Azərbaycanda taksi fəaliyyətinin tənzimlənməsinə dair oktyabrın 1-də qüvvəyə minəcək qanunvericiliyin tələblərinin yerinə yetirilməsi məqsədilə Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyinin (AYNA) Təlim-Tədris Mərkəzində təlimlərin keçirilməsinə başlanılıb. Yeni qaydalara əsasən, sürücülərin xüsusi təlimlərdən keçmədən fəaliyyət göstərmələri yolverilməzdir.
“Avtomobil nəqliyyatı haqqında” Qanuna əsasən, taksi minik avtomobillərinin sürücüləri etik davranış və avtomobil nəqliyyatı ilə sərnişin daşımalarını tənzimləyən normativ-hüquqi aktlara dair xüsusi hazırlıq keçməlidirlər.
Tədris proqramına taksi fəaliyyətində tətbiq edilən müasir texnologiyalar və proqram təminatlarından istifadə, sürücünün iş və istirahət rejimi normalarına riayət olunması, sərnişindaşımada hərəkətin təhlükəsizliyinin təmin edilməsi və ilk tibbi yardımın göstərilməsi kimi mövzular daxil edilib. Proqramın yekununda imtahan təşkil edilir. Xüsusi hazırlığı müvəffəqiyyətlə bitirən sürücülərə şəhadətnamə təqdim olunur.
Maraqlıdır, bu addım fonunda taksi sistemində hökm sürən xaosa son qoyulacaqmı? Ümumiyyətlə, taksi sürücüləri üçün təlim nəticə verəcəkmi?
“Taksi şirkətlərinin qayda-qanunla çalışması üçün təlim vacib amildir”
Nəqliyyat sahəsi üzrə ekspert Aslan Əsədov “Bakı-Xəbər”ə açıqlamasında qeyd etdi ki, taksi sürücüləri ilə bağlı müəyyən proseslərin başladılmasını müsbət addımlardan biri kimi qiymətləndirilməlidir. Sürücülərin sertifkatlaşdırılma və maarifləndirmə prosesindən keçməsi çox yaxşı haldır: “Son zamanlar sosial şəbəkələrdə və telekanallarda yalnız sürücü-sərnişin münasibətlərinin normal olmadığı barəsində məlumatlar alırdıq. Hesab edirəm ki, görülən tədbirlər effektiv olacaq və xoşagəlməz halların qarşısı alınacaq. Taksi şirkətlərinin qayda-qanunla çalışması üçün təlim vacib amildir. Bəzi şirkətlərin qaynar xətti belə yoxdur. Qaynar xətləri olsa da, ölçü götürmə tədbirləri zəifdir. Yaxın müddət ərzində təlimlərin nəticəsi taksi sahəsinə yaxşı mənada təsir edəcək”.
Günel CƏLİLOVA
