Son illər ölkəmizdə xəstəxanaların maddi-texniki bazası gücləndirilir, ölkəyə yeni tibbi texnologiyalar gətirilir, tibb müəssisələri təmir və bərpa edilir.
Bütün bunlar, təbii ki, səhiyyənin inkişafına hesablanan amillərdir. Amma bunlar problemi həll etməyə yetirmi? Təbii ki, xeyr. Müasir avadanlığı işlədə bilən yüksək hazırlıqlı kadr yoxdursa, o avadanlıq kimin nəyinə gərək? Yaxud da bölgələrimizdə təmir olunan, hər cür müasir texnologiya ilə təmin edilən xəstəxanalar kimin dərdinə əlac edəcək? Axı çoxunun içi boşdur. Savadlı kadrlar bölgələrdə işləməkdən imtina edirlər. Xüsusilə hazırda Tibb Universitetində təhsil alan tələbələrin böyük əksəriyyəti gələcək karyeralarını ya paytaxtdakı dövlət xəstəxanalarında, ya da özəl klinikalarda qurmağa üstünlük verirlər. Və ya tam əksinə, diplomu əlinə alar-almaz üz tuturlar xarici ölkələrə. Bəs rayonlar? Oradakılar xəstələnmirmi? Onlara həkim lazım deyilmi?
İcbari Tibbi Sığorta üzrə Dövlət Agentliyinin Strateji təhlil departamentinin rəhbəri Araz Nəsirov etiraf edib ki, Azərbaycan bölgələrində ixtisaslaşmış həkimlərin çatışmazlığı hələ də mövcuddur: “Ölkədə əsas multidisiplinar xəstəxanalar Bakıda yerləşdiyindən insanlar tibbi xidmət almaq üçün regionlardan Bakıya gəlirlər. Məqsədimiz odur ki, bölgələrdə də multidisiplinar xəstəxanalar yaradaq və regionlardan insanların Bakıya gəlməsinə ehtiyac qalmasın”.
“Tibb Universitetini pulsuz oxuyan tələbələr təyinatla rayonlara göndərilməli və ən azı 2 il orada işləməlidirlər”
Yaranmış vəziyyətlə bağlı fikir bildirən həkim Pərvanə Mustafayeva qeyd etdi ki, bölgələrdəki həkim çatışmazlığının və peşəkar kadr qıtlığı məsələsinin həll olunması yalnız bir sıra həvəsləndirici mexanizmlərin tətbiq olunması ilə mümkündür: “Tibb mütəxəssislərinin ölkədə sayının artırılması istiqamətində lazım olan işlər var, bunlar görülməlidir, bunların içərisində, əlbəttə ki, ən vacib şərtlərdən biri son illərdə, əfsuslar olsun ki, xoş olmasa da, beyin köçünün, xüsusən həkimlər arasında xaricə gedişlərin və yaxud xaricdə ixtisaslaşmış kadrların ölkəyə dönməsi ilə əlaqədar 2015-16-cı illərdən əvvəlki dönəmlə müqayisədə tam tərsinə azalmanın müşahidə olunması bir çox çətinliklərə səbəb olur”.
Həmsöhbətimiz onu da əlavə etdi ki, Tibb Universitetini pulsuz oxuyan tələbələr təyinatla rayonlara göndərilməli və ən azı 2 il orada işləməlidirlər: “Ən azı 2 il təyinat müddəti bitəndən sonra başqa yerə gedə bilər. Amma əlaçı tələbələr oxuyub qurtarır, yazıqlar heç iş tapa bilmirlər. Ona görə də bu sahədə rayonlarda, kənd və qəsəbələrdə həkim çatışmazlığı çoxdur. Əvvəllər bu təyinat var idi, sonradan ləğv olundu”.
Həkimin dediyinə görə, bölgələrdə həkimlərin qazanc imkanı Bakı ilə müqayisəolunmaz dərəcədə aşağıdır. Bakıda bir deyil, bir neçə yerdə işləmək imkanı var. Çünki həkimlər dövlət xəstəxanaları ilə yanaşı, özəl klinikalarda işləmək imkanına sahib olurlar. Kənd yerlərində isə belə imkan yoxdur və ona görə də gənc həkimlərin regionlara marağı azdır.
Günel CƏLİLOVA
