Məlum olduğu kimi, MSK 4 dairədə keçirilən seçkilərin nəticəsini ləğv edib. Sosial şəbəkələrdə aparılan müzakirələrdən görünür ki, bir sıra digər dairələrin namizədləri də nəticələrin ləğvini istəyirlər. Hətta ehtimallar var ki, bir neçə dairə ilə də bağlı analoji qərar qəbul oluna bilər.
Ancaq vətəndaşlar arasında nəticəsi ləğv olunan dairələrdə seçkilərin necə keçiriləcəyi ilə bağlı fikir ayrılığı var. Bəziləri iddia edirlər ki, nəticəsi ləğv olunan dairələrdəki namizədlər təkrarən həmin dairədən seçkiyə qatıla bilməyəcək, bəziləri isə həmin namizədlərin hamısının iştirakının mümkünlüyünü bildirirlər. Bəs qanunvericiliyin tələbləri bununla bağlı nə deyir?
Seçki Məcəlləsinin tələbinə görə, nəticələri ləğv olunan dairələrin qalib gəlmiş və ya şikayətçi olan namizədləri Mərkəzi Seçki Komissiyasının (MSK) qərarından yenidən şikayət edə bilərlər. Komissiyanın qərarından narazı olan şəxslərin Apellyasiya Məhkəməsinə müraciət etmək hüququ var. Bu məhkəmənin də qərarından razı qalmasalar, Ali Məhkəməyə müraciət göndərilə bilər. Məhkəməyə göndərilən şikayətlərə 3 gün müddətində baxılmalıdır. Təkrar seçkinin nə zaman keçirilməsi haqqında konkret müddət yoxdur. Məsələn, mandat ləğv edilirsə, 1 ay müddətində boş qalan yerə seçki keçirilməsi haqqında qərar qəbul edilir. Amma ləğv olunan nəticələrdən sonra yenidən seçki keçirilməsinin konkret müddəti yoxdur. Milli Məclisə seçkilərin təyin edilməsi ilə bağlı Prezident sərəncam verir. O, nə zaman sərəncam verəcəksə, ona uyğun olaraq, Mərkəzi Seçki Komissiyası seçkiləri təşkil edəcək. Bəzi hüquqşünasların rəyinə görə, nəticələri ləğv edilən dairələrdən qalib gəlmiş namizədlər təkrar seçkilərdə iştirak edə bilərlər. Bu məsələdə heç kimə məhdudiyyət yoxdur. Bunlar bizim araşdırdığımızdır. Bəs nəticələri ləğv edilən dairələrdə seçki prosesləri necə keçiriləcək?
Məhərrəm Zülfüqarlı: “Nəticəsi ləğv olunan dairənin lider namizədi həmin dairədəki təkrar seçkilərdə iştirak edə bilməz”
AVCİYA Seçki Qərargahının rəhbəri Məhərrəm Zülfüqarlı “Bakı-Xəbər”ə açıqlamasında bildirdi ki, Seçki Məcəlləsində bununla bağlı xüsusi müddə var: “Təkrar seçkilərin keçirilməsi ilə bağlı Prezident sərəncam verməlidir. Ancaq burada maraqlı detal var. Nəticəsi ləğv olunan dairənin lider namizədi həmin dairədəki təkrar seçkilərdə iştirak edə bilməz. Bu, birmənalıdır. Ancaq digər namizədlərin iştirakında heç bir problem ola bilməz. Lider namizəd isə digər dairələrdən namizədliyini verib, marafonda iştirakını təmin edə bilər. Bir daha qeyd edirəm ki, təkrar seçkilərin konkret nə zaman keçiriləcəyini Prezident müəyyən edir. Bununla bağlı qanunvericilikdə konkret müddət müəyyənləşməyib”.
Məhəmmədəli QƏRİBLİ
