Rəsul Cahangirli: “Turizm sektorunda xidmət səviyyəsinin yaxşılaşdırılması ilə bağlı görüləsi bir sıra işlər var”
Azərbaycanda turizm sahəsi üçün müxtəlif tipli və dərəcəli 1000-dən çox otel lazımdır. Bunu mətbuata açıqlamasında Azərbaycan Turizm Assosiasiyası (AzTA) sədrinin müşaviri Müzəffər Ağakərimov bildirib.
O hesab edir ki, Azərbaycanın turizm sektoruna yeni bazarların yol açması üçün ölkədə yeni otellər inşa edilməlidir. Hazırda Azərbaycanda 575 otelin olduğunu deyən M.Ağakərimovun sözlərinə görə, bu göstərici ölkəmiz üçün həddindən artıq azdır: "Azərbaycana daha çox sayda turistlərin cəlb edilməsinin vacibliyi qeyd olunur. Lakin o da xüsusi qeyd edilməlidir ki, otellərin sayı çox azdır. Bakıda təxminən 155 otel var. Bu da çox aşağı göstəricidir. Azərbaycanda elə otellər var ki, cəmi 7-10 nömrəsi var”.
Qeyd edək ki, bu ilin yanvar-may ayları ərzində Azərbaycana 956 min nəfər turist gəlib. Ötən ilin müvafiq dövründə bu rəqəm 768 min nəfər olub. Azərbaycan son illər dünyada tanınır və ölkəmizə səyahət etmək istəyənlərin sayı ilbəil artır. Bunun da obyektiv səbəbləri var. Əvvəla Azərbaycanda gedən dinamik inkişaf ölkənin turizm məkanına çevrilməsinə geniş imkan yaradıb. Digər tərəfdən, turizmlə bağlı dövlət proqramları bu sahənin inkişafına əsaslı stimul verib. Müqayisə üçün qeyd edək ki, 2001-ci ildə Azərbaycana gələn əcnəbilərin sayı 500 minə yaxın idisə, 2013-cü ildə bu rəqəm 2 milyon 400 min olub. Bu müddətdə ölkədə turizm şirkətlərinin sayı 27-dən 238-ə, otellərin sayı 98-dən 514-ə çatıb. Ümumi yataq yerlərinin sayı 33 mindən çoxdur. Bu rəqəm sonrakı illərdə mütəmadi olaraq artmaqda davam edib.
Bütün bunlara rəğmən, artan turist axınını qarşılamaq üçün otellərin sayı artmalıdır. Maraqlıdır, bəs ekspertlərin bununla bağlı fikirləri nədən ibarətdir?
Məsələyə münasibət bildirən ekspert Rəsul Cahangirlinin sözlərinə görə, ölkədə qeyri-neft sektorunun inkişaf etdirilməsi qarşıya əsas məqsəd qoyulub: “Qeyri-neft sektorunun vacib sahələrindən biri də turuzmdir. Ölkədə turizmin inkişaf etdirilməsi ilə bağlı son illər bir sıra işlər həyata keçirilir. Ancaq görünən odur ki, bütün bu işləri yetərli saymaq olmaz. Ona görə ki, Azərbaycanda otellərin sayı gələn turistləri qarşılamaq gücündə deyil. Yəni, qeyd olunduğu kimi, sayları azdır. Bununla bağlı müxtəlif ulduzlu otellərin tikilməsinə ehtiyac var. Vacib deyil ki, tikilən otellərin hamısı beşulduzlu olsun. Elə yerlər var ki, orada kiçiktutumlu, üçulduzlu otellərin tikilməsinə ehtiyac var. Hər halda, nə qədər çox otel olsa, bir o qədər gələn turistlərin də sayı çoxalacaq və eyni zamanda turizm şirkətləri arasında rəqabət artacaq. Bu da, öz növbəsində, turistlərə göstərilən xidmət səviyyəsinin artmasına öz müsbət təsirini göstərəcək. Həmçinin, təklif olunan qiymətlərə təsir edəcək. Çünki bu gün bu sahədə mövcud olan əsas problemlərdən biri də qiymətlərin baha olması və xidmət səviyyəsinin arzuolunan səviyyədə olmamasıdır. Turizm sektorunda xidmət səviyyəsinin yaxşılaşdırılması ilə bağlı görüləsi bir sıra işlər var. Bütün bunlar kompleks şəkildə həll olunsa, o zaman turizm sektoru Azərbaycan iqtisadiyyatında önəmli yerə sahib olacaq”.
Vidadi ORDAHALLI
