Ermənistan Azərbaycanı Beynəlxalq Cinayət Məhkəməsinə verməyə hazırlaşır- Haaqada gizli müzakirə.....
Ermənistan Azərbaycana qarşı daha bir təxribata hazırlaşır. 44 günlük müharibədə dəmir yumruğun gücünü görən düşmən ölkə, sülh əvəzinə ölkəmizə qarşı beynəlxlq qaralama kampaniyası üçün çırpınır. Sözsüz ki, qərbdəki havadarlarının diqtəsi və dəstəyi ilə. "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu mövzu barədə fikirlərini paylaşıb. A.Quliyev yazır: "Ermənistanın XİN başçısı Ararat Mirzoyanın Haaqada Beynəlxalq Cinayət Məhkəməsinin sədri Petr Xofmanski ilə görüşünə heç bir halda "xoş niyyətli görüş" demək olmaz. Açıq deyilməsə də, burada Azərbaycanın əleyhinə düşməncəsinə müzakirələrin aparıldığına şübhə yoxdur. Rəsmi yayılmış məlumata diqqətlə yanaşanda hər şey öz- özünə görünür. Məlumatda deyilir ki, Mirzoyan regionda Ermənistanın cəzasızlıq mühitindən əziyyət çəkdiyini, bunun qarşısının alınması və bəşəriyyət əleyhinə cinayətlərin cavabının verilməsinin zəruriliyi barədə fikirlərini bildirib. Hər şey aydın deyilir.
Biz bilirik ki, Ermənistan hələ də beynəlxalq təşkilatlarda 100 mindən çox Qarabağ ermənisinə qarşı Azərbaycanın guya etnik təmizləmə aparmasını və zorla deportasiya etdiyini sübut etməyə çalışır. Habelə 2021 - ci ilin mayında və 2022- ci ilin sentyabrında Azərbaycanın guya Ermənistan ərazisinə təcavüz edərək torpaqları işğal etməsini, bu ərazilərdəki erməni irsini məhv etməsini dünyaya car çəkir. Ermənistan rəhbərliyinin məntiqi budur ki, Azərbaycanın bu hərəkətləri guya beynəlxalq hüquqla Cinayət tərkibinə malikdir, lakin indiyədək cəzasızlıq mühiti hökm sürdüyünə görə Azərbaycan cəzalandırılmayıb .
Heç bir şübhə yeri qalmır ki, Mirzoyan Haaqada Xofmanski ilə Azərbaycanın rəhbərliyini beynəlxalq cinayət məhkəməsinə verməyin hüquqi perspektivlərini müzakirə edib. Mirzoyanla Xofmanskinin hansısa ümumi qənaətlərə gəlib - gəlmədiklərini sübut edən faktlar hələlik əlimizdə yoxdur. Lakin hazırda Ermənistanın Azərbaycana qarşı aqressiv danışıq üslubu və Qərb təşkilatlarının Azərbaycan əleyhinə qərəzli siyasəti deməyə əsas verir ki, onlar bir- biri ilə anlaşmaya meyllidirlər.
Mirzoyan bu müzakirələrlə azı 2 hədəfi vurmağı planlayır.
1 .Azərbaycanın gələcəkdə Beynəlxalq Cinayət məhkəməsinə verilməsi üçün baza hazırlayır.
2 .Ermənistanın Roma statutuna, yəni Beynəlxalq Cinayət Məhkəməsinin nizamnaməsinə qoşulmaqda əsas məqsədlərindən birinin Putini həbs etmək olmadığını Rusiyaya nümayiş etdirmək istəyir. Demək istəyir ki, Ermənistana gələcəyi təqdirdə Putini həbs etmək kimi bir planımız və ya niyyətimiz yoxdur.
Burada Mirzoyan - Xofmanski qapalı görüşünün daha bir aspektinə də toxunmaq lazımdır .Paşinyan və onun komandası bir tərəfdə Azərbaycanla imzalanacaq sülh sazişi barədə müzakirə apardıqları halda, o biri tərəfdə Azərbaycan rəhbərliyinin əleyhinə beynəlxalq hüquq müstəvilərində Cinayət təqibi açmağın perspektivlərini araşdırır.
Formaca ziddiyyətli görünsə də, əslində onun arxasında dayanan mətləb budur ki, Ermənistan həqiqi sülhə hazır deyil və imzalanmış hər hansı müqaviləni " milli revanş " prinsipi çərçivəsində istənilən vaxt pozmaqda qərarlıdır."
Mətləb Salahov
