Dövlət Maliyyə Nəzarəti Xidməti tərəfindən 2021-ci ildə aparılmış nəzarət tədbirlərinin nəticələri barədə rəsmi məlumatlar açıqlanıb. Məlum olub ki, bir sıra qurumlarda, rayonlarda yoxlama nəticələrinə görə 103,6 milyon manat məbləğində artıq və əsassız ödənişlərə yol verilməsi aşkar edilib.
Məsələn, Biləsuvar, Cəlilabad və Şəmkir rayon İcra hakimiyyətlərində yeyintilər aşkarlanıb. Mədəniyyət Nazirliyində aparılan nəzarət tədbirləri zamanı bir neçə müəssisə və təşkilata qabaqcadan ödənilmiş vəsaitlərin müqabilində material qiymətlilərinin alınmaması və xidmətlərin yerinə yetirilməsinə dair təsdiqedici sənədlərin olmaması müyyən edilib. Əmək və Əhalinin Sosial Müdafiəsi Nazirliyinin Mərkəzi Aparatında və onun tabeliyində olan 28 qurumda əlillərin, sağlamlıq imkanları məhdud uşaqların, müharibə veteranlarının və şəhid ailələrinin sanator-kurort müəssisələrinə göndərilməsi üçün köçürülmüş vəsaitin bir hissəsinin həmin müəssisələrin rəhbərləri tərəfindən Əmək və Əhalinin Sosial Müdafiəsi Nazirliyinin sabiq rəhbər işçilərinə qaytarılması, sosial obyektlərin və imtiyazlı şəxslərə fərdi yaşayış evlərinin tikintisində işlərin həcminin artırılması yolu ilə podratçı təşkilatlara artıq vəsaitin ödənilməsi müyyənləşdirilib. O cümlədən digər qurumlarda da bənzər yeyintilər aşkar olunub.
Ancaq burada diqqəti çəkən məqam odur ki, bir belə yeyintiyə görə 108 nəfər vəzifəli şəxsə töhmət verilib və 82 min manat məbləğində cərimələr tətbiq edilməklə dövlət büdcəsinə ödənilməsi təmin olunub. Çox qəribədir, 103 milyondan çox vəsait mənimsə, əvəzində töhmət və vur-tut 82 min manat cərimə ödə. Bu nə dərəcədə ədalətlidir?
“Cavabdeh olanlar məsuliyyətə cəlb edilməli və əmlakları qanuna uyğun olaraq müsadirə edilməlidir”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı alim, professor Əli Əlirzayev hesab edir ki, bir belə yeyintinin müqabilində verilən cəzaları yetərli hesab etmək olmaz: “Çünki böyük məbləğdə vəsaitlərin mənimsənilməsindən və təyinatı üzrə xərclənməməsindən söhbət gedir. Ortada ciddi hüquq pozmaları var. Hesab edirəm ki, ən optimal variant həmin vəsaitin geri qaytarılmasını təmin etməkdir. Yəni nöqsanlara yol verən tərəflər cərimələnsin. Yoxsa 103 milyon mənimsəmə müqabilində 82 min manat çəriməni yetərli saymaq olmaz. Mənimsənilən vəsait qaytarılmırsa, o zaman tələblər sərtləşdirilməlidir. Bu o deməkdir ki, mənimsəməyə görə cavabdeh olanlar məsuliyyətə cəlb edilməli və əmlakları qanuna uyğun olaraq müsadirə edilməlidir. Qanunvericilikdə bununla bağlı mexanizmlər aydın və işlək olmalıdır. Yəni yeyinti halları aşkar olunarkən çevik şəkildə müvafiq addımları atmaq mümkün olsun. Belə olarsa, o zaman məsul qurumlar daha məsuliyyətli olacaqlar”.
Professor onu da qeyd etdi ki, sözügedən məsələlərdə nəzarət tədbirləri gücləndirilməlidir.
Vidadi ORDAHALLI
