Özü demişkən, qələmi öz söz silahı hesab edən, söz sənətini müqəddəs sayan, bu sənətin saflığı naminə daim yenilik duyğuları ilə yazıb-yaradan İdris Şükürlünün imzası dəyərli oxucular tərəfindən sevilə-sevilə qarşılanır. İndi o, 45 ildir halal sözün ən sadiq, ən etibarlı yolçusudur. Söz hər şeydən onun üçün doğma və əzizdir, odur ki, bütün eşqini, məhəbbəti ona vermişdir. Fikrə sözdən pak, gözəl libas biçməklə onu insanın mənəvi dünyasına, Vətənin, torpağın taleyinə istiqamətlənməyi bacarır.
Yazıçı-publisist, Əməkdar jurnalist İ.Şükürlü zəhmətkeş, istedadlı qələm əhli kimi öz sənət dünyasında yaxşı iz qoymuşdur. Hazırda Lerik rayonunda çıxan “ Lerik” qəzetinin redaktorudur. Bu səmimi, mehriban adam sənət yolunu ləyaqətlə, vicdanla gedir. Saf əməlli nəcib arzulu insanların istək və arzularına tapınaraq elə onların səadəti naminə yorulmaq nə olduğunu bilmədən yazıb-yaradır.
Söz sərrafı, publisist, nasir İdris Şükürlü 14 kitabın müəllifidir. Ciddi axtarışların, yuxusuz gecələrin, ağır zəhmətin bəhrəsi olan bu kitabların dördü Qarabağ müharibəsində erməni vəhşiliyi barədə söz açır, öz torpağında məkrli, qaniçən düşmənə qarşı mübarizə aparan qeyrətli vətən övladların igidliyini vəsf edir. Onun bu kitablardan biri yaxın günlərdən nəfis tərtibatda işıq üzü görüb. Redaktoru biologiya üzrə fəlsəfə doktoru, Prezident təqaüdçü Musa Bədəlov olan kitab “ Bədənində dəfn etdilər ölümü” adlanır. Kitabda cəngavər libası əyninə geyib Vətənin azadlığı uğrunda düşmənə qan uddura-uddura şəhidlik zirvəsinə ucalan lerikli igidlərdən danışılır. Burada hər bir oçerk, məqalə, şer, xatirə Azərbaycan var olduqca canlı tarixə dönüb torpaq naminə can qoyub, mərdliklə son damla qanına qədər döyüşüb həlak olan şəhidlərin qısa, lakin çox dəyərli həyat yoluna zaman-zaman işıq salar.
Şəhidlik şərəf, ucalıq zirvəsidir. Günəş sönmədiyi kimi, Vətən uğrunda şəhid gedənlər də ölmürlər. Vətən sevgisindən boy verən müqəddəs ruhları haqqa boylanaraq göyün uzundan işıq tək sevgi nuru saçırlar. Onlar öz sevgisini bizə paylaşır ki, yer üzündən mərdlik, qeyrət, namus heç zaman ölməsin. Şəhidsiz qüdrətli, qürurlu vətən, torpaq, xalq yoxdur. Kitabda yer alan hər bir cümlə haqqın çağırışına vətənin harayıdır. Vətən öz igidlərinə indi daha çox güvənir...
Ölümü bədənində dəfn etməklə Vətəni yaşatmaq istəyən igidlərdən biri Talışxan Sadıqovdur. O, şəhidlik zirvəsinə ucalmaqla tarixdə yeni bir şərəfli səhifə açdı. İdris şükürlü “ Oğul verib, dərdə salan dünyadır” yazıda bu qəhrəmanlığı elə incə poetik boyalar ilə qələmə alıb ki, vətən yolunda ölümün özündə bir dahilik, əbədiyaşar sevgi görünür. Yazı belə tamamlanır:” İndi Talışxan əzizləri üçün bir xatirəyə, şəhidliyin əlçatmaz zirvəsinə, solmaz şöhrətə dönübdür. Lerikdə Şəhidlər Xatirə Kompleksindəki mərmər lövhədən boylanır işığa doğru. Gənclərə qorxmazlıq, cavanlara hünər dərsi verir, o!
...Bu torpaqda Allahın sevdiyi bir gənc uyuyur. Vətənə atılan güllələri köksündə dəfn edib Talışxan. O, Talış xanı olmasa da, adı xanlardan, şahlardan ucadır, doğmadır bizə.”
“Bədənində dəfn etdilər ölümü” kitabında gedən yazılarda yazıçının ürək ağrıları çiçək ömrü ürəklərdə qönçələnən, igidliyi ilə torpağa qeyrət toxumu səpən cəsarətə səmimi məhəbbət duyğularda səngiyir. “Namaz Muradov zirvə qartalı idi”, “Ürəklərdə yerin var”, “Qoru vətəni”, “ Əlvida demədi bu xoş həyata“, Şəhid oğulları Vətən yaşadır”, “Obamın cəsur balası, Lerikin qeyrət qalası!”, “O məsum baxışlar”, “Sinəsi dağlı lalə”, “Baş leytenant İlqar Həmidovun taleyi” və başqa yazıları ürəyə nüfuz etməklə adamı hər an vətənin taleyi naminə qəhrəmanlıq döyüşünə səsləyir. Oxucuda inam yaranır ki, igidi çox olan ölkənin torpağı heç zaman yad əlində qalmaz.
Bəli, buğun vətənin belə vətənpərvər mövzuda yazılan kitablara ehtiyacı vardır. Çünki hər bir şəhidin ömür yolu bir tarixdir. İ Şükürlü Vətən sevgisini, vətənpərvərliyini xalq yolunda təmənnasız xidmətə çevirməklə belə bir müqəddəs işi şərəflə görür və el-oba qarşısında bunu mənəvi borc hesab edir.
Onu da deyim ki, “ Bədənində dəfn etdilər ölümü” kitabın nəfis çapında bütün varlığı ilə öz xalqına, vətəninə bağlı olan, xeyirxah insan, Azərbaycanın ləyaqətli oğlu Fəxrəddin Mirzəyevin əməyi də olmuşdur.
Zəfər ORUCOĞLU Azərbaycan Jurnalistlər Birliyinin üzvü, “Qızıl qələm “ mükafatçısı( Lerik).
