Məlahət Mürşüdlü: “Biologiya dərsliyində də səhvlərin olmasını danmaq olmaz”
2017-2018-ci tədris ilinin başlamasına az müddət qalıb. Ancaq məktəb dərsliklərindəki problemlərlə bağlı iddialar bitmir. Bir qrup müəllim yeni tədris ilinə hazırlanan biologiya dərsliklərində çoxlu sayda səhv olduğundan şikayət edir.
Əməkdar müəllim Almaz Həsrət Azərbaycan Respublikasının Birinci vitse-prezidenti Mehriban Əliyevaya açıq məktubla müraciət edib. O bu müraciətində dərsliklərdə səhvlərin olduğunu qeyd edib.
A.Həsrət media nümayəndələrinə açıqlamasında bildirib ki, kurrikulumun tətbiqinə başlandıqdan sonra hazırlanan dərsliklərdə çoxlu sayda qüsur aşkarlayıblar: “Artıq neçə ildir ki, biologiya dərsliklərində elmi, şəkil, redaktə və s. kimi səhvlər ortaya çıxarırıq. Bu, dərsliklərin hazırlanması işinin zəif təşkilini və dərslikləri yazan müəlliflərin səriştəsiz olmasını göstərir.
Təəssüf doğuran məqam odur ki, səhvlərlə dolu bu dərsliklər Təhsil Nazirliyi tərəfindən təyin edilmiş ekspertlər tərəfindən analiz edilir, qalib elan olunur və çapa verilir. Həmin dərsliklərin orta məktəblərə paylanmasının qarşısı alınmalıdır. Yeni tədris ili üçün həm rus, həm də Azərbaycan bölməsi üzrə hazırlanmış biologiya dərsliklərinin məktəblərə çatdırılmasının qarşısı alınmalıdır və onlar yenidən işlənməlidir. Məsələn, bu il qalib elan edilən X sinif biologiya dərsliyi 120 səhifəlikdir və 30 səhifəlik səhv aşkar etmişik.
Hətta şagirdlər özləri dərslikdə olan səhvləri tapıb müəllimə deyir. Bu, utancverici bir haldır. Maraqlısı odur ki, səhv dolu kitab niyə qalib elan edilir?!”.
Həmçinin, A.Həsrət Azərbaycan dərsliklərini mötəbər tədbirlərə apara bilmədiklərindən narazılıq edir: “Utanırıq, çünki bizim dərsliklər ələ gələsi deyil. Düşünürəm ki, dərsliklərlə bağlı fərqli qurum yaradılmalıdır. Mərkəzdə sırf mütəxəssislər toplanmalıdır. Məncə, dərslik yazan müəllif heyəti dəyişməlidir. Müəllif heyətinin tərkibində alim, dilçi olmalıdır. Sırf ixtisasını bilən, kurrikulumu mənimsəmiş mütəxəssis olmalıdır. Yaş səviyyəsini nəzərə alıb dərslik hazırlamaq üçün psixoloq da bu işə cəlb edilməlidir. Bunlar nəzərə alınmazsa, təbii ki, səhv dolu olacaq.
İllərlə səhv kitablar yazan şəxslər bu işdən uzaqlaşdırılmalıdır. Onlar heyətdə qalsalar, yenə dərsliklərdə səhvlər ortaya çıxacaq. Bütün qüsurlu dərsliklərin qarşısı alınmalıdır. Dərslik siyasətinə, hazırlanması prosesinə yenidən baxılmalıdır. Ondan sonra uğurlu dərsliyin əldə edilməsinə nail olarıq”.
Məktəb dərsliklərində, xüsusən də biologiya dərsliyində səhvlər barədə fikir bildirən təhsil eksperti Məlahət Mürşüdlü “Bakı-Xəbər”ə açıqlamasında qeyd etdi ki, dəqiq elmlərə aid dərsliklərdə səhvin qeydə alınması xoş deyil: “Çünki bu tip dərsliklərin mövzusu bəllidir. Onu da qeyd edim ki, son zamanlar riyaziyyat, kimya, fizika, biologiya fənlərinə aid dərsliklər rus və ingilis dili dərsliklərindən tərcümə olunur. Səhvlər əsasən tərcümə zamanı baş verir. Həmçinin, dərs vəsaitlərində qeydə alınan səhvlərin səbəblərindən biri də lazımi qaydada redaktənin olmamasıdır. Kitabların elmi şəkildə redaktə olunmaması problemlərin yaranmasına səbəb olur. Biologiya dərsliyində də səhvlərin olmasını danmaq olmaz. Haqqında danışdığımız dərslikdə terminlərin düzgün yazılmamasına rast gəlmək olur. Bu kimi səhvlər qabarıq şəkildə özünü biologiya fənni kitabında göstərib. Həmçinin, dərsliklərdə məsələ və misalların tərtibatında belə səhvlər aşkar olunur”.
Günel CƏLİLOVA
