Bu gün Dövlət Filarmoniyasında aprel ayında ölkədə keçiriləcək prezident seçkilərində Yeni Azərbaycan Partiyasının sədri İlham Əliyevin namizədliyinin Azərbaycanın yaradıcı ziyalıları tərəfindən dəstəklənməsi ilə bağlı yığıncaq keçirilib.
Trend-in məlumatına görə, tədbirdə çıxış edən Azərbaycan Yazıçılar Birliyinin sədri, yazıçı Anar, Azərbaycan Bəstəkarlar İttifaqının sədri Firəngiz Əlizadə və digər şəxslər ölkə Prezidentinin Azərbaycanın inkişafında gördüyü işlərdən danışıblar. Bildirilib ki, dövlət başçısının rəhbərliyi dövründə Azərbaycan incəsənəti, mədəniyyəti yüksək inkişaf edib, yaradıcı adamlara lazımi qiymət verilib. Dövlət başçısının Azərbaycan mədəniyyətinə verdiyi töhfə nəticəsində yaradıcılıq sahəsində bir çox uğurlar əldə olunub.
Azərbaycan Rəssamlar İttifaqının sədri Fərhad Xəlilov bildirib ki, Prezident İlham Əliyevin rəhbərliyi ilə Azərbaycan yaradıcılıq, idman və incəsənət mərkəzinə çevrilib: "Azərbaycanda əmin-amanlıq, sabitlik hökm sürür. Ölkədə bütün sahələrdə, o cümlədən, mədəniyyət və incəsənət sahəsində inkişaf davam edir. Bu inkişaf İlham Əliyevin yürütdüyü siyasətin nəticəsidir".
Azərbaycan Teatr Xadimləri İttifaqının sədri Azərpaşa Nemətov bildirib ki, Prezident İlham Əliyevin səyləri nəticəsində Azərbaycan iqtisadiyyatı, mədəniyyəti, ordusu inkişaf edib: "Azərbaycanda teatr binalarının təmir edilməsi, "Teatr haqqında" qanunun qəbulu da incəsənətin inkişafından xəbər verir".
“Prezident İlham Əliyev Azərbaycanda yaradıcılığın inkişafına böyük dəstək verir”. Bunu isə Azərbaycan Yazıçılar Birliyinin sədri Anar deyib. O qeyd edib ki, İlham Əliyev prezidentliyi dövründə ölkədə sənətə, ədəbiyyata böyük önəm verib: "Heç bir ölkədə sənətə, yaradıcılığa bu cür diqqət və qayğı yoxdur. Azərbaycan Prezidenti daim yaradıcı insanları diqqətdə saxlayıb, onların problemlərinin həllinə çalışıb. Ona görə də bu gün yaradıcı insanlar Prezident İlham Əliyevin növbəti seçkilərdə namizədliyini dəstəkləyir və qalib gələcəyinə əmindir. Biz yaradıcı adamlar cənab Prezident İlham Əliyevə səs verəcəyik və buna borcluyuq".
Tədbirin sonunda yaradıcı ittifaqların bəyanatı qəbul edilib. Bəyanatda bildirilib ki, yığıncaq iştirakçıları aprelin 11-də keçiriləcək prezident seçkilərində Prezident İlham Əliyevin namizədliyini dəstəkləyir və ona yekdilliklə səs cerəcəklər.
Bəyanat ittifaq sədrləri tərəfindən imzalanıb.
