Müşfiqabad qəsəbəsinin sakini Əsgərov Kamal Musa oğlu bu barədə redaksiyamıza göndərdiyi məktubda yazır.
Sakin yazır: "2013-cü ildən məcburi köçkünlərin istifadəsinə verilən şəhərcikdə, demək olar ki, hər tərəf dövlət tərəfindən əkilmiş ağaclarla və bəzək kolları ilə göz oxşayırdı. Üzərindən bir il keçmədi ki, bütün əkilən ağac və bəzək kolları baxımsızlıqdan quruyub məhv oldu. Qəsəbə sakinləri elə həmin ildə qəsəbə üzrə “JEK” rəisinə ağaclara biganə yanaşmasına görə öz iradlarıni bildirmişdilər. O isə cavab olaraq demişdi ki, işçi qüvvəm yoxdu, mənə kömək edin,yeni ağaclar əkin və qəsəbənin yaşıllıqlarını yenidən bərpa edək. Hamımızın bildiyi kimi, qəsəbə sakinləri rayon adamları olduğu üçün əkib-becərmək onların ən sevimli işidir. Elə həmin ildən, yəni 2014-cü ildən bu günə qədər qəsəbənin hər yerində sakinlər tərəfindən müxtəlif növ ağaclar əkilib. İndi isə həmin ərazidə yaşıllıqları məhv edib, yerində obyekt tikilməsinə icazə vermək sizcə nə dərəcədə doğrudur? Artıq üç aydır ki, qəsəbənin mərkəzi dairəsi adlanan ərazinin sol tərəfində 60-a yaxın müxtəlif növ ağac Ağdam rayon sakini Faiq Rüstəmov adlı sahibkar tərəfindən məhv edilir. Sahibkar iddia edərək bildirir ki, sözügedən yaşıllıq ərazi Qaçqınlar və Məcburi Köçkünlər üzrə Dövlət Komitəsinin Mənzil-Kommunal Departamentinin direktoru Akif Mirzəyev tərəfindən ona obyekt tikintisi üçün verilib. Təbii ki, bu qanunsuzluq qəsəbədə böyük mübahisələrə səbəb olub. Maraqlısı budur ki,sənədi verən dövlət orqanı qəsəbə üzrə səlahiyyətli nümayəndəsinə göstəriş verir ki, necə edirsən et, sahibkar Faiq Rüstəmovun həmin yaşıllıq ərazidə obyekt tikməsinə şərait yarat. Artıq sözügedən ərazinin orta hissəsindən iki böyük və bahalı ağacı heç bir əsas olmadan çıxarıb baxımsız bir əraziyə əkməyə müvəffəq olan “JEK” rəisi Qabil Quliyev bununla öz məqsədinə bir pillə də olsa yaınlaşa bilib. Mən - Əsgərov Kamal həm qəsəbə sakini olaraq, həm də ağacların şəkildə gördüyünüz qədər ərsəyə gəlməsində ən böyük zəhməti olan, maddi və mənəvi əziyyət çəkənlərdən birincisi olaraq bu qanunsuzluq barədə üç aydır ki, bütün rəsmi orqanlara sakinlər və öz adımdan müraciət etmişəm. Lakin buna baxmayaraq, heç birindən cavab almamışam. Aidiyyəti qurumların bu qanunsuzluğa biganə yanaşmaları isə məndə şübhə yaradır ki, görəsən bu işin icra olunması üçün hansı məmurun və yaxud məmur övladının göstərişi var? Bu qanunsuz işlə bağlı iki dəfə TV cəkilişlər olub və bir necə xəbər saytında yazılar gedib, lakin bugünə qədər heç bir rəsmi orqan nümayəndəsi məsələ ilə bağlı qəsəbəyə gəlməyib və məsələ ilə maraqlanmayıb. Biz sakinlər cox istərdik ki, bu müraciətimizi “Bakı Xəbər” qəzetinin köməyilə Ölkə Prezidenti cənab İlham Əliyevin diqqətinə çatdıraq. Biz bilirik ki, bu cür qanunsuzluqları Prezidentimiz heç zaman bağışlamır və dərhal müvafiq tədbir görülməsinə göstəriş verir. Ümidimiz onadır”.
Redaksiyadan: Göründüyü kimi, qəsəbə sakinləri gözlədikləri təhlükənin qarşısını almaq üçün qələmə əl atıblar. Daha doğrusu, xəbərdarlıq ediblər. Əminik ki, yazılanların nə qədər doğru-yalan olduğunu aydınlaşdırmaq üçün adıcəkilən şəxslər mütləq bu çağırışa reaksiya verəcək və ağacların kəsilmə təhlükəci həqiqətən realdırsa, bunun qarşısını almağa kömək edəcəklər.
Namiq QULİYEV
