"Brüsseldə Aİ və Azərbaycan arasında tərəfdaşlığa dair yeni sazişin imzalanması gözlənilmir"
"Azərbaycan üçün hazırda əsas vacib məsələ noyabrda Brüsseldə keçiriləcək Avropa İttifaqının Şərq Tərəfdaşlığı sammitinin Bəyannaməsidir. Çünki 3 il əvvəl Riqada qəbul olunmuş Bəyannamədə Azərbaycanın mövqeyi nəzərə alınmamışdı, ikili standartlı münasibət var idi".
APA-nın məlumatına görə, bunu bu gün jurnalistlərə açıqlamasında Azərbaycan XİN rəhbərinin müavini Mahmud Məmmədquliyev bildirib.
M. Məmmədquliyev deyib ki, Riqa sammitində Ukrayna, Moldova və Gürcüstandakı münaqişələrin bu ölkələrin ərazi bütövlüyü çərçivəsində həllinə dəstək ifadə olunub: "Amma Azərbaycana gəlincə, qeyd etmişdilər ki, ATƏT-in Minsk Qrupu var, danışıqları aparır, hansı qərar qəbul edilsə, dəstəkləyəcəyik. Biz iradımızı bildirmişdik ki, Azərbaycan razılığını verməyəcək, konsensus olmadığı üçün Bəyannamə də qəbul olunmayacaq. Sonra yüksək səviyyədə danışıqlar oldu, mövqeyimizi bildirdikdən sonra konsensusa nail olundu. Ona görə də biz istəyirik ki, bu məqam bir daha təkrar olunmasın".
Xarici işlər nazirinin müavini qeyd edib ki, bu gün Avropa İttifaqının yeni qlobal strategiyası qəbul olunub : "Həmin strategiyada bildirilir ki, Avropa İttifaqı bütün tərəfdaşların, o cümlədən Azərbaycanın, Gürcüstanın ərazi bütövlüyünü, suverenliyini və sərhədlərinin toxunulmazlığını dəstəkləyir".
M. Məmmədquliyev qeyd edib ki, Bəyannamənin hazırkı layihəsində bütün münaqişələrin ərazi bütövlüyü və suverenliyi çərçivəsində həllinin dəstəkləndiyi əksini tapıb: "Hazırda hər ölkə, o cümlədən Azərbaycan təkliflərini verir. Görək, necə olacaq".
"Avropa İttifaqı və Azərbaycan arasında tərəfdaşlığa dair yeni sazişlə bağlı danışıqlar başlayıb. Bu, hüquqi sənəddir və 15 il qüvvədə olmalıdır. Ona görə də danışıqlar çox gərgin keçir" deyə M.Məmmədquliyev bildirib.
M. Məmmədquliyev deyib ki, Avropa İttifaqının Şərq Tərəfdaşlığının Brüsseldə keçiriləcək sammitində - noyabrın 24-də bu sənədin imzalanacağını gözləmək olmaz. Danışıqlar 5 ay əvvəl başlayıb. Yay aylarında bir az fasilə olub, sonra danışıqlar yenə başlayıb. Danışıqlarda bəzi sahələrdə tərəqqi var, bəzi sahələrdə bir çox məsələlər qalmaqdadır. Ona görə də Brüsseldə bu sənədin imzalanacağını barədə yayılan məlumatlar yanlışdır".
"Ermənistan reallıqla barışsa, Qarabağ münaqişəsi həllini tapa bilər"
"Azərbaycanın BMT-yə üzvlüyünün ilk illəri Ermənistanın ölkəmizə təcavüzü ilə üst-üstə düşüb. Bu gün də Ermənistanın işğalı Azərbaycanın dayanıqlı inkişafına mane olan əsas səbəbdir". Bunu da BMT-nin yaradılmasının 72-ci ildönümü - BMT Günü və BMT-Azərbaycan münasibətlərinin 25 illiyinə həsr olunmuş tədbirdə xarici işlər nazirinin müavini bildirib.
“Əfsuslar olsun ki, BMT Təhlükəsizlik Şurasının işğalçı Ermənistan silahlı qüvvələrinin işğal olunmuş torpaqlardan çıxarılmasını tələb eldən 4 qətnaməsi hələ də icra olunmayıb. Bu münaqişə yalnız və yalnız Azərbaycanın suverenliyi və beynəlxalq səviyyədə tanınmış sərhədləri çərçivəsində həllini tapa bilər. Ermənistan nə qədər tez mövcud reallıqla barışsa, öz qüvvələrini işğal olunmuş rayonlardan çıxarsa, Dağlıq Qarabağ münaqişəsi bir o qədər tez həllini tapa bilər. Münaqişənin həllindən region ölkələri də faydalanar", - deyə o vurğulayıb.
