Rusiya Fransa, Putin Makron deyil axı... Bir daha 20 yanvar şəhidlərimizin xatirəsinə....
"Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində bu gün 34-cü ilini qeyd etdiyimiz 20 yanvar faciəsinə müxtəlif ölkələrin münasibəti barədə fikirlərini bölüşüb. A.Quliyev yazır:
"ABŞ-ın Bakıdakı səfirliyi ənənəvi olaraq 20 yanvar şəhidlərinin xatirəsinə anım mesajı yaydı. Bu çox yaxşıdı. Afərin səfirliyə...
Zaman yetişib ki, eyni "afərini" Rusiya səfirliyinə də deyə bilək. 34 il ərzində bunu görmədik . 2023- cü ilə qədərki dövrdə Rusiya səfirliyindən bu xoşagəlməz hərəkətsizliyi haradasa başa düşmək olardı. Ən azı ona görə ki, Kreml hakimiyyətində Sovet silahlı qüvvələrinin və Sovet siyasi rəhbərliyinin törətdikləri hərbi təcavüz və cinayətə görə muəyyən "komplekslərin" yaşandığını ehtimal etmək olardı. Bəs indi, 2023- cü ilin Antiterror tədbirlərindən sonra nə deyək? Axı bu tarixdə Azərbaycanın ərazi bütövlüyü və suverenliyinin bərpası uğrunda mübarizədə qəti nəticə əldə olundu. Həm də Rusiyanın indiki siyasi rəhbəri olan şəxsən Putinin Azərbaycanın qanuni mənafeləri çərçivəsində hər şeyə anlayışla yanaşması nəticəsində əldə olundu. Putinin bu mövqeyi keçmiş sovet rəhbərliyinin əməlləri üzündən məlum kompleksdən çıxmaq üçün böyük əsasdır.
Loru dildə desək, keçmiş sovet rəhbərlərinin cinayətlərini Putin yudu...Niyə yudu? Azərbaycan xalqının öz ərazi bütövlüyünə və tam süverenliyinə qovuşmaq haqqına dəstək vermək xatirinə yudu....
Bu arqumentlər Bakıda Rusiya səfirliyinin 20 yanvar şəhidlərinin ruhunu ictimai şəkildə anması üçün yetərli deyilmi?
Xankəndinin , Xocalının ,Şuşanın və digər doğma vətən ocaqlarımızın milli süverenlik altına qaytarılmasına mane olmamaq, hətta siyasi dəstək vermək Rusiyanın Azərbaycanda imicini xeyli pozitivləşdirdi. Mən inanıram ki, Rusiya səfirliyi 20 yanvar şəhidlərimizin ruhuna layiqli sayqı jestini göstərsə, imicin pozitiv dəyişilmə prosesi bir az da irəliləyə bilər. Hollandiyanın baş naziri Rutte keçmiş müstəmləkələrdə 1572- ci ildə son verdikləri "qul əməyi istismarına" görə üzr istəmədi? Bu hərəkət Hollandiyaya bir əskiklik gətirdimi?!
Almaniyanın prezidenti Hitlerin cinayətlərinin qurbanı olmuş bütün xalqlardan üzr dilədi, kompensasiya ödədi. Bu hərəkət alman xalqına bəşəri rəğbəti artırdı.
Bircə Makron hələ də keçmiş müstəmləkə xalqlarının qəzəb və nifrət dolu haqlı çağırışlarına kar- kor olaraq cavab vermir. Bu, Makrondur, bu Fransadır, ondan hər şey gözləmək olar. Bu həmin Fransadır ki, almanlarla Böyük Karlın Frank imperiyasının dağıldığı 9-cu əsrə gedib çıxan düşmənçiliyə baxmadan cəmi bir neçə günə Hitlerə təslim oldu, Hitlerin "işğal hədiyyəsi " olaraq Napoleonun Avstriyada ölmüş oğlunun nəşini Parisə gətirməsini böyük şadyanalıqla qarşıladılar. Sonra da eyni zövqlə antifaşist azadlıq ordularının Parisə girişini qarşıladılar. Həmin Fransadır ki, bütün dünya müstəmləkəçilikdən imtina etdiyi halda, bu kifir siyasəti hələ də davam etdirir. Faktlar çoxdu...
Ortada bir neçə nümunə var. Holland Ruttenin şərəfli nümunəsi, Almaniya prezidentinin şərəfli nümunəsi və Makronun kifir "nümunəsi"....
Axı Rusiya Fransa, Putin Makron deyil ....
20 yanvar şəhidlərimizə layiqli sayqı bunu bir daha təsdiq edə bilər....Gözləyək. Putin Makron olacaq, ya özü olacaq..."
Mətləb
