09/07/2020 18:05
728 x 90

Münhendə debat məğlubiyyətindən sonra Ermənistan sərhədlərdə pozuculuq aksiyalarını artırıb – böyük səbəb...

Məhəmməd Əsədullazadə: “Cəbhə bölgəsində təxribatların artması Paşinyanın Münhendə üzləşdiyi məğlubiyyətlə birbaşa əlaqəlidir”

img

Məlum olduğu kimi, bir neçə gün əvvəl Münhendə Azərbaycan Prezidenti İlham Əliyev və Ermənistanın Baş naziri Nikol Paşinyan arasında görüş keçirilib. Tərəflər arasında Dağlıq Qarabağ münaqişəsinin tənzimlənməsinə dair fikir mübadiləsi aparılıb. O cümlədən, elə həmin gün Münhen Təhlükəsizlik Konfransı çərçivəsində iki dövlət başçısının iştirakı ilə Ermənistan-Azərbaycan Dağlıq Qarabağ münaqişəsi ilə bağlı panel müzakirələr keçirilib.

Münhen debatındakı biabırçı məğlubiyyətindən sonra Paşinyan müxtəlif təxribatlara əl atdı. Paşinyan Dağlıq Qarabağa gələrək güzəştli sülh imzalamağa hazırlaşdığı barədə yayılan xəbərləri təkzib edərək, daha radikal açıqlamalar verdi. Bununla paralel, cəbhə xəttində gərginlik artmağa başladı. Nəticədə Azərbaycan əsgəri şəhid oldu. Bir sözlə, Münhen debatından sonra atəşkəsin pozulması halları intensivləşib. Digər tərəfdən, separatçı qurumda silahlı qüvvələr döyüş hazırlığı vəziyyətinə gətirildi. Belə ki, Azərbaycanın işğal altındakı torpaqlarında Ermənistan ordusu döyüşə hazır vəziyyətə gətirilib. Təlimlər zamanı 3 mindən artıq hərbçinin zirehli texnika və artilleriya vasitələrinin müşayiəti ilə yerdəyişmə etdiyi deyilir. Maraqlıdır, bütün bunların səbəbini ekspertlər nə ilə izah edirlər?

  • “Hesab edirəm ki, Ermənistanın bu siyasəti danışıqlar prosesindən uzaqlaşmaqdır”

Məsələyə münasibət bildirən politoloq Məhəmməd Əsədullazadənin sözlərinə görə, cəbhə bölgəsində təxribatların artması Paşinyanın Münhendə üzləşdiyi məğlubiyyətlə birbaşa əlaqəlidir: “Bütün bunların arasında ciddi əlaqə var. Ermənistan daim danışıqların intensiv mərhələsində aktiv şəkildə danışıqları sabotaj etmək kursunu götürür. Cenevrədə başlanan danışıqlar prosesindən ayrılmaq üçün Paşinyan Münhendə psixoloji məğlubiyyətini ört-basdır etmək məqsədilə növbəti dəfə danışıqlara zərbə vuran açıqlma verdi. Bunun ardınca Azərbaycan tərəfinə diversiya hücumları təşkil etdilər və hərbçimiz şəhid oldu. Eyni zamanda, işğal altındakı Qarabağda hərbi təlimlərə başladılar. Hesab edirəm ki, Ermənistanın bu siyasəti danışıqlar prosesindən uzaqlaşmaqdır. Çünki iki aydan sonra danışıqlarda yeni mərhələ başlamalıdır. İndidən Ermənistan bu yolu tutub ki, kompromisə getməsin. Ancaq danışıqların ATƏT-in Minsk Qrupunun həmsədrlərinin vasitəçiliyi ilə keçiriləcəyini nəzərə alsaq, bu, növbəti dəfə vasitəçilərin işinə kölgə salmış olur. Hesab edirəm ki, Minsk Qrupu özü Ermənistana etiraz etməli və İrəvana substantiv danışıqlar mərhələsinə başlaması üçün təzyiq etməlidir. Hazırda Ermənistan bu təxribatları törətməklə, bütövlükdə, prosesə mane olur”.

Vidadi ORDAHALLI 

Son xəbərlər