Məhərrəm Zülfüqarlı: “Bu da, nəticə etibarilə, həmin uşaqların qəbul imtahanlarında aşağı bal toplamasına gətirib çıxarır”
Bu il ali məktəblərə qəbul imtahanlarında 500 baldan yuxarı nəticə göstərənlərin sayı 300 nəfər (13%) artıb.
Dövlət İmtahan Mərkəzinin Direktorlar Şurasının sədri Məleykə Abbaszadə mətbuata açıqlamasında bildirib ki, qəbul imtahanlarında 500-dən yuxarı nəticə göstərənlərin sayı 12,97 % olub, ötən il isə bu rəqəm 12,6 % təşkil edib.
M, Abbaszadə deyib ki, 0-100 bal arası nəticə göstərənlərin arasında da müəyyən fərq müşahidə olunub. Onun açıqlamasından belə məlum olub ki, 0-100 arası bal toplayanların sayı artıb: “Belə ki, ötən il 0-100 bal arası nəticə göstərənlərin sayı 11 030 nəfər idisə, bu il 11 999 nəfər belə nəticə göstərib. Bu il ali məktəblərə qəbul imtahanlarının 2 dəfə keçirilməsi bizə zəmin verirdi ki, nəticələrin ümumi tendensiyasında yaxşılaşma olacaq. Çünki birinci imtahandan sonra çox aşağı nəticə göstərənlər ikinci imtahana yazılmadılar. Yaxşı, hətta əla nəticə göstərənlər isə öz zəif və güclü nəticələrini görüb ikinci imtahana daha hazırlıqlı gələrək daha yaxşı bilik nümayiş etdirdilər. İmtahanların nəticələrinə əsasən deyə bilərik ki, I qrupda orta bal 2,6 bal (1,15%) artıb. II qrupda abituriyentlərin sayı azalıb və orta bal 11 bal (-4,16%) aşağı düşüb. III qrupda abituriyentlərin sayı 797 nəfər artıb və orta bal 6,67 bal (0,01%) artıb. V qrupda da ötən illə bu ilin arasında 12 bal (3.74) artım var. Ümumi bütün qruplar üzrə nəticələri götürsək, görürük ki, orta bal -1 bal (0,4%) aşağı düşüb. Ümumilikdə nəticələr onu deməyə əsas verir ki, bu il bakalavr pilləsində imtahan verən məzunların nəticələri ötən illə təxminən eyni səviyyədədir”.
Maraqlıdır, ekspertlər bütün bunları necə dəyərləndirir? Aşağı bal toplayanların sayı niyə artıb?
Məsələyə münasibət bildirən təhsil məsələləri üzrə ekspert Məhərrəm Zülfüqarlı bunun səbəbini müxtəlif amillərlə, əsasən də sosial faktorlarla əlaqələndirdi: “Bu təkcə təhsilin vəziyyəti ilə bağlı olan məsələ deyil. Sosial məsələlər də burada bu və ya digər dərəcədə rol oynayır. Məsələ ondadır ki, ailədə iqtisadi vəziyyət çətindirsə, bu, uşağın təhsilinə öz təsirin göstərir. Bəzi uşaqlar təhsil almaqdan çox çalışır çörəkpulu qazansınlar. Bu da, nəticə etibarilə, həmin uşaqların qəbul imtahanlarında aşağı bal toplamasına gətirib çıxarır. Ona görə də təhsilin keyfiyyətini qaldırmaq üçün ailələrin sosial vəziyyətini daha da yaxşılaşdırmaq lazımdır. Digər tərəfdən isə, təhsilə marağı daha da artırmaq lazımdır. Elə etmək lazımdır ki, ali təhsil almaq istəyənlərin sayı daha da çoxalsın. Ən başlıcası isə, orta məktəblərdə təhsil alan şagirdlər keyfiyyətə önəm versinlər. Yəni biliklərə dərindən yiyələnsinlər. Bunu təmin etmək üçün kompleks tədbirlər görülməlidir. Belə olan halda, qəbul imtahanlarında aşağı bal toplayanların sayı azalacaq”.
Vidadi ORDAHALLI
