veriləcək.
