17/02/2019 21:02
728 x 90

Nəhəng enerji şirkətlərinın Azərbaycana cəlbinin düzgün kurs olduğunu Davos bir daha nümayiş etdirdi…

img

Rüfət Quliyev: “Tək enerji şirkətləri deyil, böyük şirkətlər ölkəmizə etibarlı tərəfdaş kimi baxdığı üçün, həvəslə Azərbaycana investisiya yatırırlar”
Sədaqət Vəliyeva: “Böyük enerji şirkətlərinin Azərbaycana sərmayə yatırması ölkəmizdəki siyasi sabitlik və təhlükəsizlik amili ilə bağlıdır”

 

Prezident İlham Əliyev Davosda Çinin CGTN (China Global Television Network) televiziya kanalına müsahibəsində qeyd edib ki, neft və qaz iqtisadiyyatımızın aparıcı qüvvəsi olsa da, bizim əsas vəzifəmiz iqtisadiyyatımızı şaxələndirməkdir: “Biz böyük enerji şirkətlərini Azərbaycana sərmayə yatırmaq üçün cəlb etdiyimizə görə çox böyük tərəqqiyə nail olmuşuq. Lakin indi, əlbəttə ki, bizim əsas vəzifəmiz iqtisadiyyatımızı şaxələndirməkdir və neft-qazdan asılılığımızı azaltmaqdır. Bu, asan olmayacaq, çünki biz indi neft və qaz ehtiyatlarımızın işlənilməsinin aktiv inkişaf fazasındayıq”.

Böyük enerji şirkətlərini Azərbaycana cəlb etməklə ölkəmizin əldə etdiyi uğurlar haqqında millət vəkilləri “Bakı-Xəbər”ə danışdı.

Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev “Bakı-Xəbər”ə açıqlamasında qeyd etdi ki, Azərbaycanın neft-qaz sektoruna xarici şirkətlərin marağı artır. Çox böyük maliyyə qaynaqları olan şirkətlərin Azərbaycana maraq göstərməsi ölkədəki investisiya mühitinin cəlbedici olmasından xəbər verir. Bu həm də Azərbaycanda işgüzar mühitin normal olmasının göstəricisidir: “Böyük enerji şirkətlərinin Azərbaycana cəlb olunması, neft sektoruna sərmayə qoymaları enerji sektorunun inkişafına əlavə təkan verir və verəcək. O cümlədən, neft sənayesinin inkişafına müsbət təsir göstərir.

Məşhur enerji şirkətlərinin Azərbaycana sərmayə yatırması ölkəmizin beynəlxalq nüfuzunun yüksəlməsinə səbəb olub. Bəllidir ki, son 15 ildə böyük şirkətlər Azərbaycana yatırım etməyə maraq göstərirlər. Onların ölkəmizə sərmayə yatırmasının əsas səbəblərindən biri xarici şirkətlərin Azərbaycana etibar etməsi ilə bağlıdır. Bu səbəbdən də böyük şirkətlər ölkəmizə etibarlı tərəfdaş kimi baxdığı üçün, həvəslə Azərbaycana investisiya yatırırlar. Böyük xarici şirkətlər bilirlər ki, Azərbaycan hansı sözü verirsə, mütləq onu vaxtında həyata keçirəcək. Bu, Azərbaycan üçün böyük nailiyyətdir. İstənilən sahədə uğur qazanmaq istəyiriksə, mütləq güvənilən tərəf olmaq lazımdır. Siyasət, iqtisadiyyat və ya beynəlxalq sahədə etibarı qazanıb onu inkişaf etdirmək lazımdır”.

Millət vəkilinin sözlərinə görə, investisiya qüdrətini gücləndirən Azərbaycan, həmişəki kimi, əcnəbi sərmayədarlar üçün də cəlbedici ölkə olaraq qalır.

Yeni Azərbaycan Partiyası (YAP) Nizami rayon təşkilatının sədri, Milli Məclisin deputatı Sədaqət Vəliyeva qəzetimizə açıqlamasında qeyd etdi ki, 1993-cü ildə xalqın təkidli tələbi ilə hakimiyyətə gələn mərhum Prezident Heydər Əliyevin dünyanın böyük transmilli enerji şirkətlərini Azərbaycanın neft-qaz sektoruna sərmayə yatırmasına inandırmasından sonra ölkəmizdə yeni dövrün başlanğıcı oldu. 1994-cü ildə Britaniyanın, ABŞ-ın, Avropa ölkələrinin və digər dövlətlərin iri enerji şirkətləri ilə “Əsrin müqaviləsi”nin imzalanmasından sonra ölkəmizin iqtisadiyyatının lokomotivi hesab edilən neft-qaz sektorunda sıçrayışlı inkişaf dövrü başlandı: “Ötən müddət ərzində BP və başqa transmilli enerji şirkətləri Azərbaycanda səmərəli fəaliyyət göstərib, ölkə iqtisadiyyatına sərmayələr yatırıblar. Əlbəttə ki, böyük enerji şirkətlərinin Azərbaycana sərmayə yatırması ilk növbədə ölkəmizdəki siyasi sabitlik və təhlükəsizlik amili ilə bağlıdır. İkincisi, dünyanın aparıcı enerji şirkətləri ilə həm ulu öndər Heydər Əliyevin, həm də ümummilli liderimizin layiqli davamçısı Prezident İlham Əliyevin fəaliyyəti sayəsində Azərbaycan dövlətinin və xalqının milli maraqlarından çıxış edərək ölkəmizin perspektiv inkişafına hesablanmış səmərəli əməkdaşlıq əlaqələri qurulub. Heç kəs təsəvvür belə edə bilməzdi ki, zaman gələcək, Azərbaycan Avropa qitəsinin enerji təhlükəsizliyində əhəmiyyətli rol oynayacaq. Təsadüfi deyil ki, bu gün Azərbaycan BTC, BTƏ, TANAP, TAP kimi transmilli layihələrlə bir çox dövlətlərin və regionların qarşılıqlı səmərəli əməkdaşlığını təmin edir, eyni zamanda, təhlükəsizliyin də qorunmasına və möhkəmlənməsinə öz töhfəsini verir”.

Xanım millət vəkili onu da vurğuladı ki, Azərbaycan artıq dünyada böyük inam və etibar qazanmış tərəfdaş statusuna malikdir. Davosda Prezident İlham Əliyevlə onlarla şirkətin rəhbərlərinin görüş keçirməsi ölkəmizdəki sabitliyin, təhlükəsizliyin və sərmayə yatırmaq üçün münbit şəraitin olması ilə birbaşa bağlıdır: “Bu gün Azərbaycan iqtisadiyyatına təxminən 250 milyard dollar sərmayə yatırılıb. Düşünürəm ki, perspektivdə həm enerji, həm də digər sektorlarda Azərbaycana investisiya yatırmaq istəyən şirkətlərin sayı çox olacaq və bu rəqəm dəfələrlə artacaq”.

Günel CƏLİLOVA

Son xəbərlər