Müasir dünyada insanlar ideal bədən sahibi olmaq barədə daha çox düşünür, buna nail olmağın ən asan üsullarını axtarırlar. Bu sualın yeganə düzgün cavabı idmanla məşğul olmaq olsa da, bəzən bədənlərini gücləndirmək və əzələlərini möhkəmləndirmək istəyənlər müxtəlif həblərdən, qida əlavələrindən də istifadə edirlər.
Halbuki, bu tip preparatların satışı qadağandır. Bu günlərdə sosial şəbəkədə steroidlərin qanunsuz satışı ilə bağlı elanlar geniş yayılıb. Bu elanların əsas hədəfi isə xüsusilə idmanla məşğul olan gənclərdir. Qeyd edək ki, bu dərmanların satışı gizli şəkildə həyata keçirilir, yalnız özlərinə aid kuryer vasitəsilə çatdırılır.
Pərvanə Mustafayeva: "Yeniyetmələr bundan istifadə etdikdə onların boyu dayanır, bir çox xəstəliklərin yaranması üçün orqanizmdə əlverişli şərait yaranır"
Həkim Pərvanə Mustafayeva "Bakı-Xəbər"ə şərhində bildirdi ki, əzələ şişirdən dərmanlara dopinq, anabolik-steroid də deyirlər: "Steroid əzələləri gücləndirir, üz tüklərinin artması və səsin qalınlaşmasına səbəb olur. Gənclər fiziki gücünü artırmaq üçün süni testosterondan istifadə edirlər. Bu cür dərmanlar yorulmanın qarşısını alır, insana enerji verir. Bunu qəbul edən ağır fiziki güc tətbiq etsə də yorulmur, özünü gümrah hiss edir. Bu səbəbdən də dərmanın keçici effketinə aldanıb qəbul edirlər. Yeniyetmə və gənclər bilməlidir ki, bu dərmanlardan istifadə kişilərdə sinənin böyüməsinə, yumurtalıqların sıradan çıxmasına, qadınlarda isə səsin qalınlaşmasına gətirib çıxara bilər. Dopinq tipli dərmanların qəbulu böyrəkdə problemlər də yarada bilər. İnsanın psixoloji durumuna da təsir edir. Bu cür dərmanları qəbul edənlər aqressiv olur, emosiyalarını, qəzəbini idarə edə bilmir. Eləcə də bədəni şişirdən preparatların uzunmüddətli qəbulu insanda səbəbsiz depressiyanın yaranması ilə də nəticələnə bilər. Yeniyetmələr bundan istifadə etdikdə onların boyu dayanır, bir çox xəstəliklərin yaranması üçün orqanizmdə əlverişli şərait yaranır".
Vüsal Cəfərov: "Peşəkar idman vasitəsilə dopinq steroidlərin istifadəsi qanuni məsuliyyət yaradır"
Hüquqşünas Vüsal Cəfərovun sözlərinə görə, steroidlərin tibbi müəssisələrdə istifadəsi qanunidir: "Yalnız müəyyən tibbi göstəriş əsasında mümkündür. Məlumat üçün deyim ki, peşəkar idman vasitəsilə dopinq steroidlərin istifadəsi qanuni məsuliyyət yaradır. Tərkibində anabolik olan dərmanlar resept əsasında satılmalıdır. Cinayət Məcəlləsinin 240-cı maddəsinə əsasən, bu maddələrin satışı cinayət məsuliyyəti sayılır və 3 ilədək həbs cəzası nəzərdə tutulur".
Günel CƏLİLOVA
