Gündəlik həyatımızın ayrılmaz hissəsinə çevrilən sosial şəbəkələr, xüsusən də “Facebook”, “İnstagram” və “WhatsApp” ən çox istifadə etdiyimiz resursdur. Bir sıra hallarda bu platformaların istifadəçiləri xoşagəlməz hallarla, arzuedilməz mesajlarla qarşılaşırlar.
Qeyd edək ki, son onilliklərdə bir sıra xarici dairələr demokratiya, tolerantlıq, multikulturalizm və s. kimi Qərb dəyərlərindən sui-istifadə etməklə müəyyən məqsədlərinə çatmağa çalışırlar. “İslam” adı altında gizlənən bir sıra dini cərəyanlardan əlavə, xristianlığın müxtəlif məzhəblərinə aid olduqlarını iddia edən, lakin əslində tamamilə başqa əqidəyə qulluq edən bir para gizli-açıq sektalar da sosial şəbəkələrdə mövcuddur. Bu cür sektaların təbliğatı ən çox Facebook sosial şəbəkəsində yayımlanır və azərbaycanlılar üçün nəzərdə tutulur. Təbliğat sırf azərbaycan dilində aparılır. Əsasən xristian dininə dəvət edən sektalar müxtəlif hədiyyələr təklif etmək, tədbirlər həyata keçirməklə insanları bu qruplara cəlb etməyə çalışırlar.
Maraqlıdır, bu cür reklam kampaniyaları sosial şəbəkələrdə necə yayımlanır və belə hallara qarşı hansı nəzarət mexanizmi var?
“Azərbaycanda dinlə məşğul olan qurumlar və yaxud da bu iddiası olan şəxslər özlərinin maarifləndirmə işlərini ümumi şəkildə qurub daha düzgün həyata keçirməlidirlər”
Ilahiyyatçı Cəmşid Əliyev qeyd etdi ki, bəzi dini sektalar insanları təşvişə salmaq və öz çürük ideyalarını təbliğ etmək üçün bu vasitələrdən istifadə edirlər. Qondarma dini sektalar keçən əsrin 90-cı illərindən bugünə kimi zərərverici fəaliyyətlə məşğul olmaqla davam edirlər: “Sosial şəbəkələrin açıq platforma olması, burada istənilən paylaşma ilə bağlı heç bir qadağanın olmaması sektaçıların da fəaliyyinin aktivləşməsinə səbəb olub. Onu da deyim ki, Azərbaycanda yaşayan bir xristian öz dinini yaymaq üçün ona verilən hüquqlardan istifadə edə bilər, bu onun haqqıdır. Məlumdur ki, dünyada ən çox missionerliklə məşğul olanlar katoliklərdir. Bu gün onlar bəzi qurumlara müəyyən məbləğ ödəyərək sosial şəbəkələrdə məzhəblərini, dinlərini rahat şəkildə təbliğ edirlər. Bu cür təbliğatlara qarşı isə xüsusi addımlar atılmalıdır. Bu gün Azərbaycanda dinlə məşğul olan qurumlar və yaxud da bu iddiası olan şəxslər özlərinin maarifləndirmə işlərini ümumi şəkildə qurub daha düzgün həyata keçirməlidirlər”.
Günel CƏLİLOVA
