ABŞ prezidenti Donald Tramp və İran arasında əldə edilən çərçivə sazişi Ağ Ev və milli təhlükəsizlik kabineti daxilində ciddi fikir ayrılığına səbəb olub.
Cümə günü İsveçrədə keçirilməsi planlaşdırılan rəsmi imza mərasimindən əvvəl, sazişlə bağlı şübhələrini bildirən Dövlət katibi Marko Rubio, Müdafiə katibi Pit Heqset və Mərkəzi Kəşfiyyat İdarəsinin direktoru Con Retkliffin vəzifədən azad edilə biləcəyi irəli sürülüb.
“Israel Hayom” qəzetinə danışan yüksək vəzifəli ABŞ rəsmisi bildirib ki, administrasiya daxilində müzakirələr artıq tamamilə başa çatıb və qəti qərar qəbul edilib: “Bu məsələdə Ağ Evin iradəsinə müqavimət göstərməyə və İranla razılaşmaya qarşı çıxmağa davam edənlər tezliklə vəzifələrini itirərək bədəl ödəyə bilərlər”.
Ağ Evdəki digər bir qrupu təmsil edən vitse-prezident Vens və xüsusi nümayəndələr Stiv Uitkoff və prezidentin kürəkəni Kuşner İran rejiminin tezliklə çökəcəyinin ehtimalının az olduğunu iddia edirlər. Sözügedən komanda, Qətər başda olmaqla, Körfəz ölkələrinin razılaşmanı həyata keçirmək üçün Vaşinqtona güclü diplomatik təzyiq göstərdiyini vurğulayaraq, bildirirlər ki, Tramp İranla əldə edilən razılaşmanı sona qədər dəstəkləməlidir.
Bunun əksinə olaraq, dövlət katibi Rubio və müdafiə naziri Heqset isə tam əks strategiya izləyərək, İranın iqtisadi sanksiyalar altında artıq çöküş mərhələsinə çatdığını iddia edirlər. İki nazir Trampa Vaşinqtonun bu kritik məqamda geri çəkilib sanksiyaları yumşaltmaq əvəzinə, Tehrana iqtisadi və hərbi təzyiqi daha da artırmalı olduğunu bildirirlər.
Proseslə bağlı şübhələr yalnız nazirliklərlə məhdudlaşmır, həm də ABŞ kəşfiyyatının ən yüksək səviyyələrinə çatıb. Məlumata görə, Mərkəzi Kəşfiyyat İdarəsinin direktoru Con Retkliff Prezident Trampa və yüksək vəzifəli administrasiya rəsmilərinə təqdim edilən məxfi hesabatlarda İranın niyyətləri ilə bağlı çox ciddi xəbərdarlıqlar edib. Retkliff, ABŞ kəşfiyyat orqanları tərəfindən toplanan məlumatların, İranın yekun razılaşmada Vaşinqtonun gözlədiyi nüvə güzəştlərinə istəkli olduğu iddialarını tədiqləmədiyini və Tehranın qeyri-səmimi olduğunu bildirib.
Tahir TAĞIYEV
