Azər Həsrət: "Amma bu, ümumi ictimai rəy demək deyil"
"Televiziya verilişlərinin reytinqini ölçən təşkilatların fəaliyyəti qeyri-şəffafdır". Bunu Milli Televiziya və Radio Şurasının (MTRŞ) sədri Nuşirəvan Məhərrəmli media nümayəndələrinə açıqlamasında deyib.
O qeyd edib ki, telekanalların reklam probleminin həlli ölkədəki iqtisadi inkişafla bağlı məsələdir: "Ancaq bizim də üzərində çalışdığımız müəyyən layihələr var. Reytinq ölçən təşkilatların fəaliyyətindəki qeyri-şəffaflıq, qeyri-sağlam münasibətlər bizi narahat edir. Çünki həmin reytinq ölçən təşkilatlar daha çox şou-bizneslə bağlı verilişlərə üstünlük verir, daim onları reytinqli göstərirlər. Bu ölçmənin kim tərəfindən, hansı təbəqə arasında aparılması da sual altındadır. Axı onların işi necə apardıqlarını heç kəs bilmir. Adi bir otaqda oturmaqla özləri də bu məlumatları çox asanlıqla verə bilərlər. Heç kəs onları yoxlamır, fəaliyyətlərinə nəzarət etmir, hansı insanlar arasında sorğuların keçirildiyi bilinmir.
Ümumiyyətlə, bu cür təşkilatlar yalnız bizdə deyil, başqa ölkələrdə də böyük problemlər yaradıblar. Ona görə də tez-tez həmin təşkilatları dəyişirlər. Biz də çalışacağıq ki, bu sahədə müsbət istiqamətdə müəyyən dəyişikliklər olsun".
Televiziya verilişlərinin reytinqini ölçən təşkilatların fəaliyyəti ilə bağlı fikir bildirən media eksperti Azər Həsrət "Bakı-Xəbər"ə açıqlamasında qeyd etdi ki, reytinq təşkilatları televiziya qurğuları olan evlər və ya iş yerlərinə xüsusi cihaz yerləşdirirlər: "Həmin cihaz hansı kanala baxılmasını qeydə alır. Məsələn, televiziyaya baxan şəxs 1 saat ərzində A kanalına baxır. Bütün məlumatlar vahid mərkəzdə toplanır. Ayın sonunda isə reytinq cədvəli tərtib olunur, konkret verilişlər üzrə reytinq televiziya kanalına təqdim olunur. Reytinq təşkilatları həmin cədvəli ictimailəşdirmirlər. Onlar müqavilə bağladıqları televiziya kanalına siyahını təqdim edirlər. Televiziya kanalları da həmin reytinq cədvəlinə əsaslanaraq, özlərinin hansı verilişlərinin daha məşhur olmasını əsas götürərək reklam verən təşkilatlara müraciət edirlər. Müraciətin də əsas forması belə olur ki, bizim kanalda yayımlanan hansısa veriliş digər kanallarda eyni saatda yayımlanan proqramdan daha baxımlıdır. Nəticəni nəzərə alan reklam şirkətləri reytinqi yüksək olan verilişə reklam verirlər. Amma bu, ümumi ictimai rəy demək deyil. Nəzərə almaq lazımdır ki, ölkə əhalisinin sayı 10 milyondur. 10 milyon əhalinin 2-3 milyondan artıq televiziya qurğusu varsa, düşünmürəm ki, həmin cihazların hamısında nəzarət həyata keçirilir".
Günel CƏLİLOVA
