İlqar Hüseynli: “Reklamdan əldə edilən gəlirlərin yığılması səlahiyyəti bələdiyyələrdən alınaraq RA-ya verilib”
Bələdiyyələrin gəlirlərinin formalaşması mənbələri müxtəlifdir. Bunlardan biri də bələdiyyələrin reklamdan əldə etdiyi gəlirlərdir. Azərbaycanda bələdiyyələrin açıq məkanda reklamdan əldə etdiyi gəlirlər formallıq daşıyaraq, ümumi büdcədə çox aşağı paya malikdir və yerli bələdiyyələr xarici ölkələrlə müqayisədə dəfələrlə az gəlir əldə edir.
Halbuki, regionlardan fərqli olaraq Bakıda yerləşən bələdiyyələrin reklam potensialı qat-qat böyükdür. O zaman bəs niyə reklamdan gəlir əldə edilmir və ya çox cüzidir? Ola bilərmi reklam yerləşdirilməsindən daxil olan vəsaitlər real həcmi qeydə alınmadan gizlədilir?
Sözügedən məsələyə aydınlıq gətirən ekspert İlqar Hüseynli baki-xeber.com-a açıqlamasında bununla bağlı bir sıra məqamlara toxundu: “Ümumiyyətlə, bələdiyyələrin reklamdan gəlir əldə etmək imkanları artıq məhdudlaşdırılıb. İlk bələdiyyələr formalaşarkən reklamlardan gələn gəlirlərin, ümumiyyətlə, reklam rüsumlarının toplanması bilavasitə bələdiyyələrin səlahiyyətlərinə aid idi. “Bələdiyyələrin statusu haqqında” Qanunda da konkret olaraq bu, təsbit olunmuşdu. Sonradan qanunvericiliyə dəyişiklik edildi və Reklam Agentliyi yaradıldıqdan sonra bütün reklam məsələləri ilə bağlı rüsumların yığılması yeni quruma verildi. Yəni reklamdan əldə edilən gəlirlərin yığılması səlahiyyəti Reklam Agentliyinə verildi. Nəticədə bələdiyyələr bu rüsumların yığılması rolunda deyillər. Bu baxımdan bəli, bələdiyyələrin məhz reklamdan gələn gəlirlərlə bağlı imkanları məhdudlaşdırıldı. Bələdiyyələrin torpaqları var və həmin torpaqlar bələdiyyə mülkiyyəti sayılır. Fiziki və ya hüquqi şəxslər bələdiyyə mülkiyyətində olan torpaqlarda reklamlarını da yerləşdirə bilərlər. Əlbəttə ki, açıq məkanda həmin reklamları yerləşdirmək üçün ilkin olaraq xüsusi konstuksiyalara malik reklam saxlayıcılarını, reklam daşıyıcılarını quraşdırmaq və ya bərkitmək lazımdır. Bu reklam daşıyıcılarının quraşdırılması üçün həmin şəxslər bələdiyyələrlə müqavilələr bağlamalıdırlar. Daha doğrusu, icarə müqavilələri bağlanmalıdır ki, bələdiyyələrə ödənilən icarə haqqının müqabilində reklan daşıyıcılarını orada quraşdıra və ya bərkidə bilsinlər. Ancaq həmin reklam daşıyıcılarında reklamların yerləşdirilməsi, reklam haqlarının hesablanması və yığılması səlahiyyətləri Reklam Agentliyinə verilib. Bundan başqa, Nazirlər Kabinetinin qərarına əsasən, şəhərlərdə olan bütün avtomobil yolları dövlətə aid olduğundan, həmin yollarda da parklanmaların yaradılması və parklanmalara görə ödənişlərin əldə edilməsi dövlətin səlahiyyətindədir. Müvafiq olaraq, bu səlahiyyətlər dövlət qurumu olan AYNA-ya verilib”.
Vidadi ORDAHALLI
