Dini ayinlər zamanı yığılan vəsaitlərin hesabatını aparmaq lazımdır. "Trend"in məlumatına görə, belə bir təkliflə Milli Məclisin bugünkü plenar iclasında millət vəkili Zahid Oruc çıxış edib.
Z.Oruc qeyd edib ki, dünyada terrorizmlə fəal mübarizə gedir və terrorizmin maliyyələşdirilməsi özü bir cinayətdir: "Düşünürəm ki, bütün ziyarətgahlarda toplanan ianələrin hesabatı aparılmalıdır. Nə qədər vəsait yığılır, nə qədər xərclənir, məlum deyil. Deyilənlərə görə, təkcə Nardaranda dini ayinlər zamanı bir milyon manata yaxın pul yığılıb. Göründüyü kimi, bu vəsait qəsəbənin inkişafına deyil, terrorizmin maliyyələşdirilməsinə və silah alınmasına sərf edilir".
Millət vəkili Fazil Mustafa isə digər millət vəkili Naqif Həmzəyevin Azərbaycan Xalq Cumhuriyyətinin qurucusu Məhəmməd Əmin Rəsulzadə barədə təhqiramiz fikir söyləməsinin yolverilməz olduğunu bildirib(APA).
F.Mustafa deyib ki, tənqidi fikirlər ola bilər, ancaq təhqirə yol vermək olmaz. O qeyd edib ki, Gəncədə Məhəmməd Əmin Rəsulzadənin büstündən çuvalın götürülməsi yaxşı haldır, ən azı tənqidlərdən yəqin müəyyən nəticələr çıxarılıb: "Bir məqamı deyim. Biz Heydər Əliyevə qarşı kəskin mübarizə aparmışıq, ancaq Heydər Əliyev Əbülfəz Elçibəy vəfat edəndə gəlib onun başı üzərində dayandı. Heydər Əliyevə cəbhəçilərin münasibəti tam dəyişdi. Milli Məclisdə Məhəmməd Əmin Rəsulzadənin təhqir olunması ilə bağlı məsələyə münasibət bildirilməlidir".
Milli Məclis sədrinin birinci müavini Ziyafət Əsgərov isə qeyd edib ki, Naqif Həmzəyev müsahibəsində belə fikir söyləmədiyini deyir: "Naqif Həmzəyev deyib ki, belə fikir söyləməyib, fikirləri kontekstdən çıxarılıb. Dəqiqləşməmiş məsələyə biz nə münasibət bildirək? Qəzet redaksiyası ilə deputat oturar, məsələni aydınlaşdırar, sonra münasibət bildirilər".
Vahid istintaq orqanı yaradılsın!
"Milli Təhlükəsizlik Nazirliyi ilə bağlı məsələ, Nardaran və digər hadisələr dövləti qarşısına qoyduğu hədəfdən yayındırmır". Bunu da Zahid Oruc deyib.
Milli Təhlükəsizlik Nazirliyində aparılan son həbslərə toxunan Z.Oruc qeyd edib ki, bəlkə də heç bir dövlətdə təhlükəsizlik orqanlarında bu qədər şəxs həbs olunmayıb: "Prokurorluqda təhlükəsizlik orqanlarına nəzarətlə bağlı qurum var. Bu qurum son illərdə təhlükəsizlik orqanlarının hansı iddialarını rədd edib? Ayrı-ayrı dövlət orqanlarında istintaq qurumları ləğv edilməlidir. Vahid istintaq orqanının yaradılması məsələsinə də baxıla bilər".
Z.Oruc deyib ki, İslamı ələm uçurtmaq və digər hallarla nümayiş etdirmək hallarına rast gəlinir: "Nardaranda meydanlara İmam Hüseyn, İmam Əli və digər adlar verilib. Azərbaycan hüquqi dövlətdir və meydanlara dini adların verilməsi kimi məsələlər də qanunvericiliklə müəyyənləşdirilməlidir. Ekstremizmin maliyyələşməsi məsələsinə də toxunmaq istəyirəm. Pirlərdə, ziyarətgahlarda toplanan vəsaitlər hara xərclənir? Nardarandakı ziyarətgahlarda toplanan ianələr hara xərclənir, hansı problemin həllinə yönəldilib? Görünür, bu vəsaitlər hansısa problemin həllinə yox, silah alınmasına və digər zərərli məqsədlərə sərf olunub".
"Dini ekstremizmə qarşı mübarizə haqqında" qanun qəbul edildi
Azərbaycanda dini ekstremizm əleyhinə keçirilən xüsusi əməliyyatlar zamanı dini ekstremistlərin həyatına, sağlamlığına və ya əmlakına ziyan vurulmasına icazə veriləcək. Bununla bağlı məsələ yeni hazırlanan "Dini ekstremizmə qarşı mübarizə haqqında" qanun layihəsində öz əksini tapıb.
Hüquq siyasəti və dövlət quruculuğu, İctimai birliklər və dini qurumlar tərəfindən birgə hazırlanan layihə üç fəsil 15 maddədən ibarətdir.
Milli Məclisin plenar iclasında layihə səsvermədən sonra I oxunuşda qəbul olunub. Yeni qanun layihəsinə əsasən, dini ekstremizm, dini fanatizm və dini radikalizm hallarının aşkarlanmasına və qarşısının alınmasına və bu hallar nəticəsində dəyə biləcək zərərin minimuma endirilməsinə kömək edə biləcək məlumatların müvafiq dövlət orqanlarına vermək hər kəsin borcudur.
Qanun layihəsində qeyd olunub ki, dini ekstremist fəaliyyətində iştirak edən şəxslər Cinayət, İnzibati Xətalar və Mülki məcəllələr ilə nəzərdə tutulmuş qaydada məsuliyyət daşıyırlar. Dini ekstremist fəaliyyətilə məşğul olan hüquqi şəxslərin qeydiyyatı ləğv edilir və onların fəaliyyəti qadağan edilir.
Layihəyə əsasən, Azərbaycan qanunvericiliyi ilə nəzərdə tutulmuş qaydada dini ekstremizm əleyhinə aparılan xüsusi əməliyyat zamanı dini ekstremistlərin həyatına, sağlamlığına və ya əmlakına ziyan vurulmasına yol verilir. Dini ekstremizmə qarşı mübarizədə iştirak edən şəxs dini ekstremizm əleyhinə aparılan xüsusi əməliyyat zamanı vurulmuş ziyana görə məsuliyyət daşımır.
Əsas məqsəd cəmiyyətin və dövlətin təhlükəsizliyinin təmin edilməsi, dini ekstremizmin aşkar edilməsi, qarşısının alınması və dini ekstremizm nəticəsində gözlənilən zərərin minimuma endirilməsi, dini ekstremizmin yaranması və dini ekstremist fəaliyyətin həyata keçirilməsi səbəblərinin və şəraitinin, habelə dini ekstremizmin maliyyələşdirilməsi hallarının aşkar və ləğv edilməsidir.
Qeyd edək ki, layihə səsvermədən sonra I oxunuşda qəbul olunub.
Terror fəaliyyətinə görə vətəndaşlıq itiriləcək
"Azərbaycan Respublikasının vətəndaşlığı haqqında" qanuna müvafiq dəyişikliklər də Milli Məclisin iclasında təsdiq edilib. Dəyişikliyə görə, Azərbaycan vətəndaşları ölkənin konstitusiya quruluşunun zorla dəyişdirilməsinə, terror fəaliyyətinə yönəldilmiş hərəkətlərinə görə vətəndaşlıqlarını itirə bilərlər. Bundan başqa, Azərbaycan vətəndaşının dini ekstremist fəaliyyət və ya dini təhsil adı altında xarici dövlətdə hərbi təlim keçməsi, düşmənçilik zəminində dini məzhəblərin yayılması və ya dini ayinlər adı altında xarici dövlətdə dini münaqişələrdə iştirak etməsi və ya həmin fəaliyyətə digər şəxsi cəlb etməsi, yaxud bu məqsədlə silahlı qrup yaratması vətəndaşlığının itirilməsi ilə nəticələnir.
Ekstremizmə görə valideyn hüququndan məhrum etmək...
Azərbaycanda ekstremizmə görə valideyn hüququndan məhrum etmək təklif edilib. Bu təkliflə deputat Qüdrət Həsənquliyev Milli Məclisin bu gün keçirilən plenar iclasında çıxış edib.
O, Cinayət Məcəlləsinə müvafiq dəyişiklik etməyi təklif edib.
Bundan başqa, Q.Həsənquliyev qeyd edib ki, Daxili İşlər Nazirliyi tərəfindən xüsusi əməliyyat keçirilərkən jurnalistlər üçün brifinqlər təşkil edilsin: "Belə brifinqlər dövlət sirri olan məlumatın yayılmasının qarşısını almağa imkan verəcək".
Polisin səlahiyyətləri artırıldı
Azərbaycanda polisə terrorçuluq və ya dini ekstremizm, yaxud Konstitusiya quruluşunun dəyişdirilməsi ilə bağlı cinayətlərin qarşısının alınmasında odlu silahdan istifadə etmək səlahiyyəti verilib. Bununla bağlı "Polis haqqında" qanuna müvafiq dəyişiklik Milli Məclisin bu gün keçirilən plenar iclasında təsdiq edilib.
Qanunun 26-cı maddəsinə (Polis tərəfindən fiziki qüvvənin, xüsusi vasitələrin və ya odlu silahın tətbiqi) təklif edilən əlavəyə əsasən, terrorçuluq və ya dini ekstremizm, yaxud Konstitusiya quruluşunun dəyişdirilməsi ilə bağlı cinayətlərin qarşısı alındıqda polis tərəfindən fiziki qüvvə, xüsusi vasitələr və ya odlu silah tətbiq ediləcək.
Dini mərasimlərlə bağlı qaydalar da sərtləşdirildi
Xaricdə dini təhsil almış Azərbaycan vətəndaşlarına islam dininə aid ayin və mərasimlərin aparılması qadağan edilib. Bununla bağlı "Dini etiqad azadlığı haqqında" qanuna müvafiq dəyişiklik Milli Məclisin plenar iclasında qəbul edilib.
Dəyişiklərə əsasən, ibadətgahlardan kənarda, ictimai yerlərdə dini şüarların və digər dini atributların (şəxsin üstündə gəzdirdiyi dini atributlar istisna olmaqla) nümayiş etdirilməsi qadağandır. Dini bayraqlar yalnız ibadətgahların, dini mərkəz və idarələrin üzərində yerləşdirilə bilər.
Parlamentin vitse-spikeri Ziyafət Əsgərovun sözlərinə görə, dəyişikliklər xaricdə təhsil alan təqribən 3 min ölkə vətəndaşının Azərbaycanda işləyə bilməyəcəyi anlamına gəlmir: "Onlar yenə də dini obyektlərdə, hətta dövlət orqanlarında işləyə bilərlər. Bu, yalnız islam ayin və mərasimlərinin keçirilməsinə aiddir".
"Dini etiqad azadlığı haqqında" qanuna dəyişikliklərlə əlaqədar Cinayət Məcəlləsinə də müvafiq dəyişiklik edilib. İslam dininə aid ayin və mərasimlərin xaricdə dini təhsil alan Azərbaycan Respublikasının vətəndaşı tərəfindən aparılmasına görə 1000 manatdan 5000 manata qədər cərimə və ya 1 ilədək müddətdə azadlıqdan məhrumetmə cəzası tətbiq olunacaq.
Xarici vətəndaşlar və ya vətəndaşlığı olmayan şəxslər Azərbaycanda dini təbliğata görə 1 ildən iki ilədək azadlıqdan məhrum ediləcək.
Bu hərəkətlər təkrarlanarsa (o cümlədən qrup halında) 2 ildən 5 ilədək azadlıqdan məhrum etmə cəzası nəzərdə tutulur.
