“İndiyə qədər 63 əfv və 11 amnistiya qərarı qəbul edilib. Növbəti amnistiya üçün biz öz təkliflərimizi hazırlaya bilərik. Hesab edirəm ki, bir neçə məsələ üzrə budəfəki akt fərqlənməli, amnistiyanın əhatə dairəsi geniş olmalıdır".
APA-nın məlumatına görə, bunu deputat, YAP icra katibinin müavini Siyavuş Novruzov Milli Məclisin iclasında Heydər Əliyevin 95 illiyi ilə bağlı Amnistiya aktının qəbul olunmasına dair təklifini səsləndirərkən deyib.
Deputat təklif edib ki, bu Amnistiya aktı, ilk növbədə, ölkəmizin ərazi bütövlüyü uğrunda gedən döyüşlərdə iştirak edənlərə şamil olunsun: "İkincisi, amnistiya yaşı 60-dan yuxarı olan qadınlara şamil oluna bilər. Həmçinin himayəsində azyaşlı uşaqları olanlar da bu aktdan bəhrələnə bilər. Amnistiya yaşı 70-dən yuxarı olan bütün kişilərə də şamil edilsin. Radikal dini cərəyanlara qoşulmayan dindar şəxslər də bu aktdan bəhrələnsinlər. Müxtəlif müxalif radikal qurumların və ayrı-ayrı reputasiyalı beynəlxalq təşkilatların təsirinə düşüb bilmədən cinayət törədən gənclər var ki, onlara da şamil oluna bilər. Hesab edirəm ki, bunları nəzərə almalıyıq”.
Cumhuriyyətin 100 illiyi ilə bağlı medal...
Tahir Kərimli Milli Məclisdə təklif edib ki, Azərbaycan Xalq Cumhuriyyətinin 100 illiyi və ya Azərbaycan Parlamentinin 100 illiyi münasibətilə medal təsis olunsun.
T.Kərimlinin sözlərinə görə, bu addım Cumhuriyyət qurucularına ehtiram kimi də qiymətləndirilə bilər.
Əflatun Amaşov Mətbuat Şurasının hüquqi statusuna yenidən baxılmasının zəruri olduğunu əsaslandırdı...
“Bu gün reketçiliklə məşğul olan media vasitələri az deyil. Onlar bu yolla qazanc vasitələrini sadələşdirir”. Bunu Milli Məclisin deputatı, Mətbuat Şurasının sədri Əflatun Amaşov parlamentin iclasında deyib.
Ə.Amaşov bildirib ki, reket jurnalistlər kimlərdənsə dəstək alır: “Onların məqsədi məmurlara, iş adamlarına böhtan atmaq, bunun müqabilində də pul qazanmaqdan ibarətdir. Lakin Mətbuat Şurasının hüquqi statusuna yenidən baxılması zəruridir. Bununla medianı daha yaxşı balanslaşdırmaq mümkün olar”.
O əlavə edib ki, belə olarsa, medianın adından sui-istifadə halları azalar: “Medianın özü də bundan maraqlıdır. Bunun həlli Mətbuat Şurasının fəaliyyətində təkmilləşdirmə işindən keçir. Ona görə də Mətbuat Şurası ilə bağlı qanun layihəsinin qəbul edilməsinə, onun statusunun dəyişdirilməsinə ehtiyac var”.
Rövşən Rzayev ümummilli əhəmiyyətli məsələ qaldırdı...
Düputat Rövşən Rzayev deyib ki, Ermənistanın Azərbaycan torpaqlarını işğal etməsi ilə bağlı qanun layihəsi hazırlanmalıdır.
R.Rzayev ermənilərin Strasburqda AŞ PA-nın qış sessiyası çərçivəsində Dağlıq Qarabağın işğalının 30 illiyini “Demokratik Dağlıq Qarabağ hərəkatı” adı ilə təqdim etdiyini diqqətə çatdırıb. Millət vəkili bunu Azərbaycana qarşı ikili standartlar kimi qiymətləndirib. O təklif edib ki, bu məsələ ilə bağlı ATƏT-in Minsk Qrupunun üzvü olan ölkələrə ayrı-ayrılıqda müraciət edilsin.
Qanunsuz evlər tikib oğul-qız evləndiriblər...
Elmira Axundova Bakıda qanunsuz tikililərlə əlaqədar məsələnin həlli üçün tədbirlər görməyə çağırıb. O qeyd edib ki, illər öncə ölkənin müxtəlif regionlarında, xüsusulə də Abşeron rayonunda qeydiyyatda kənd təsərrüfatı sahələri kimi göstərilən ərazilərdə fərdi evlər inşa edilib və illərdir ki, insanlar həmin ərazilərdə yaşayır, hətta oğul evləndirib, qız köçürüblər: “Lakin bu ərazilərin qeydiyyatda kənd təsərrüfatı torpaqlarına aid olunması onların vəziyyətinin çətinləşdirilməsinə səbəb olur".
Deputata görə, sözügedən ərazilərdə yaşayan insanların kommunal xidmətlərdən istifadə edib haqq ödədiyini nəzərə alsaq, onların qeydiyyata düşməməsi problemlərə səbəb olur: “Bu ərazilərlə bağlı kompleks yanaşma olmadığından, sözügedən ərazilərdə yaşayan insanlar nə qeydiyyata düşə, nə də çıxarış ala bilir”.
Problemin həlli ilə bağlı iki variantın olduğunu deyən deputat bildirib ki, ya tikililər sökülüb kənd təsərrüfatı torpaqları kimi istifadə edilməli, ya da həmin ərazilər yaşayış yeri kimi qeydiyyata salınmalıdır: “İlk varianta üstünlük verilsə, insanların sosial vəziyyətində problemlər yarana blər. Lakin ikinci variantda vətəndaşlar mülkiyyət hüququnu əldə etməklə öz evlərində qeydiyyata düşə bilərlər. Belə olan halda, qeydiyyata alınan tikililər vergiyə cəlb olunacaq və nəticə etibarilə büdcəyə pul gələcək. Bu problemin həlli minlərə ailənin sevincinə səbəb olacaq”.
Restoran sahiblərinin toylarda balıq kababı maxinasiyası Milli Məclisdə açıldı...
Qüdrət Həsənquliyev deyib ki, "Şadlıq saraylarında bir salonda səkkiz səsucaldıcı vasitədən istifadə olunur. Buna dözmək olmur".
O bildirib ki, o vaxt "Azadlıq" meydanındakı mitinqlərdə iki səsucaldıcı qoyulurdu: “Səs Şıxov çimərliyinə qədər gedib çıxırdı. Restoranlara nəzarət edən yoxdur. Səslərə fiziki cəhətdən insan orqanizmi tab gətirə bilmir və qonaqlar tez salonu tərk edirlər”.
Deputat əlavə edib ki, restoranlarda keçirilən toylarda bahalı yeməkləri süfrəyə gətirməyi sona saxlayırlar: “Bununla da restoran sahibləri öz vəsaitlərinə qənaət edirlər. Toya əgər 400 nəfər adam dəvət olunubsa, 35 manatlıq balıq kababının pulu qonaqların hamısından alınsa da, sonda həmin kabablar 200 nəfərə verilir. Həmçinin restoranlarda kondisionerləri söndürmürlər. Bu da insan səhhətinə ziyandır".
Spiker Oqtay Əsədov çıxışa reaksiya verərək bildirib ki, şadlıq saraylarında səs məsələsi bir neçə dəfə qaldırılıb: “İndi ölkədə çoxlu bahalı şadlıq sarayları var. Ancaq yalnız bəziləri akustik normalara uyğun şəkildə dizayn edilib. O yemək məsələsini isə bilmirəm. Hər halda, bu məsələyə diqqət yetirmək lazımdır”.
Zahid Orucun təklifi keçməsə də, maraqlıdır...
Deputat Zahid Oruc Bakıda tikinti işlərinin aparılması ilə bağlı yeni qanun layihəsinin qəbulunu təklif edib.
Zahid Oruc parlamentin iclasında bildirib ki, Bakıda bir çox istismar müddətini başa vurmuş binalar var: “Bu binaların yerində yeni binalar tikmək istəyən iş adamları var, ancaq kim necə gəldi, gözəyarı qiymət qoyur və narazılıqlar yaranır. Hesab edirəm ki, bu məsələ ilə bağlı qanun qəbul edilməli və qanunla tənzimlənməlidir”.
Milli Məclisin sədri Oqtay Əsədov isə bildirib ki, bu məsələ ilə müvafiq icra orqanları məşğul olmalıdır və hər məsələni Milli Məclisin üzərinə atmaq düzgün olmaz.
Baki-xeber.com
