Koronavirus pandemiyasından xilas olmağın yeganə yolunun vaksinasiyadan keçdiyi məlumdur. Bunu aidiyyəti üzrə beynəlxalq mütəxəssislər də, Ümumdünya Səhiyə Təşkilatı da dəfələrlə vurğulayıb. Artıq dünya ölkələrində əhalinin peyvəndləşdirilməsi prosesi gedir, Azərbaycanda da vətəndaşlar peyvənd edilir.
Onu da qeyd edək ki, ölkəmizdə əhalinin yüksək faizi peyvəndləşmə prosesinə böyük maraq göstərir və xeyli vətəndaş peyvənd olunub, bu proses hazırda da davam etdirilir.
Məlum olduğu kimi, peyvənd olunanlar sırasında dövlət rəsmiləri də, müxtəlif vəzifəli şəxslər də var ki, onlar peyvəndi nümayişkaranə şəkildə televiziya qarşısında etdirirlər. Bu da, istər-istəməz, cəmiyyətdə qıcıq yaradır. Haqlı suallar doğurur ki, bəyəm ölkəmizdə insanlar peyvənd əleyhinədir?
Dövlət rəsmilərinin, vəzifəli şəxslərin kamera qarşısında peyvənd vurdurması necə anlaşıla bilər, bu nə deməkdir? Onlar kimə hansı mesajları vermək istəyirlər? Buna ehtiyac varmı?
Ekspertlərin bildirdiyinə görə, bəzi dövlət rəsmiləri bununla guya vətəndaşlar arasında peyvəndin zəruriliyini, faydasını təbliğ etmək istədiklərini göstərmək istəyirlər. Guya ki, peyvəndin zərəri olsaydı, heç onlar da vurdurmazdı və sair. Əslində, onların bununla özlərini reklam etmək niyyəti güddüklərini deyən ekspertlər hesab edirlər ki, bununla şou yaratmaq istəyirlər. Ekspertlər deyirlər ki, indiyə qədər xeyli sayda vətəndaşımız dövlət hesabına peyvənd edilib, onların arasında cəmiyyət üçün daha önəmli simalar da olub, amma onların heç biri yarıçılpaq halda tamaşaçıların qarşısına çıxaraq özlərini reklam etməyiblər. Ekspertlərin qeyd etdiyinə görə, Azərbaycan vətəndaşları dövlətin peyvənd siyasətinə inanır və bu prosesdə könüllü şəkildə iştirak edirlər.
Azər Həsrət: “Vəzifəli şəxslər də peyvəndi ona görə nümayişkaranə şəkildə vurdururlar ki, insanlara bunun zərərsiz olduğunu göstərsinlər”
Siyasi şərhçi Azər Həsrət hesab edir ki, əslinə qalanda burada qeyri-adi heç nə yoxdur. A.Həsrət qeyd etdi ki, koronavirus meydana çıxandan dünyanın hər tərəfində insanlar peyvəndə şübhə ilə yanaşdılar. “Hətta belə iddialar da yayıldı ki, bu, süni bir məsələdir, insanlara peyvənd adı ilə çip yerləşdirmək məqsədilə edilir və sair. Bu da əsassız bir vahimədir. Ona görə də dünyanın aparıcı dövlətlərinin rəhbərləri belə məcbur qalıb koronavirusun çox dəhşətli bir xəstəlik olduğunu sübut etmək üçün addımlar atmağa başladılar. Hətta xatırlayırsınızsa, Braziliya, Belarus kimi dövlətlərin rəhbərləri açıq şəkildə koronavirusun yalan və uydurma olduğunu iddia etdilər, hətta öz ölkələrində önləyici tədbirlər belə görmədilər. Nəticə də o oldu ki, bu gün Braziliya yoluxanların sayına görə ilk üçlükdə, ölənlərin sayına görə də “zirvədə” yer alıb. Söhbət ondan gedir ki, insanların şübhələri olduğu üçün onların inanmasına görə bir çox dövlət rəsmisi, özəlliklə də xarici ölkələrdə bunu demonstrativ şəkildə edirlər. Bu peyvəndləmə prosesi də bu qəbildəndir. Bəzi insanlar yenə şübhəlidirlər ki, bizə çip yeridəcəklər. Dünya əhalisinə kütləvi şəkildə çip yeritmək ağlabatan şey deyil, bu nəyə lazımdır? Dünyada 8 milyard insan var və bu insanların hamısına çip yeridib onları nəzarətdə saxlamaq nəyə, hansı qüvvəyə lazımdır? Vurulanın həqiqətən də peyvənd olduğunu və onun zərərli olmadığını göstərmək üçün bu addım atılır. Çünki sadə vətəndaşlar deyirlər ki, peyvənd zərərsizdirsə, qoy əvvəlcə onu yüksək vəzifəli dövlət məmurları, deputatlar, ayrı-ayrı nazirlər də vurdursunlar. Bu baxımdan, vəzifəli şəxslər də peyvəndi ona görə nümayişkaranə şəkildə vurdururlar ki, insanlara bunun zərərsiz olduğunu göstərsinlər. Azərbaycanda da görürəm ki, artıq az-az bu şəkildə peyvənd vurduranlar var. Bizim səhiyyə naziri də peyvənd olunanda bunu televiziyada göstərdilər.
Cəlaləddin Ruminin bir sözü var: “Özünə rəva görmədiyini başqasına da rəva görmə”. Bir növ, o deyimin işığında davranış sərgiləyirlər. Özlərinə rəva görüb sərgiləyirlər ki, görürsünüz, biz özümüzə rəva bildiyimizi sizə də rəva görmüşük. Düşünürəm ki, narahatlıq üçün elə ciddi əsas yoxdur. Peyvənddən heç kəs qorxmasın, çəkinməsin, sırası gələndə biz də peyvənd vurduracağıq, əlbəttə, ehtiyac olacağı təqdirdə. Mənə elə gəlir ki, insanlar, əslində, bunu geniş müzakirə etməməlidirlər. Problem var, COVID-19 adı altında mövcuddur, bütün dövlətlər ona qarşı tədbirlər görürlər, bir il ərzində bu xəstəlikdən 2 milyondan çox insan ölüb. Yəni rəqəmlər həqiqətən qorxuncdur, yüz milyondan artıq insan bu virusa yoluxub. Azərbaycanda 3 mindən çox ölüm, 230 mindən çox yoluxma var. Ona görə peyvənddən qorxmaq, çəkinmək lazım deyil. Əgər bunu kimsə nümayişkaranə edirsə, ona da çox bənd olmağa dəyməz” - deyə A.Həsrət vurğuladı.
Rauf Zeyni: “...burada qorxulu, narahatedici heç nə yoxdur”
Milli Qeyri-Hökumət Təşkilatları Forumunun rəhbəri Rauf Zeyninin isə məsələyə münasibəti belə oldu: “Əlaqədar qurumlar tərəfindən ölkəmizdə peyvəndləşmə sistemli şəkildə aparılır və aparılacaq. İlk növbədə, risq qruplarına aid olan 65 yaşdan yuxarı olan şəxslər, tibbi personal və digər sahələrin təmsilçiləri peyvəndləşmədə iştirak edirlər. Azərbaycan azad, müstəqil bir ölkədir. Bu şəxslər ya özlərini reklam etmək, yaxud əhalini peyvəndə təşviq etmək məqsədilə bu addımı atırlar ki, görürsünüz, mən də nazirəm, nazir müaviniyəm, mənə də peyvənd vuruldu və burada qorxulu, narahatedici heç nə yoxdur. Hansısa bir dövlət məmuru, tanınmış şəxs peyvənd etdirib bunu televiziya vasitəsilə göstərirsə, bu da, biririnci növbədə, o şəxslərin mövqeyidir. İkincisi də ki, televiziyalar bunu hansısa təbliğatda istifadə edirlər, bu da televiziyaların işidir. Mən buna mənfi hal kimi baxmıram. Yəni bütün dünyada bu proses var. Bəli, dövlət məmurları da, digər şəxslər də, məşhurlar da peyvənd olunanda bunu çəkdirirlər və bunu sosial şəbəkələrdə, televiziyalarda yayırlar. Amma belə düşünürəm ki, peyvənd prosesi normal, sürətli templə aparılır və aparılacaq. Əhali arasında da əvvəllər bəzi tərəddüdlər var idi. İndi də bəzi insanlar peyvəndləşməsi tam qəbul etmir. Çünki dünyada müxtəlif neqativ informasiyalar yayılır ki, filankəsə peyvənd vuruldu, onun halı dəyişdi, yaxud dünyasını dəyişdi. O informasiya bəzi insanları narahat edir. Amma hesab edirəm ki, peyvəndləşmədə heç bir narahatedici məsələ yoxdur. Bu, pandemiyanın qarşısının alınması üçün geniş miqyasda əhaliyə vurulmalıdır. Bu, COVID-19-un və ondan sonra gələn ştamların qarşısını almaq üçün vacibdir. Bu müsbət bir məsələdir. Vətəndaş cəmiyyəti də bu istiqamətdə aparılan işləri yüksək qiymətləndirir”.
İradə SARIYEVA
