Sosial şəbəkələrdə digər istifadəçilərə təhqiredici şərh və ismarıclar yazanlar artıq cəzalandırıla bilər. Milli Məclisdə rəqəmsal aləmdə insanların hüquqlarının qorunması üçün xüsusi qanun layihəsi hazırlanır.
Milli Məclisin bəzi deputatlarının verdiyi məlumata görə, BMT-nin İnsan Hüquqları Komitəsinin yanaşmasında internet və kiber məkanda söz və fikir azadlığı olmalıdır. Bu halda insan hüquq və azadlıqları haqqında beynəlxalq paktın 19-cu maddəsinin ikinci bəndinə istinad olunur. Həmin bənddə göstərilir ki, insanlar adi həyatda öz fikirlərini, düşüncələrini sərbəst bölüşmək hüququna malikdirlərsə, virtual həyatda da həmin hüquqlara malik olmalıdırlar:
"Bu zaman həmin beynəlxalq paktın 9-cu maddəsinin üçüncü bəndinə də istinad etmək lazımdır. Biz öz davranışlarımıza, fikrilərimizə görə adi həyatda məsuliyyət daşıyırıqsa, virtualda yazdıqlarımıza görə də məsuliyyət daşımalıyıq. Şəxs internetdə öz ideyalarını, fikirlərini, baxışını paylaşırsa, bu heç bir halda başqa bir insanın hüquqlarının pozulması hesabına olmamalıdır.
Əgər başqa bir insanın hüquqlarını pozuruqsa, buna görə məsuliyyət daşıyırıq. Məsələn, kiberməkanda hüquqların qorunması vacib məsələdir. Bir müəllif öz hansısa əsərini internetdə paylaşırsa, digərləri onun müəlliflik hüquqlarını qorumadan, istinad etmədən istifadə edirsə, onun hüquqlarının qorunmasının hüquqi normativ əsasları olmalıdır. Dünyanın bir çox təşkilatlarında belə bir yanaşma var ki, bütün dünya dövlətləri üçün işlək olacaq normativ hüquqi baza olmalıdır. Bu da kiberməkanda insan hüquqlarının qorunmasına imkan versin. Bu zaman əsas iki istiqamət nəzərdə tutulur. Birincisi intenet məkanında insanın şərəf və ləyaqətinin alçaldan, peşəkar nüfuzuna xələl gətirən hallara görə məsuliyyət nəzərdə tutulsun. İkincisi isə kiberməkanda da dövlət, milli təhlükəsizliyə xələl gətirəcək məqamların qarşısı alınsın".
Media məsələləri üzrə ekspert Müşfiq Ələsgərli “Bakı-Xəbər”ə açıqlamasında bildirdi ki, yaşadığımız dövrün yeni media ilə bağlı tələbləri var: “Bu iki qoldan ibarətdir. Birincisi, ənənəvi medianın yeni tələblərə uyğunlaşmasıdır. İkincisi isə sosial mediadır. Yeni medianın birinci hissəsini tənzimləmək üçün qanun qəbul edildi, onun imzalanması gözlənilir. Yeni media qolunun sosial media hissəsi tənzimlənməmiş qalır. Sosial şəbəkələrdə daha çox qanun pozuntuları qeydə alınır. Bu da sözügedən sahə ilə bağlı hüquqi tənzimləmənin vacibliyini zəruri edir. Azərbaycanda 2013-cü ildən başlayaraq qanunvericiliyə bir sıra dəyişikliklər edilib. Bu da sosial şəbəkədəki kontentə görə tənzimləməni nəzərdə tutur. Təəssüf ki, bu məsələ tam həllini tapmayıb. Yaxşı olar ki, sosial medianın ümumi tənzimlənməsi üçün bir hüquqi baza mövcud olsun. Adından görünür ki, yeni qanun deyilən sahəni tam əhatə edə bilər. Layihə ilə tanış deyiləm. Gərək elə haIrlansın ki, hüquqların məhdudlaşmasına da imkan verilməsin. Əminəm ki, həmin layihə mütləq mənada ictimai müzakirəyə çıxarılacaq. Ümid edirik ki, normal bir qanunvericilik sənədi ortaya qoyulacaq. Belə bir qanunun qəbuluna çox böyük ehtiyac var. Çünki sosial şəbəkələrdə qanunazidd hərəkətlərin, paylaşımların çox olduğunu görürük. Hətata bəzən bu cür fəaliyyətlər dövlət üçün də ciddi təhdid risqi yaradır”.
Məhəmmədəli QƏRİBLİ
