Parlaq zəfərlərlə milli dövlətçilik tariximizə əbədi olaraq həkk edilən 44 günlük Vətən müharibəsi Azərbaycan dövlətinin gücünün, əzəmətinin təntənəsidir.
Bütün dünyanı heyrətə salan Vətən savaşında bizə işıqlı zəfəri bəxş edən qazilərimiz və canını Vətən yolunda qurban verən şəhidlərimiz olub. Bu baxımdan, qazilərimiz və şəhidlərimiz, onların ailələri cəmiyyətin, dövlətin həssaslıqla, böyük ehtiramla, qayğı ilə yanaşdığı ünvandır.
Amma çox təəssüf ki, bəzən cəmiyyətimizdə bəzi üzdəniraqlar tapılır, onlar qazilərimizin və şəhid ailələrimizin adlarından sui-istifadə edərək xoşagəlməz davranışlar sərgiləyirlər. Aydın olduğu kimi, belə hərəkətlərə yol verənlərin nə qaziliklə, nə də şəhid ailələri ilə yaxından-uzaqdan heç bir əlaqəsi yoxdur. Əlbəttə, bütün bunlar Vətən müharibəsində qazandığımız parlaq qələbəyə qarşı törədilən təxribat sayılmalıdır.
Uzağa getməyək, bu günlərdə özünü “Vətən müharibəsi qazisi” qələmə verərək dilənçiliklə məşğul olan bir şəxs saxlanıb. O, açıq etiraf edib ki, insanların qazilərə həssas münasibət göstərməsindən sui-istifadə edərək özünü “qazi” kimi təqdim edərək dilənçilik etmək yolunu tutub.
Bir neçə gün əvvəl isə müxtəlif saytların “qəhrəmanlaşdırdığı” psixi pozğunluğu olan bir qadın iki oğlunun Vətən müharibəsində itkin düşdüyü iddiası ilə meydana çıxmışdı. Bütün araşdırmalar onu göstərdi ki, onun heç bir övladı yoxdur və iddiaları uydurmadır.
Bütün bunlardan belə nəticəyə gəlmək olar ki, kimlərsə, ya bilərəkdən, hanısa maddi gəlir əldə etmək məqsədilə bu addımı atır, ya da ki, bu təxribat hansısa qüvvələr tərəfindən gerçəkləşdirilir və hədəf də Azərbaycanın parlaq qələbəsinə kölgə salmaq, ölkəmizdə şəhid ailələrinə və qazilərə “qayğı göstərilmədiyi” rəyini yaratmaqdır. Halbuki, həm Birinci, həm də İkinci Qarabağ müharibəsi qazilərinə, şəhid ailələrinə dövlət tərəfindən böyük qayğı və diqqət göstərilir, onların ən kiçik problemlərinə belə həssaslıqla yanaşılır.
Ekspertlər hesab edirlər ki, qazilərin və şəhid ailələrinin adlarından sui-istifadəyə görə konkret cəza müəyyən olunmalıdır ki, belələri cəzalandırılsın və şəhidlik, qazilik məktəbinə, dövlətimizin işıqlı qələbəsinə kölgə salmağa bir də cürət edən tapılmasın.
Ekspertlərin, qazilərin fikrincə, qazi adı ilə dilənçilik edənlərə elə ağır cəza verilməlidir ki, bu, başqalarına dərs olsun və bir də belə təxribatlara yol verənlər tapılmasın.
“...qələbəmizə qarşı bir təxribatdır və belələri barədə konkret ölçü götürülməlidir”
Tanınmış hərbi ekspert Tərlan Eyvazov bildirdi ki, saxta qazilərin peyda olması çox ağrılı məsələdir.
“Olduqca aktual məsələyə toxunmusunuz. Bu məni və Birinci Qarabağ müharibəsində iştirak edən insanların hamısını, bir sözlə, bütün cəmiyyətimizi narahat edən məsələdir. Bu hal bütün müharibələrə xas olan haldır. Müharibələr bitdikdən sonra belə saxtakarlıqlarla məşğul olan, özünü “müharibə iştirakçısı” kimi qələmə verənlər, özlərini “əlil” kimi təqdim edənlər çox olub. Amma çox təəssüflər olsun ki, belə neqativ hallar bizdə də var və bu, çox pis formada özünü göstərir. Biz Birinci Qarabağ müharibəsindən sonra da belə xoşagəlməzliklərlə rastlaşmışıq. O vaxtlar belə halları araşdırıb üzə çıxarmaq çox çətin idi. Torpaqlarımızın işğal altına düşməsi, Müdafiə Nazirliyinin daha gec yaranması, qarışıqlıq, xaos, müəyyən sənədlərin vaxtında hazırlanmaması, müvafiq orqanların lazımi şəkildə formalaşmaması bu cür neqativ halların yol açmasına şərait yaradırdı. 1993-cü ildən bütün idarələr formalaşdıqdan sonra bu məsələlərə aydınlıq gətirildi. Saxta yollarla ad alanlar və sair yavaş-yavaş üzə çıxarıldı və o adlar ləğv olundu. Konkret olaraq müharibə iştirakçılarına müəyyən imtiyazlar verildi.
Təbii ki, 30 il müddətində dövlətimiz formalaşıb.
Sizin qeyd etdiyiniz məsələnin hər şeydən əvvəl mənəvi tərəfinə diqqət çəkmək istəyirəm. Görürlər ki, cəmiyyət Vətən müharibəsində iştirak edən, qəhrəmanlıqlar göstərən qazilərə, müharibədə döyüşənlərə xüsusi hörmət, məhəbbət bəsləyir, onlara həssaslıqla yanaşır, ona görə də bəziləri saxta qazi kimi ortaya çıxıb qazilərin adından sui-istifadə edirlər. Əminəm ki, hansı insanlar ki, həqiqətən müharibədə iştirak edib, şücaətlər göstərib, əziyyət çəkib, o insanlar, əsl döyüşçülər heç vaxt bunu dilə gətirmir. Amma görürük ki, KİV-də, xüsusən də telekanallarda o insanlar daha çox səs-küy salıb nələrisə tələb edirlər, onların bəlkə də heç müharibədə elə bir qəhrəmanlığı olmayıb, sadəcə, əynində forma hansısa bir yerdə dayanıb. Belələri özlərini reklam edirlər, çox təəssüf ki, həmkarlarınızın arasında da onların yalanlarına inananlar və onları həddən ziyadə təbliğ edənlər olur. Amma bunun hamısına da vaxt lazımdır. Saxta qazi adı ilə meydana çıxanlar əlbəttə ki, əsl döyüşçülərin qəlbində narahatlıq yaradır, bu xoşagəlməz faktlar onları incidir. Hesab edirəm ki, yalnız dövlətin aidiyyəti qurumları deyil, bu sahədə olan ictimai təşkilatlar da yalnız medal paylamaqla deyil, bu məsələlərlə də məşğul olmalıdırlar, araşdırmalar aparıb həmin o saxta qaziləri üzə çıxarmalıdırlar. Doğrudur, saxtakar qazilər həddindən artıq həyasız olur, bəzən həqiqəti üzə çıxaranları sosial şəbəkələr vasitəsilə təhqir edirlər. Belə hallar mənim də başıma gəlib. Amma bundan qorxmaq lazım deyil. Belə insanları ifşa etmək, cəmiyyəti yalançı qəhrəmanlardan xilas etmək, əsl qəhrəmanları yeni yetişən gəncliyə təqdim etmək hər birimizin üzərinə düşən vəzifədir. Təbii ki, kimlərsə qanunu pozursa, hansısa saxta sənədlərlə nəyisə tələb edirsə, onlar da inzibati qayadada cəzalandırılmalıdırlar. Hər şeydən əvvəl isə belə məsələlərdə ictimai qınaq olmalıdır, ictimai qınaq institutunun fəaliyyəti açıq görsənməlidir”.
T.Eyvazov qeyd etdi ki, qazilərin və şəhid ailələrinin adından sui-istifadə edən insanlarla da cəmiyyət barışmaz mübarizə aparmalı, onları “qazi”, “şəhid ailəsi” kimi təqdim edənlərə qarşı da xüsusi tədbirlər görülməlidir. “Görürsünüz ki, bu günlərdə bir qadın oğlanlarının müharibədə itkin düşdüyünü iddia etmişdi, bəzi media orqanları da onun yalanlarını ictimailəşdirmişdi, buna rəsmi münasibət bildirilənə qədər nə qədər insan aldandı və məsələyə öz münasibətini bildirdi. Amma sonradan təqdim edilən araşdırmalardan məlum oldu ki, bu qadın ruhi xəstədir və onun heç övladı yoxdur. Belə məsələlərdə mətbuat da həssas olmalıdır.
Gəlin açıq danışaq, pandemiyanın bu vaxtında, həm də müharibədən çıxan Azərbaycan dövləti yenə də şəhid ailələrini, qaziləri diqqətdən kənarda saxlamır, onlara qayğı göstərir, əlillərin, qazilərin, şəhid ailələrinin problemlərinin həllinə çalışır, bu işlə ardıcıl olaraq məşğul olur. Dövlət tərəfindən yaradılan “Yaşat” fondu da, başqa təşkilatlar da bilavasitə qazi və şəhid ailələrinin problemləri ilə məşğuldur, get-gedə bütün problemlər öz həllini tapacaq. Amma saxtakarlıq edərək özlərini “qazi”, yaxud “şəhid ailəsi” qələmə vermək qələbəmizə qarşı bir təxribatdır və belələri barədə konkret ölçü götürülməlidir”.
T.Eyvazovun sözlərinə görə, heç kəs deyə bilməz ki, bu 30 ildə dövlət nə vaxtsa şəhid ailələrinə, qazilərə qayğı göstərməyib, yaxud şəhidlərin xatirəsinin əbədiləşdirilməsi üçün addım atmayıb. “Bu yalan olar” - deyən T.Eyvazovun bildirdiyinə görə, dövlət həmişə yüksələn xətt üzrə onların müavinətlərini artırıb, onlara maşınlar verib, evlə təmin edib, bu gün də proses davam etməkdədir, heç kəs diqqətdən kənarda qalmayıb və qalmır da. “Təbii ki, bunlar hamısı vaxt, zaman və maliyyə tələb edən işlərdir. Amma təəssüf ki, adını ictimaiyyətçi qoyub, heç bir ictimai fəaliyyət göstərməyən, özünü reklamla məşğul olan insanlar tərəfindən saxtakarlar ictimailəşdirilir, səhv istiqamətdə təqdim edilir. Halbuki, təqdim edilən istənilən məsələ ictimailəşdirilməmişdən əvvəl mütləq şəkildə araşdırılmalı, onların iddiaları dəqiqləşdirilməlidir. Övladı olmayan bir şəxsin “müharibədə övladları itkin düşən ana” kimi cəmiyyətə təqdim edilməsi nə dərəcədə düzdür? Sonra məlum olur ki, bu heç də belə deyilmiş. Amma iki övladı birdən şəhid olan, əkiz balalarını Vətən uğrunda şəhid verən ata və anaların isə heç səsi çıxmır, ürəklərində öz dərdlərini yaşayırlar, “Vətən sağ olsun” deyirlər. Ona görə də düşünürəm ki, qazilərimizin və şəhid ailələrinin adından sui-istifadə hallarına yol verilməsi çox ləyaqətsiz bir haldır və buna gərək yol verilməsin. Buna yol verənlər də, onları “qəhrəmanlaşdıranlar” da gərək öz layiqli cəzalarını alsınlar ki, bu neqativ hallar bir də təkrarlanmasın” - deyə T.Eyvazov vurğuladı.
İradə SARIYEVA
