Əflatun Amaşov: “Doğrudan da 23 yaş bir insan üçün azdır, ancaq bir qəhrəman üçün yetərli yaşdır” Nəzakət Məmmədova: “Hər gördüyümüz iş bir təsəlli olmaqla yanaşı, həm də Vətənimiz üçün canından keçənlərə qoyulan bir abidədir”
Azərbaycan Respublikasının ərazi bütövlüyü uğrunda canından keçən qəhrəman Vətən oğulları unudulmur. Şəhidlik ən uca zirvədir. Bu zirvəyə ucalan, orada özünə əbədi məskən salan qeyrətli, cəsur oğul və qızlarımızın xatirəsi hər birimiz üçün əzizdir.
Cəsur, qorxmaz, şücaətli oğullarımızdan biri də 2013-cü il oktyabrın 26-da Tərtərin Qapanlı kəndi ərazisində şəhid olan gizir Aydın Əmirsoltan oğlu Abdullayevdir.
Yanvarın 16-da Beynəlxalq Mətbuat Mərkəzində Mədəniyyət və Turizm Nazirliyi, “Xatirə kitabı” redaksiyası ilə “Bakı-Xəbər” qəzetinin birgə layihəsi əsasında “Şəhidlər ölməz, Vətən bölünməz” seriyasından olan, şəhid gizir Aydın Abdullayevin qısa və mənalı ömür yoluna həsr edilən “Gözlə, gələcəyəm” kitabının təqdimat mərasimi keçirildi. Qeyd edək ki, “Gözlə, gələcəyəm” bu seriyadan olan ilk nəşrdir. “Gözlə, gələcəyəm” sənədli povestinin müəllifi jurnalist-publisist İradə Sarıyevadır.
Respublikanın tanınmış simalarının, yazıçı və şairlərinin, ictimai xadimlərinin, müharibə veteranlarının iştirakı ilə keçirilən tədbirin aparıcısı, Azərbaycan Mətbuat Şurasının sədri, millət vəkili Əflatun Amaşov “Gözələ, gələcəyəm” kitabının təqdimatına toplaşan iştirakçılara kitab haqqında məlumat verdi. O qeyd etdi ki, kitabın layihə rəhbəri respublikanın “Xatirə kitabı” redaksiyasının baş redaktoru Nəzakət Məmmədovadır. Ə.Amaşov nəşrin rəyçisinin “Bakı-Xəbər” qəzetinin baş redaktoru, Azərbaycan Mətbuat Şurasının İdarə Heyətinin üzvü Aydın Quliyev, redaktorunun isə Zülfüqar Şahsevənli olduğunu bildirdi. Kitabın müəllifi İradə Sarıyeva haqqında da qonaqlara məlumat verən Ə.Amaşov bildirdi ki, müəllif uzun illərdir mətbuatdadır və saysız yazıların müəllifidir: “Bu kitab sənədli povestdir. Layihə çərçivəsində bundan sonra nəşr ediləcək kitablar da sənədli povest janrında olacaq. Gələcək kitabları da ölkənin tanınmış yazıçıları, jurnalistləri hazırlayacaq və respublika “Xatirə kitabı” redaksiyası həmin kitabları maliyyələşdirəcək. “Gözlə, gələcəyəm” kitabı Azərbaycan xalqının qəhrəman oğlu Aydın Abdullayevin həyatına, qəhrəmanlığına, şəhidin 23 illik həyatına həsr olunub. Doğrudan da 23 yaş bir insan üçün azdır, ancaq bir qəhrəman üçün yetərli yaşdır. Aydın Şabran rayonunda dünyaya göz açıb, sonra valideynləri ilə Bakıya köçüb. Suraxanı rayonu Yeni Günəşli qəsəbəsində 278 saylı məktəbin məzunu olub. O, ailədə də, məktəbdə də fərqlənib, evin sonbeşiyi olduğu üçün bir qədər ərköyün olub. Sinif yoldaşları həmişə Aydını özlərindən bir addım irəlidə görüblər. Aydın fiziki cəhətdən güclü olub, idmanla məşğul olub. Aydın əsl qəhrəman olub. O, kəşfiyyatçı idi, gələcəkdə arxivlərdən onun haqqında başqa məlumatlar əldə ediləcək”.
Ə.Amaşov qeyd etdi ki, Aydının yaşadığı binanın önünə onun xatirə löhvəsi vurulub. Onun sözlərinə görə, Aydının xatirəsinin əbədiləşdirilməsi istiqamətində işlər görüləcək, bununla bağlı əlaqədar qurumlara müraciət ediləcək. “Onun vaxtilə yaşadığı binanın qarşısında Aydının xatirə löhvəsi var. Lakin bu, fərdi şəxs tərəfindən həyata keçirilib. Bizim də qarşımıza qoyduğumuz əsas məqsəd rəsmi olaraq onun xatirəsinin əbədiləşdirilməsi olacaq. Bu tədbirdən sonra biz müvafiq qurumlara müraciət edib Aydının xatirəsinin əbədiləşdirilməsi üçün məqsədimizə nail olacağıq”.
Ə.Amaşov bildirdi ki, kitabda sənədli povestlə bərabər Aydının ailə albomu, həyatının ayrı-ayrı məqamlarını əks etdirən fotolar, onun xatirəsinə həsr edilən şeirlər də əks olunub. Kitabın böyük bir kollektivin əməyi olduğunu vurğulayan Ə.Amaşov bildirdi ki, “Gözlə, gələcəyəm” böyük bir zəhmətin bəhrəsidir.
Sonra Ə.Amaşov sözü Dövlət Təhlükəsizliyi Xidmətinin əməkdaşı Eldar Səmədova verdi. Kitabın əhəmiyyətini qeyd edən E.Səmədov bildirdi ki, bu kitab Azərbaycan gəncliyi üçün stolüstü kitab olacaq: “Kitabla tanış olarkən gördüm ki, orada olan yazılar xüsusən gənc nəsil üçün böyük örnəkdir. Çünki bu kitabda bir qəhrəmanın doğuluş, yaşam prosesi və şəhidlik zirvəsinə ucalması öz tarixi-xronoloji ardıcıllığı ilə təqdim edilib. Qəhrəman necə necə yaşayır, necə şəhidlik zirvəsinə ucalır, bunu öyrənmək üçün gənclərimiz bu kitabı dərindən oxumalıdırlar. Bildiyiniz kimi, bu gün Azərbaycanda çox güclü ordu quruculuğu prosesi gedir. Bu prosesdə Aydın kimi gənclərin ön cəbhədə olması bizim üçün qürurvericidir. Düzdür, biz bu illərdə özümüzün 20 mindən artıq vətəndaşımızı itirdik. Ancaq onların hər biri qəlbimizdə heykəl ucaltdı. Mən şəhidlərimizin xatirəsinin əbədiləşməsində, kitablaşmasında rolu olan “Xatirə kitabı” redaksiyasının baş redaktoru Nəzakət xanıma öz təşəkkürümü bildirirəm”.
Kitabın redaktoru Zülfüqar Şahsevənli də çıxışında kitab haqqında danışarkən vurğuladı ki, kitab gənc nəsil üçün çox böyük əhəmiyyətə malikdir. O vurğuladı ki, indiyə qədər Vətən oğulları haqqında saysız yazı yazıb, bir sıra kitabların redaktoru olub. Z.Şahsevənli qeyd etdi ki, bütün şəhid valideynləri bir-birinə bənzəyir: “Mən Aydının atası ilə tanış oldum, onu dinlədim. Deyim ki, bütün şəhid ata-anaları bir-birinə bənzəyir, onların gözləri oxşardır, dərdləri oxşardır. Qəhrəmanların ömür yoluna baxanda görürsən ki, onların çoxu 20, 22, 23, 25 yaşlarında qəhrəman olub şəhidliyə ucalıblar. Onların hamısı ömürlərinin qönçə vaxtı Vətən uğrunda canlarından keçiblər”.
Tanınmış hərbi jurnalist Şəmistan Nəzirli çıxış edərək respublika “Xatirə kitabı” redaksiyasının indiyə qədər gördüyü böyük işlərdən, nəşr etdirdiyi kitablardan danışdı. “Gözlə, gələcəyəm” kitabının redaksiyanın nəşr etdirdiyi dəyərli kitablardan biri olduğunu deyən Ş.Nəzirli bildirdi ki, bu kimi kitablar gənclərin vətənpərvərlik tərbiyəsində böyük rol oynayır. O qeyd etdi ki, belə kitablar yazılmalıdır.
Tədbirin aparıcısı Ə.Amaşov çıxış üçün professor Maarifə Hacıyevaya da söz verdi. M.Hacıyeva bildirdi ki, bu kitab böyük bir zəhmətin bəhrəsidir: “Şəhid oğlumuz Aydın haqqında yazılan bir kitabın təqdimatına toplaşmışıq. Bütün şəhidlərimizin ruhları şad olsun. Bu kitab 1997-ci ildə yaradılan respublika “Xatirə kitabı” redaksiyasının təşəbbüsü ilə yazılıb nəşr edilib. “Xatirə kitabı” indiyə qədər çox böyük işlər görüb, şəhidlərimiz haqqında cild-cild kitablar nəşr edib. “Şəhidlər ölməz, Vətən bölünməz” seriyasından nəşr edilən “Gözlə, gələcəyəm” redaksiyanın yeni layihəsidir. Mən bu təşəbbüsü göstərən “Xatirə kitabı”na, Mədəniyyət və Turizm Nazirliyinə təşəkkür edirəm ki, Aydın balamız haqqında belə bir kitab nəşr ediblər. Bu gün Aydının da, digər şəhidlərin də ruhu burada dolaşır. Çox arzu edərdim ki, bu kitabın davamı gəlsin, bizim gözəl jurnalistlərimiz, qələm sahiblərimiz şəhidlərdən çox yazsınlar. Bu kitablar “Şəhidlər ölməz, Vətən bölünməz” layihəsi əsasında hazırlansınlar. Müəllif kitabda “Aydın Abdullayevin yarımçıq ömür dastanı” adlı bir bölmə yazıb. Aydının fiziki ömrü yarımçıq qalsa da, onun vətənpərvərliyi, igidliyi, torpaq uğrunda həlak olması ömrünü yarımçıq göstərmir, bütöv göstərir. Aydın bizim bütün gənclərimizə, gələcək nəsillərə örnəkdir”.
Bakı Dövlət Universitetinin Jurnalistika fakültəsinin kafedra müdiri, professor Cahangir Məmmədli də çıxışında kitabı yüksək qiymətləndirərək bildirdi ki, şəhidlər haqqında yazılan hər bir kitab qiymətlidir: “Bu tədbirdə danışmaq elə də asan deyil, çox ağır işdir. Ancaq bu ağır işi xatirələrdə saxlamaq, yad etmək çox böyük işdir. “Yazıya pozu yoxdur” sözünü xalq boş yerə deməyib. Yüz dəfə internet də olacaq, başqa şeylər də, ancaq tarixdə kitab qalacaq. Bu kitab arxivlərdə, kitabxanalarda yaşayacaq. Bu kitabı ərsəyə gətirənlərə təşəkkür edirəm. Bu kitabı ərsəyə gətirənlərin hamısı mənə doğma olan adamlardır. Kitaba baxıram, burada adları çəkilən insanların hamısı doğmalarımdır. “Bakı-Xəbər” qəzetinin baş redaktoru Aydın Quliyev Azərbaycanın böyük vətəndaşlarından, cəmiyyətimizə, jurnalistikaya düzgünlük, dəqiqlik, qərəzsizlik öyrədən bir insandır. “Xatirə kitabı” çox böyük işlər görür. Bir vətəndaş kimi mən onlara təşəkkür edirəm. Mənim həyatımda şəhid sözü çox ağır sözdür. Bu gün Aydının ata və anası mənə çox doğma adam təsiri göstərdi. Atanın yerişində, duruşunda bir qürur var. Ananın göz yaşları bütün Azərbaycanın göz yaşlarıdır. Onlar bilsinlər ki, heç vaxt tək deyillər, onların yanında Azərbaycan xalqı və Azərbaycan dövləti dayanıb”.
YAP-ın Yasamal Rayon Təşkilatının sədri Tağı Əhmədov da çıxışında kitabın əhəmiyyətini vurğuladı. O kitabın layihə rəhbəri Nəzakət Məmmədovaya, nəşrin rəyçisi Aydın Quliyevə, redaktoru Zülfüqar Şahsevənliyə, müəllif İradə Sarıyevaya təşəkkür etdi. Qeyd etdi ki, Azərbaycanın ərazi bütövlüyü uğrunda şəhid olan hər bir Vətən övladı yaddaşlarda qalmalıdır. Bu şəhidlər haqqında kitabların yazılmalı olduğunu deyən T.Əhmədov dedi ki, şəhidlərin hər birinin təhsil aldığı məktəbdə onların xatirə lövhəsi vurulmaqla yanaşı, şəhidlərin adına təqaüd də təsis edilməlidir: “Aydının xatirəsini yaşatmaq, onun qəhrəmanlığını gələcək nəsillərə çatdırmaq üçün işlər görülməlidir. Hesab edirəm ki, Aydının oxuduğu məktəbdə Aydın Abdullayev adına təqaüd təsis edilsin və o təqaüd məktəbin yaxşı oxuyan şagirdlərinə verilsin. Bu olduqca əhəmiyyətli bir iş olardı. Bu cür kitabların yazılması gərəklidir. “Gözlə, gələcəyəm” kitabı Aydının valideynləri üçün bir təsəllidir”.
Müharibə, Əmək və Silahlı Qüvvələr Veteranları Təşkilatı sədrinin müavini Cəlil Xəlilov da kitab haqqında söz dedi. O qeyd etdi ki, “Gözlə, gələcəyəm” kitabı qəhrəmanlıq ruhunda yazılan bir kitabdır. A.Abdullayev kimi qəhrəmanların ömür yolunun bir nümunə olduğunu deyən C.Xəlilov vurğuladı ki, Vətən uğrunda canından keçən qəhrəmanlar unudulmamalı, onların döyüş yolu, qəhrəmanlığı təbliğ edilməlidir.
Yazıçı-publisist Şəfəq Nasir də çıxışında “Xatirə kitabı” redaksiyasının nəşr etdirdiyi kitab haqqında olduqca maraqlı və duyğulu danışdı.
Respublika “Xatirə kitabı” redaksiyasının baş redaktoru, kitabın layihə rəhbəri Nəzakət Məmmədova isə çıxışında qeyd etdi ki, bu tədbirə gəlib şəhid ruhunu şad edən hər bir şəxsə təşəkkürünü bildirir: “Elə bir gün olmur ki, bir şəhid anası, bir şəhid xanımı redaksiyamızın qapısını döyməsin, dərdini bizimlə bölüşməsin. Elə bu görüşlər nəticəsində də “Şəhidlər ölməz, Vətən bölünməz” layihəsi meydana gəldi.
Mən “Bakı-Xəbər” qəzetinin baş redaktoruna müraciət etdim ki, belə bir layihə həyata keçirmək istəyirəm. Bu layihədə torpaqlarımız uğrunda canından-qanından keçən şəhidlərimizi ildə bir kitab ortaya qoymaqla yad edək, onların xatirəsini əbədiləşdirək. İlk ünvanımız Aydın Abdullayev oldu. Aydın haqqında kitab yazmağı “Bakı-Xəbər” qəzetinin əməkdaşı, istedadlı jurnalist İradə Sarıyevaya tapşırdıq. Sağ olsun İradə, bu işin öhdəsindən çox məharətlə gəldi. Düzdür, bu mövzuda işləmək çox çətindir, çox ağırdır. Ancaq eyni zamanda qürurverici, şərəfli işdir. Hər gördüyümüz iş bir təsəlli olmaqla yanaşı, həm də Vətənimiz üçün canından keçənlərə qoyulan bir abidədir. Bu kitabın davamı olacaq. Növbəti ünvanımız Naxçıvan MR-in Sədərək rayonunda gedən döyüşlərdə həlak olan Seyidov İlkin Mirnəsir oğludur. Növbəti kitab onun haqqında olacaq. Bu cild üzərində artıq işə başlamaq üzrəyik. Fikrimcə, kitab qədər yaddaqalan ikinci bir abidə yoxdur. Kitab bizim gəncliyimiz, gələcəyimiz üçün bir yaddaş olacaq. Onlar biləcəklər ki, müstəqillik uğrunda şəhid olan nə qədər qəhrəmanımız olub. Həmişə müharibə qaymaqları aparır. Mən şəhid anası görəndə deyirəm ki, biz bu gün üçün onların çəkilməz dərdlərinə borcluyuq. Aydını dünyaya gətirən Sevil ananın qarşısında baş əyirəm. Ümidvaram ki, Aydınların qanı yerdə qalmayacaq. İnanıram ki, burada hüznlə söylədiyimiz sözləri qələbə sevinci ilə tamamlayacağıq”.
Şəhid atası Əmirsoltan Abdullayev isə çıxışında oğlunun xatirəsinə ehtiram göstərən hər bir kəsə, xüsusən də respublika “Xatirə kitabı” redaksiyasının baş redaktoru Nəzakət Məmmədovaya öz təşəkkürünü bildirdi.
Kitabın müəllifi, əməkdaşımız İradə Sarıyeva isə kitabı yazarkən ona dəstək olan hər bir şəxsə öz təşəkkürünü bildirdi.
Qeyd edək ki, “Gözlə, gələcəyəm” kitabının təqdimat mərasimində tədbir boyu BMM-də quraşdırılan monitorda Nəzakət Məmmədovanın “Haqqa qovuşduran şəhid zirvəsi” şeirinə həsr edilən klip yayımlanırdı. Klipdə Aydın Abdullayevin məzarından görüntülər, fotoşəkillərindən nümunələr də əks olunmuşdu.
Günel CƏLİLOVA
