Ölkə üzrə dövlət məşğulluq mərkəzlərində işsiz və işaxtaran vətəndaşlara təklif olunan müxtəlif məvacibli işlərin siyahısı vətəndaşlarda böyük maraq doğurur.
Bu məqsədlə Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinə sorğu göndərilib. Sorğu zamanı hazırda vətəndaşlara bir çox şəhər və rayon üzrə müxtəlif məvacibli işlərin təklif edilməsi üzə çıxıb.
Vətəndaşlar e-sosial.az portalı üzərindən məşğulluq alt sisteminə daxil olaraq işsiz və işaxtaran kimi öz qeydiyyatlarını apara bilərlər.
Dövlət Məşğulluq Mərkəzində işsiz və işaxtaran vətəndaşlara təklif olunan müxtəlif məvacibli işlərin siyahısında yüksək əməkhaqqı verilən iş yerlərinin boş olması maraq doğurur. Belə ki, 15 min manat maaşı olan iş yerləri boşdur. Maraqlıdır, yüksək maaşı olan iş yerinin boş qalma səbəbi nədir?
“Universitet və digər təhsil müəssisələri peşəkar əmək bazarının tələblərinə uyğun kadrlar yetişdirə bilmirlər”
İqtisadçı-ekspert Rövşən Ağayev bildirdi ki, universitet və digər təhsil müəssisələri peşəkar əmək bazarının tələblərinə uyğun kadrlar yetişdirə bilmirlər: “Bazar işçi qüvvəsinin ixtisas səviyyəsi ilə təklif olunan iş yerinin tələbləri uyğun olmalıdır. Bazarda tələb və təklifin bir-birini qarşılaması üçün keyfiyyətcə də bir-birinə cavab verməlidir. Əmək bazarında 100 vakansiya var. Amma 500 nəfər əmək bazarına tələb olaraq təqdim olunur. Çıxarılan iş yerləri orada təklifi təmsil edir. İşaxtaranların sayı isə əmək bazarında tələbi təmsil edir. Təklif olunan 500 iş yerinə əmək bazarında minlərlə insan iş axtarır”.
Həmsöhbətimiz onu da əlavə etdi ki, işaxtaranların peşə ixtisas səviyyəsi təklif olunan iş yerlərinin kriteriyalarına cavab vermir: “Bu gün reallıq nədən ibarətdir? Bu gün Azərbaycanda iş yerlərinin ixtisas səviyyəsi işçi qüvvəsinin ixtisas səviyyəsi ilə üst-üstə düşməlidir. Əmək bazarının vizual tələblərindən biri budur. İkincisi, keyfiyyət məsələləridir. Azərbaycanda əmək bazarında unikal vəziyyət var. Bir tərəfdən yetərincə iş yeri yoxdur. Digər tərəfdən isə işaxtaranların sayının çox olmasına baxmayaraq, məhdud sayda yerləri tuta biləcək peşəkar kadrlar da azdır. Bu gün Azərbaycanda ixtisasartırma istiqamətinin yetərincə inkişaf etməməsi, orta ixtisas və ali məktəblərdə peşəkar kadrların hazırlanmasında axsaqlıqlar gözlə görünür”.
Günel CƏLİLOVA
