Elmin Nuri: “Ali təhsil haqqında” qanun artıq qəbul olunmalı idi, çünki bu qanuna ehtiyac var”
“Ali təhsil haqqında” qanun layihəsi Milli Məclis tərəfindən hazırlanıb və bir neçə dəfə iclaslarda müzakirəyə çıxarılıb. Ancaq hələ də qəbulu yubanır. Parlamentin payız sessiyasında bu qanunun qəbulunun prioritet məsələlərdən biri olması gözlənilir. Məlumat üçün qeyd edək ki, layihə Milli Məclisin Elm və təhsil komitəsinin 2024-cü il yaz sessiyasının qanunvericilik işləri planına da daxil edilib. Lakin layihənin müzakirəyə çıxarılması alınmayıb. Layihə işçi qrupun iştirakı ilə parlamentin Elm və təhsil komitəsində dəfələrlə müzakirə edilsə də, plenar iclasda müzakirəsi gerçəkləşməyib.
Qeyd edək ki, ölkəmizdə "Təhsil haqqında” qanun qəbul olunub. İndi isə ayrıca "Ali təhsil haqqında” qanun layihəsinin qəbulu planlaşdırılır.
Qeyd edək ki, müvafiq qurumların, universitetlərin, təşkilatların da rəyləri alınıb. Bunun üçün Milli Məclisdə ictimai dinləmə də keçirilib. Deputatlar qanun qəbulunun gecikməsində məsuliyyəti aidiyyəti qurumların üzərinə atır. Onlar hesab edir ki, Milli Məclis üzərinə düşən işləri görüb və yerinə yetirib. Digər qurumlar sənədə baxıb, rəylərini verib, prosesi tezləşdirməlidir.
Maraqlıdır, "Ali təhsil haqqında” qanun layihəsinin hələ də qəbul edilməməsinin səbəbi nədir?
“Ali təhsillə bağlı istənilən detalın araşdırılması, həlli vaxt tələb edir, bu səbəbdən adıçəkilən qanun layihəsinin qəbulu gecikir”
Sosial Tədqiqatlar Mərkəzinin əməkdaşı, təhsil eksperti Elmin Nuri “Bakı-Xəbər”ə şərhində bildirdi ki, "Ali təhsil haqqında” qanun layihəsi artıq bir neçə ildir ki, Milli Məclisin plenar, komitə iclaslarında müzakirə olunur: “Hətta telekanallarda, yazılı mediada belə millət vəkilləri və təhsil ekspertlərinin iştirakı ilə adıçəkilən qanun layihəsi haqqında danışılır, fikir mübadiləsi aparılır. Bu müddət ərzində qanun layihəsinə hansı əlavələrin daxil olması, niyə gecikməsi dəfələrlə müzakirə edilib. “Ali Təhsil Haqqında” qanuna distant təhsillə bağlı əlavələrin edilməsi hər kəs tərəfindən səbrlizliklə gözlənilməkdədir. Nəzərə almaq lazımdır ki, ali təhsillə bağlı istənilən detalın araşdırılması, həlli vaxt tələb edir, bu səbəbdən adıçəkilən qanun layihəsinin qəbulu gecikir. Buna baxmayaraq, "Ali təhsil haqqında” qanun artıq qəbul olunmalı idi. Çünki bu qanuna ehtiyac var. "Ali təhsil haqqında” qanunda dünya təhsilinə cavab verən mexanizmlərin yer alması arzuolunandır. Ümumiyyətlə, çox ciddi məsələlərlə bağlı qanun layihələrinin qəbulu qısa müddətdə olmur, əlavələr xüsusi müzakirə predmetinə çevrilir”.
Günel CƏLİLOVA
