Bu il Rusiya mətbuatının Xocalı soyqırımına ötən illərə nisbətən daha böyük diqqət ayırdığı məlum olur. Həmin ölkənin bir çox tanınmış elektron və yazılı KİV-i faciə ilə bağlı geniş materiallar yayımlayıb.
Rusiyanın tanınmış “arqumentı.ru” saytında mövzunu geniş əhatə edən material “Xocalı - sağalması mümkün olmayan ağrı” başlığı ilə təqdim olunub. “m.newizv.ru” isə təqdimatı “Əsrin vəhşiliyi” başlığı ilə təqdim edir. “Ura.news” saytı isə oxuculara belə sual başlığı ilə müraciət edir: “30 il əvvəl törədilən genosid niyə hələ də Azərbaycanın aldığı zərbədir?”. Çox populyar “lenta.ru” saytı isə başlığı belə seçib: “Qadın və uşaqlar qarda öldürülüblər”. Bu xəbərdə bildirilir ki, 28 il əvvəl, 1992-ci il fevralın 25-dən-26-na keçən gecə Dağlıq Qarabağın Xocalı şəhərində azərbaycanlıların qurbanı olduqları faciə baş verib: “Qarabağ münaqişəsinin ortasında, Ermənistan silahlı qüvvələri strateji əhəmiyyətə malik olan şəhəri mühasirəyə alıb və sonra hücuma keçib. Bu əməliyyat dinc sakinlərin kütləvi ölümü ilə nəticələnib. 600-dən çox yerli azərbaycanlı, əsasən uşaqlar, qadınlar və qocalar öldürülüb. Xocalı faciəsindən 28 il ötməsinə baxmayaraq, günahkarlar hələ də cəzasız qalıb”.
Rusiya mətbuatının faciənin builki ildönümünə belə diqqətli və əhatəli yanaşmasının kökündə hansı məsələ dura bilər?
- Azər Həsrət: “Rusiya mediasında belə bir yanaşmanın meydana gəlməsi, hər halda, Azərbaycanın apardığı düzgün təbliğatın nəticəsidir”
Media eksperti Azər Həsrət “Bakı-Xəbər”ə açıqlamasında bildirdi ki, bu tendensiyanı onun özü də müşahidə edib: “Düzü, bir qədər gözlənilməz oldu. Bir faktı da qeyd edim ki, fevralın 24-də “Nezavisimaya qazeta”da Sumqayıtda törədilmiş hadisələrin mahiyyətinə də ətraflı işıq salınıb. Lev Əskərovun yazısında hadisələrin mahiyyətilə bağlı obyektiv mövqe sərgilənir. Faktlarla sübut olunur ki, Sumqayıtdakı qırğınları ermənilər planlayıb və həyata keçiriblər. Rusiya mediasının bu obyektivliyi alqışlanmalıdır. Bu, artıq buzun tərpəndiyinin göstəricisidir. Belə nəticəyə gəlirik ki, deməli, işləyəndə əldə nəticə olur. “Lenta.ru” saytında şəkilləri gördüm. O vaxt çəkilib və paylaşılmayan dəhşətli fotoların Rusiya mediasında tirajlanması bizim üçün çox önəmlidir. “Qazeta.ru”da bizim insanların başına gətirilən müsibətlər barədə danışılır və sual edilir ki, Xocalı faciəsinin günahkarı kimdir? Bu çox ciddi bir yanaşmadır. Rusiya mediasında belə bir yanaşmanın meydana gəlməsi, hər halda, Azərbaycanın apardığı düzgün təbliğatın nəticəsidir. Azərbaycan istər dövlət, istərsə də qeyri-hökumət xətti ilə həqiqətlərin dünyaya çatdırılması istiqamətində ciddi işlər görür. Biz bu yöndə fəaliyyətimizi davam etdirməliyik. Rusiya mediasına əli çatan, sözü keçən şəxslər dayanmamalıdır. Bu həqiqətlərin dünyaya car çəkilməsi çox lazımdır”.
Məhəmmədəli QƏRİBLİ
