Hardasa hər gün avtobus sürücülərinin yol hərəkəti qaydalarını pozması ilə bağlı hadisələrin şahidi oluruq. Maraqlısı odur ki, “dayanacaqlardan kənar saxlaya bilmərik” deyən sürücülər avtobusa harda oldu minmək istəyən sərnişinlər olduğu zaman bu qaydaları unudurlar.
Ümumiyyətlə, bəzi avtobuslar yollarda digər maşınların hərəkətinə mane olur. Avtobusların dayanacaqlarda və dayanacaqdan kənar saxlaması ondan arxada gələn maşınların dayanmasına səbəb olur ki, bu da yollarda tıxac yaradır.
Onu da qeyd edək ki, avtobuslar üçün yaradılan xüsusi zolaqlar ictimai nəqliyyatın fasiləsiz hərəkətini təmin etmək üçün nəzərdə tutulub.
BakI Şəhər Dövlət Yol Polisi İdarəsinin (BŞDPİ)-nin bölmə rəisi, polis polkovniki Vaqif Əsədov media nümayəndələrinə açıqlamasında qeyd edib ki, avtobus zolaqlarında hərəkətin fasiləsiz olması üçün yol polisi kameralar vasitəsilə nəzarət tədbirləri həyata keçirir: “Zolağa daxil olan və ya orada dayanan avtomobillər aşkar edildikdə dərhal ərazi üzrə xidmət aparan əməkdaşlar xəbərdar olunurlar. YPX əməkdaşları da həmin sürücüləri aşkar edərək barələrində tədbir görür və ya təbliğat xarakterli söhbətlər apardıqdan sonra maşının ərazidən götürülməsini təmin edirlər. Taksi sürücüləri və fərdi nəqliyyat vasitələrinin sahibləri avtomobili dayanacaq və ya onun yaxınlığında park edirlər ki, bununla avtobuslar dayanacağa rahat şəkildə daxil ola bilmir. Nəticədə yolun hərəkət hissəsində dayanmaqla digər nəqliyyat vasitələrinin ləngiməsinə səbəb olur, sərnişinlərin həyatını təhlükəyə atmaqla yolun hərəkət hissəsində sərnişin mindirib-düşürürlər. Bütün bunların qarşısını almaq üçün yol polisi artıq müəyyən addımlar atmağa başlayıb”.
Artıq avtobus zolaqlarına fərdi maşınların və taksilərin daxil olması qadağan olunacaq. Bu qadağanı pozan sürücülər qanunvericiliyin tələbinə uyğun olaraq cəzalandırılacaqlar.
“Avtobus zolaqlarına fərdi maşınların və taksilərin daxil olmasının qadağan edilməsi tıxacların qarşısını alacaq”
Sosial sahə üzrə ekspert Mayis Əliyev qeyd etdi ki, dayanacaq problemi aktual mövzudur. Paytaxtda avtobus dayanacaqlarının digər avtomobillər tərəfindən zəbt edilməsinin çox şahidi oluruq. Bunun bir səbəbi də taksilərdir. Amma taksilər üçün də xüsusi dayanacaqlar olmalıdır ki, nəqliyyat vasitələri biri-birinə mane olmasın. Paytaxt küçələrinin xüsusilə mərkəzi hissədə darısqal olduğunu nəzərə alsaq, həm avtobuslar üçün, həm də taksi xidməti üçün xüsusi dayanacaq yerlərinin ayrılması çətindir. Avtomobillər səkilərin hər iki tərəfində park edilir, hərəkət zolaqlarını da tuturlar: “Paytaxtın əksər ərazisində avtobus dayanacaqları var, ora taksilər tərəfindən zəbt olunub. Bu da yolverilməz haldır. Çünki dayanacaq zəbt olunursa, o zaman tıxacın yaranması qaçılmazdır. Bu zaman avtobuslar məcburdur ki, yolun ikinci zolağında dayansınlar. Belə hal avtobus sürücüsü üçün inzibati xətadır”.
Həmsöhbətimiz onu da əlavə etdi ki, avtobus zolaqlarına fərdi maşınların və taksilərin daxil olmasının qadağan edilməsi tıxacların qarşısını alacaq. Bu qadağa sahəsində sərnişinlər rahat şəkildə avtobusdan minib-düşə bilərlər.
Günel CƏLİLOVA
