Ermənistanın baş naziri Nikol Paşinyan Azərbaycan torpaqlarının işğal olunması faktını etiraf edib. O, bununla bağlı Münhen Təhlükəsizlik Konfransında iştirak üçün səfər etdiyi Almaniyada danışıb. Konfrans çərçivəsində keçirilən görüşün iştirakçısı Gülnar Qurbanova Paşinyana Ermənistan-Azərbaycan Dağlıq Qarabağ münaqişəsinin həlli ilə bağlı sual verib. O bildirib ki, Ermənistan tərəfindən işğal olunan Cəbrayıl rayonunda doğulub və hələ də doğma torpaqlarına geri qayıda bilmir. Bu suala cavab verən N.Paşinyan etiraf etməli olub: “Bəli, biz Cəbrayıl rayonunu işğal etmişik”. Ancaq o, işğal olunmuş ərazilərdən olan məcburi köçkünlərin və qaçqınların öz doğma torpaqlarına nə vaxt və necə qayıda biləcəkləri barədə sualı cavabsız qoyub.
Nikol Paşinyan həm tarixi faktlar, həm də Dağlıq Qarabağ münaqişəsi zonasındakı mövcud vəziyyət barədə, həmişə olduğu kimi, yenə yalan söyləyib və faktiki olaraq Ermənistanın törətdiklərində, ənənəsinə uyğun, Azərbaycanı ittiham edib. Sələflərinin - Qarabağ uğrunda müharibənin təşəbbüskarı olan Serj Sarkisyan və Robert Köçəryanın ardınca o, işğal edilmiş Azərbaycan ərazilərini “təhlükəsizlik kəmər” adlandırıb. Beləliklə, o, alman ictimaiyyətini inandırmağa çalışıb ki, guya münaqişədə təcavüz nümayiş etdirən İrəvan yox, Bakıdır. Göründüyü kimi, Paşinyan Avropanın mərkəzində, özü də təhlükəsizliyə aid olan bir konfransda sülhə bu şəkildə meydan oxuyur. Ən əsası isə, özündən əvvəlki sülhə təhdid mövqeyini tutan sələflərinin xəttini daha sərt formada davam etdirir. Paşinyanın bu mövqeyinə Avropa hansı reaksiyanı verməlidir? Görünən budur ki, Paşinyanın məhz təhlükəsizliklə bağlı paltformada belə çıxış etməsi dünyada və regionda sülhə və təhlükəsizliyə əsl təhdiddir. Artıq beynəlxalq birlik də gördü ki, Nikol Paşinyan və onun komandası Dağlıq Qarabağ münaqişəsinin dinc yolla həlli prosesini irəli aparmaq potensialında deyil, bunu istəmir, əksinə, kövrək prosesi də gərginləşdirmək kursu götürüb. Halbuki, beynəlxalq vasitəçilər, ABŞ və Avropa Birliyi Ermənistanın yeni rəhbərliyindən dünənə qədər, öncəki iqtidarlardan fərqli olaraq, daha konstruktiv addımlar atmağı, erməni xalqını sülhə hazırlamağı gözləyirdilər. Çünki Paşinyanın reytinqi, sələflərindən fərqli olaraq, yüksək idi. Ancaq proseslərin gedişi göstərir ki, Paşinyanın ölkə daxilində reytinqi sürətlə aşağı düşür. Çünki artıq o, Sarkisyanın və Köçəryanın zamanında səslənən yayındırıcı terminlərdən istifadə edir. Həm də bunu daha kobud formada arqumentləşdirir. Bu arada, Ermənistanda müharibə xofunun getdikcə artması müşahidə olunmaqdadır. Düşmən ölkədə hesab edirlər ki, Qarabağda irimiqyaslı müharibə təhlükəsi heç vaxt bu qədər yaxın olmayıb. Çünki danışıqların dalana dirəndiyini hər iki tərəf, eləcə də vasitəçilər təsdiqləyir. Artıq nəinki sülh danışıqları, heç onun imitasiyası da yoxdur. Erməni politoloqları da etiraf edir ki, son 20 ildə vəziyyət heç vaxt indiki kimi pis olmamışdı və hamılıqla dərk edirlər ki, danışıqlar ciddi uğur gətirmir, amma detalların müzakirəsi, tərəflərin mövqelərinin təqdim edilməsi, fikir mübadiləsi və mümkün nizamlama sxemlərinin hazırlanması üçün də Ermənistan rəhbərliyi tərəfindən səylər edilmir. Üstəlik, Paşinyan Münhendə yenidən “Qarabağ Ermənistandır, nöqtə” ifadəsinə haqq qazandırmaqla danışıqlar prosesinin dayandırılmasında Ermənistan hakimiyyətinin rolunu təsdiq edib. İndi Paşinyan beynəlxalq ictimaiyyəti əmin etməyə çalışır ki, onları güzəştə vadar etməyin xeyri yoxdur. Hətta işğal faktını da etiraf edib, bunu “təhlükəsizlik kəməri” kimi təqdim etməklə özünə və işğalı reallaşdıran əvvəlki ölkə başçılarına haqq qazandırmağa çalışıb. İndi söz vasitəçilərin və Avropada təhlükəsizliyi istəyənlərindi...
Məhəmmədəli QƏRİLİ
