Nadir Azəri:“Şuranın fəaliyyətə başlaması media subyektləri üçün dövlət sifarişləri və müsabiqələr vasitəsilə yeni maliyyə mənbələrinin yaranmasına təkan verə bilər”
“Media haqqında” qanunda dəyişikliklər Milli Məclisin komitə iclasında müzakirə olunub. Qeyd edək ki, Milli Məclisin İnsan hüquqları komitəsinin iclasında müzakirəyə çıxarılan “Media haqqında” qanuna təklif edilən dəyişikliklərə görə Medianın İnkişafı Agentliyi və Audiovizual Şuranın əsasında Media və Yayım Şurası yaradılır. Media və Yayım Şurası Azərbaycan Respublikasında media və yayım sahəsində səlahiyyətli dövlət orqanı olacaq.
Qeyd olunur ki, müasir dövrdə milli informasiya təhlükəsizliyini və medianın iqtisadi müstəqilliyini təmin etmək üçün Azərbaycanda media sahəsinə münasibətdə daha çevik və kollegial mexanizmə keçid zərurəti yaranıb. Sözügedən mexanizm də öz növbəsində çap, onlayn və audiovizual media arasındakı sərhədlərin silinməsi, informasiya sisteminin əsas sütunu olan mediaya vahid yanaşmanı şərtləndirir.
Media qurumlarının iqtisadi müstəqilliyinin artırılması, gücləndirilməsi bu gün çox aktualdır. Bu yeni qurum yaranandan sonra media orqanlarının iqtisadi müstəqilliyinin, ümumiyyətlə, iqtisadi dayaqlarının möhkəmləndirilməsi yönümündə nələri etmək olar? Burada xüsusilə də dövlət vəsaiti təbii ki, tam kəsilə bilməz. Dövlət vəsaitinin artırılması, ondan sonra əlavə maliyyələşmə mənbələri üçün iqtisadi mənbələrin yenidən yaradılması yönümündə nələr etmək olar və ediləcək? Medianın iqtisadi müstəqilliyinin artırılmasının, möhkəmləndirilməsinin iki yolu aktualdır. Yəni həm dövlət dəstəyinin gücləndirilməsi, həm də medianın özünün iqtisadi cəhətdən müstəqilliyinin təmin edilməsi, müstəqil iqtisadi dayaqlarının olması üçün imkanların açılması vacibdir.
Məsələ ilə əlaqədar “Orta Asiya və Güney Qafqaz Söz Azadlığı Şəbəkəsi” (CASCFEN) İctimai Birliyinin sədri, Əməkdar jurnalist Nadir Azəri baki-xeber.com-a bildirib ki, Azərbaycanda davamlı olaraq media subyektlərinin, kütləvi informasiya vasitələrinin və ümumilikdə media sektorunun inkişafı istiqamətində mühüm addımlar atılır, ardıcıl dövlət siyasəti həyata keçirilir:“Media və Yayım Şurasının yaradılması da bu istiqamətdə atılmış növbəti mühüm addım kimi qiymətləndirilə bilər”.
Nadir Azəri vurğulayıb ki, yeni yaradılacaq Media və Yayım Şurası müxtəlif istiqamətlərdə fəaliyyət göstərəcək. O, həmçinin qeyd edib ki, bununla yanaşı, qurumun fəaliyyətə başlaması media subyektləri üçün yeni iqtisadi imkanlar da formalaşdıra bilər: “Hesab edirəm ki, Şuranın fəaliyyətə başlaması media subyektləri üçün dövlət sifarişləri və müsabiqələr vasitəsilə yeni maliyyə mənbələrinin yaranmasına təkan verə bilər. Audiovizual məhsulların istehsalı və yayımı ilə bağlı keçiriləcək müsabiqələr televiziya kanalları, onlayn media platformaları və prodüser şirkətləri üçün əlavə gəlir imkanları yaradacaq mühüm mexanizmlərdən biri ola bilər”.
N. Azəri qeyd edib ki, əhalinin maarifləndirilməsi məqsədilə hazırlanacaq proqram və materialların sifariş əsasında mediada yayımlanması media qurumlarının reklam bazarından kənar alternativ gəlir mənbələri əldə etməsinə töhfə verə bilər:“Ümumilikdə, media subyektlərinin iqtisadi müstəqilliyinin gücləndirilməsinə yönəlmiş layihələr gələcəkdə yeni maliyyələşdirmə mexanizmlərinin və investisiya imkanlarının formalaşmasını stimullaşdıra bilər. Digər tərəfdən, media sahəsində yeni informasiya-kommunikasiya texnologiyalarının və innovasiyaların tətbiqinin dəstəklənməsi media qurumlarının rəqabət qabiliyyətini artırmaqla yanaşı, onların yeni biznes modellərinə keçidini də sürətləndirəcək. Eyni zamanda, dövlət qurumları ilə media arasında əməkdaşlığın genişləndirilməsi informasiya və kommunikasiya xidmətləri bazarında yeni tərəfdaşlıq imkanlarının yaranmasına şərait yarada, media subyektlərinin institusional və iqtisadi potensialının güclənməsinə müsbət təsir göstərə bilər”.
İradə SARIYEVA
