Ermənistanda yayımlanan Rusiya telekanallarına yönəlik tənqidlər artır. Erməni mediası hesab edir ki, sözügedən telekanallar tez-tez “irqçi, dini zorakılıq çağırışları” yayırlar. Ancaq Milli Televiziya və Radio Komissiyasının yol verilən pozuntulara görə cəzalandırma mexanizmi yoxdur.
Son günlər erməni mediası Rusiyanın “RTR-Planet” kanalını hədəf alıb. Qeyd olunur ki, Ermənistanda yayımlanan Rusiyanın “RTR-Planet” kanalının informasiya və ictimai-siyasi verilişlərində anti-Avropa yönümlü materiallar daha çox yer alır: “Məsələn, "Vladimir Solovyovla axşam" tok-şousunda insanlar faşizmi Avropa mədəniyyətinin bir hissəsi kimi təmsil etdikləri ilə razılaşırlar. Təqdimatçı nəinki düzgünlüyə çağırış etməyə çalışmır, eyni zamanda, eyni mövzuda manipulyasiyalara müraciət edir. Beləliklə, faşizm və qırğınlardan danışan Solovyov günahı bütün Avropaya çatdırır”.
Erməni mediası yazır ki, sözügedən kanalın pulsuz olaraq bütün ölkə ərazisində yayımlanması doğru deyil. Əhali rus kanallarının təsiri altına düşür. Ona görə də sözügedən kanalın yayımı dayandırılmalıdır: “Niyə erməni izləyicisi rus telekanalları tərəfindən müxtəlif təhqirlərin qurbanına çevrilməlidir?”.
Bundan başqa, Münhendən qayıtdıqdan sonra Paşinyan Xocalı soyqırımına görə məsuliyyəti Rusiyanın üzərinə atıb. O bununla bağlı status yazıb: “Fakt fakt olaraq qalır: Xocalıda azərbaycanlıların qırğınının Azərbaycandakı ermənilərlə ortaq heç nəyi yoxdur, bunu Rusiyanın 366-cı alayı edib. Bu faciədə bizim günahımız yoxdur".
Bundan təxminən bir neçə dəqiqə sonra isə Paşinyan ciddi siyasi səhvə yol verdiyini anlayıb və paylaşımını silib. Əvəzində isə bu sözləri saxlayıb: "Fakt fakt olaraq qalır".
Göründüyü kimi, Ermənistanda anti-Rusiya fəaliyyəti yenidən özünü göstərməkdədir.
“Bu səbəbdən rus telekanallarına qarşı qaralama kampaniyası aparılır”
Məsələyə münasibət bildirən politoloq Elşən Manafovun sözlərinə görə, Ermənistanda yenidən anti-Rusiya dalğasının qabarmasının kökündə bir sıra faktorlar dayanır: “Məsələ ondadır ki, getdikcə Cənubi Qafqazda geosiyasi nüfuz uğrunda mübarizə güclənir. Paşinyanın Qərbin dəstəyilə hakimiyyətə gəlməsi heç kəsdə şübhə doğurmur. Sadəcə olaraq, Paşinyan bu müddət ərzində Rusiyanın bölgədə və konkret olaraq Ermənistanın özündə ciddi təsir imkanlarını nəzərə almaq məcburiyyətində idi. Çünki Rusiyanın Ermənistanda hərbi mövcudluğu var. Bundan başqa, Rusiya ölkənin enerji sektoruna təsir imkanlarına malikdir. Maraqlıdır ki, Paşinyan Qərbə boylanıb maliyyə kreditləri almaq şərtilə Ermənistan dövlətinin təhlükəsizliyi ilə bağlı məsələlərdə Rusiyadan təminat almaq istəyir. Təbii ki, bu da Qərbi qane etmir. Ona görə də Paşinyan manevr etmək məcburiyyətindədir. Paşinyan ictimai rəyə və onun hakimiyyət başına gəlməsində maraqlı olan qüvvələrə bu cür mesajlar verir. Yəni Ermənistanın ictimai-siyasi rəyinə ciddi təsir imkanlarına malik olan faktorlardan biri də Rusiyanın bu ölkənin informasiya məkanında tutduğu mövqedir. Təbii ki, bu, az əhəmiyyətli faktor deyil. Ona görə də Ermənistandakı Rusiya kanalları qaralanır. Paşinyan Baş nazir olandan sonra Ermənistanın təhsil müəssisələrində belə rus dilinin tədrisinə heç bir ehtiyacın olmaması ilə bağlı fikirlər səsləndirdi. Bütün bunlar təsadüfi deyil. Ermənistanı Rusiyanın təsir dairəsindən çıxarmaqdan ötrü sözügedən telekanalların yayımının məhdudlaşdırılması ortaya atılır. Bu yolla Gürcüstandan sonra Ermənistanda Qərb öz istədiyi layihəni başa çatdırmaq istəyir. Burada problem ondan ibarətdir ki, Ermənistan özü kifayət qədər mürəkkəb geosiyasi bir bölgədə yerləşir. Məsələ ondadır ki, ABŞ-ın bölgə ilə bağlı siyasətini həzm etməyən İran, Rusiya faktoru var. O üzdən, Ermənistan hakimiyyəti istədiyini həyata keçirə bilmir. Nəzərə almaq lazımdır ki, Paşinyan separatçı qurumda keçiriləcək “seçkilərdə” öz nümayəndəsini seçdirmək istəyir. Bütün bunların üst-üstə düşməsi Paşinyanı manevr etməyə məcbur edir”.
Vidadi ORDAHALLI
