Fikrət Yusifov: “Orta əmək haqqı ilə bağlı müqayisə doğru deyil, çünki sahələr üzrə onun məbləği fərqlidir”
2026-cı ilin birinci rübünün nəticələrinə görə qonşu ölkələr üzrə orta aylıq əmək haqqı açıqlanıb: Rusiya – 1367 dollar, Belarus – 975 dollar, Qazaxıstan – 927 dollar, Gürcüstan – 870 dollar, Ermənistan – 813 dollar, Azərbaycan – 677 dollar, Qırğızıstan – 534 dollar.
Rəqəmlərə görə bir tək və heç bir təbii resursu olmayan Qırğızıstandan öndəyik. Yaxşı, bu vacib göstəriciyə görə biz niyə, məsələn, Gürcüstandan 193 dollar geri olmalıyıq? Bu da 328 manat edir. Bu fərqi aradan qaldırmaq çoxmu çətindir? Bununla bağlı hansı işlərin görülməsinə ehtiyac var?
Sözügedən məsələ ilə bağlı fikirlərini baki-xeber.com-la bölüşən sabiq maliyyə naziri, professor Fikrət Yusifov hesabatda orta aylıq əmək haqqı ilə bağlı məqamlara fərqli prizmadan yanaşdı: “Orta aylıq əmək haqqı göstəricisini ümumiyyətlə, statistikada normal bir göstərici saymıram. Orta aylıq əmək haqqını ancaq sahələr üzrə çıxaranda bir nəticəyə gəlmək mümkündür. Məsələn, bir ölkədə təhsil sistemində orta aylıq əmək haqqı nə qədərdir. Səhiyyə sistemində bu nə qədərdir və yaxud da sənaye sektorunda əmək haqqı nə qədərdir. Ancaq ölkə üzrə orta aylıq əmək haqqı göstəricisi absurd, ağılsız bir göstəricidir. Deyək ki, bir insan hansısa sahədə minimal əmək haqqına yaxın məvacib alır. Yəni ortadakı minimum əmək haqqına yaxın, əmək haqqı alır. Digər birisi isə ondan 50 dəfə çox əmək haqqı alır. İkisini toparlayıb orta əmək haqqı çıxartmaq nə qədər məntiqi, ağıllı bir işdir, hansı məntiqə söykənir? Ortada heç bir məntiq yoxdur. Ona görə də belə bir müqayisələrin aparılmasının tərəfdarı deyiləm. Minimum əmək haqqına gəldikdə isə, onu müqayisə etmək olar. Yəni hansı ölkədə minimum əmək haqqı nə qədərdir. Hesab edirəm bu, normal bir göstəricidir və həm də bir ölçüdür. Ölçü vahidi kimi həmin ölkənin bir çox sosial məsələlərinin həllində, sosial yardımların verilməsində, sosial tədbirlərin keçirilməsində istifadə edilir. Bu, doğurdan da nəsə deyir. Ancaq orta əmək haqqı ilə bağlı müqayisə doğru deyil. Ona görə ki, sahələr üzrə onun məbləği fərqlidir. Bu göstərici ilə hər hansı bir müqayisə aparmağın özü heç bir məntiqə söykənmir”.
Vidadi ORDAHALLI
