Azərbaycanda anemiya diaqnozu qoyulan uşaqların sayı artır. Statistikaya görə, 0-13 yaşarası uşaqlar arasında qanazlığı müşahidə olunur. Ölkədə ötən il üçün ilk dəfə anemiyadan əziyyət çəkən 0-13 yaş arasında 21 986 nəfər dispanser qeydiyyatına alınıb. Bu göstərici 2020-ci illə müqayisədə artıb. Həmin ildə qeydiyyata alınanların sayı 19 662 nəfər olub.
Uşaqlarda qan azlığının nə səbəbdən artması barədə fikir bildirən həkim pediatr Mətanət Əliyeva qeyd etdi ki, problemin geniş yayılma səbəblərindən biri anemiya profilaktikasının uşaqlarda düzgün aparılmamasıdır: “4 ayından etibarən bütün uşaqların gündəlik qida rasionuna kiloqrama 2,5 milliqram hesabı ilə dəmir əlavə edilməlidir. Bu, uşaqlar üçün nəzərdə tutulmuş dəmir siropları şəklində olur. Bir-iki ay profilatik əlavədən sonra uşağın qanı ümumi analiz edilir. Hemoqlobin normal səviyyədədirsə, dəmir əlavəsi dayandırılır, aşağıdırsa, bir neçə ay da davam etdirilir. Bundan başqa, düzgün qidalanmama, dəmirlə zəngin qidaların uşağa vaxtlı-vaxtında verilməməsi, qurd xəstəliklərinin geniş yayılması və vaxtında müraciət edib problemi həll etməmək qan azlığına səbəb olur. Qurd xəstəlikləri ilə əlaqədar yaranan iştahsızlığa qan azlığı səbəbilə yaranmış iştahsızlıq da əlavə olunur. Belə uşaqlar qidalanmaqdan imtina edirlər və çəki itirirlər. Böyrək xəstəlikləri, dəmirin mənimsənilməsinin və sorulmasının pozulması da anemiyaya səbəb ola bilər. Mədə-bağırsaq sistemi ilə bağlı xəstəliklər zamanı qida ilə sutkalıq alınan dəmir normal mənimsənilmir. Bu səbəbdən də uzunmüddətli dəmir çatışmazlığı ilə bağlı anemiya formalaşır. Anemiyası olan uşaqların immuniteti aşağı olur, tez-tez xəstələnirlər, ürəkdöyünmə, oksigen çatışmazlığı olur, ağır anemiyalarda ürək çatışmazlığı kimi fəsadların yaranması da mümkündür. Anemiyası olan uşaqlarda patoloji iştah baş qaldırır. Bu, normalda yeyilməsi mümkün olmayan nələrəsə qarşı iştahdır. Torpaq, təbaşir yemə, ayaqqabı mazı, neft iyləmə kimi meyilləri olur. Müayinə zamanı belə uşaqlarda qaraciyər, dalağın böyüdüyünü görürük".
Günel CƏLİLOVA
