Azərbaycanda bütün kateqoriyalı torpaqların elektron uçotu, xəritələşməsi və məlumat bankının yaradılması istiqamətində işlər aparılır. Trend-in məlumatına görə, bunu "Əmlak Məsələləri Dövlət Komitəsinin torpaq münasibətlərinin tənzimlənməsi və torpaq bazarının təşkilində aidiyyəti dövlət qurumları və bələdiyyələrlə fəaliyyətinin kordinasiyası” mövzusunda keçirilən işgüzar forumda Əmlak Məsələləri Dövlət Komitəsinin sədr müavini Rafiq Cəlilov deyib.
Onun sözlərinə görə, torpaqların elektron informasiya sisteminin yaradılması ilə bağlı hazırda beynəlxalq təcrübə öyrənilir. O, qeyd etdi ki, artıq sözügedən prosesə beynəlxalq ekspertlər cəlb olunub:
"Bu sistemin tətbiqi Azərbaycan üçün çox yararlıdır. Yəni bu addımın atılması işləri daha rahatlaşdıracaq və sistemli şəkilə salacaq. Ölkə üzrə torpaqların bir mərkəzdən idarə edilməsi, mühafizəsi, istifadəsi üzrə kompleks tədbirləri həyata keçirməyə imkan yaradacaq. Hesab edirəm ki, mülkiyyət hüquqlarının tənzimlənməsində vahid mərkəzdən idarəçilik qeydiyyat üçün tələb olunan sənədləşmə prosesində rahatlığın, operativliyin və şəffaflığın kifayət qədər artmasına gətirib çıxaracaq”.
Vahid mərkəzdən idarə olunacaq torpaq münasibətlərinin tənzimlənməsi və idarəçiliyində innovativ üsullardan danışan R. Cəlilov bildirdi ki, bütün bunlarla yanaşı, həmçinin yeni mexanizmlərin tətbiqi nəzərdə tutulur: "Torpaqlardan istifadə və onların mühafizəsində dövlət nəzarətində müasir yanaşmalar və yeni mexanizmlərin tətbiqi istiqamətində tədbirlər görülür. Artıq komitə tərəfindən torpaqların istifadəsi, mühafizəsi və qorunmasına dövlət nəzarətinin təmin edilməsi və torpaq bazarının təşkili istiqamətində ciddi tədbirlərə start verilib”.
Rafiq Cəlilov deyib ki torpaq müfəttişlərinin apardığı reydlər nəticəsində 2132 qanunvericiliyin pozulması halı aşkar edilib. Onun sözlərinə görə, Azərbaycan prezidenti İlham Əliyevin fərmanına əsasən torpaq idarəçiliyi ilə əlaqədar bir sıra yeni vəzifə və funksiyalar müəyyən edilib.
R.Cəlilov qeyd etdi ki, komitənin yeni funksiyalarının icrasında əsas məqsəd səmərəliliyin və effektivliyin artırılmasıdır: "Yeni funksiyalara əsasən yerli icra hakimiyyətləri, fiziki və hüquqi şəxslər, bələdiyyələr və aidiyyəti dövlət orqanları ilə daha sıx əməkdaşlıq etməyi planlaşdırırıq. Belə forumların keçirilməsi isə koordinasiya işlərinin daha sıx həyata keçirilməsinə imkan yaradır”.
Dövlət torpaqlarının mühafizəsi, təyinatı üzrə istifadəsi, əsassız istifadə hallarının müəyyən edilməsi və qarşısının alınması ilə bağlı qurumun monitorinq və reydlər keçirdiyini deyən sədr müavini qeyd etdi ki, bu cür tədbirlər mütəmadi keçirilir:
"Belə tədbirlər Bakı şəhəri və Respublikanın digər regionlarında mütəmadi qaydada aparılır və aşkar edilən qanun pozuntularına qarşı qanunvericiliyə uyğun olaraq tədbirləri həyata keçirirlər. Ppozuntularla əlaqədar torpaq və inzibati xətalar barədə qanunvericiliyə əsasən inzibati cərimələr və sanksiyalar tətbiq edilir. Bununla əlaqədar müfəttişlər tərəfindən bu günədək 54 hal üzrə İzibati protokol tərtib edilib, bundan 35 hal üzrə 65608 manat cərimə olunması barədə qərar qəbul olunub”.
