Məlahət Mürşüdlü: “20 Yanvar faciəsi, Qarabağ müharibəsi, işğal olunan torpaqlar haqqında məlumatlı olmaq üçün universitet təhsilinə ehtiyac yoxdur”
Məlum olduğu kimi, 40 minə yaxın namizəd müəllim işə qəbul məqsədilə test mərhəsində iştirak edib. Namizədlərdən 30 minə yaxını müvafiq keçid balını toplayaraq uğur qazanıb. İlk mərhələdə 36 baldan yuxarı nəticə göstərənlər test imtahanından keçmiş hesab olunub. Onların sayı da təxminən 30 minə yaxındır. Onlar növbəti mərhələyə-ixtisas seçimi, müsahibə mərhələlərinə buraxılıblar.
Maraqlı məqam ondan ibarətdir ki, müsahibə formasına keçən namizədlər arasında bəziləri sadə və primitiv sualları cavablandıra bilməyiblər.
Təhsil Nazirliyinin sektor müdiri, komissiya üzvlərindən biri Rasim Məmmədov media nümayəndələrinə açıqlamasında bildirib ki, namizədlərdən bəzilərinin nəzəri biliyi ilə praktik bacarığı uyğun gəlmir: “Ola bilər ki, şablon suallara cavabları əzbərləyib gəlir, müsahibədə fikrini ifadə edə bilmir. Ən dəhşətlisi isə odur ki, Azərbaycanın müstəqillik tarixinə qarşı biganə namizədlərə rast gəldik. Məsələn, 20 Yanvar faciəsindən xəbərsizdirlər. 6-7 namizəd hesab edirdi ki, bu hadisələri ermənilər işğal məqsədilə törədib”.
R.Məmmədovun sözlərinə görə, bir neçə gün ərzində bayrağın rənglərinin mənasını bilməyən, işğal altında olan ərazilərin sayından bixəbər olan kifayət qədər namizəd qeydə alınıb.
Məsələ barədə fikir bildirən təhsil eksperti, Azad Müəllimlər Birliyinin sədri Məlahət Mürşüdlü “Bakı-Xəbər”ə açıqlamasında dedi ki, üçrəngli bayrağın mənasını bilməmək, işğal olunan rayonları tanımamaq istənilən Azərbaycan vətəndaşı üçün utancvericidir: “Bu şəxslərin necə ali məktəbi bitirməsi maraqlıdır. 20 Yanvar faciəsindən xəbərsiz olana universitet diplomu necə verilib? Zənnimcə, bu tip insanlar müəllimlik diplomunu müəyyən neqativ hallarla əldə ediblər. Həmçinin, o şəxslərin primitiv sualları cavablandıra bilməməsi onların öz üzərində işləməməsi ilə bağlıdır. 20 Yanvar faciəsi, Qarabağ müharibəsi, işğal olunan torpaqlar haqqında məlumatlı olmaq üçün universitet təhsilinə ehtiyac yoxdur. Bu məsələləri bilməmək nəinki müəllimliyə, vətəndaşlığa da layiq olmayan haldır. Sadə sualları bilməyən şəxslərə ictimai qınaq lazımdır. Fikirləşirəm ki, o şəxslərin müəllimlik hüququ əlindən alınmalıdır”.
Günel CƏLİLOVA
