Erməni mediası iddia edir ki, Qərbin Azərbaycanda keçirilən seçkilərə tənqidi prizmadan yanaşması Qarabağ münaqişəsinin tənzimlənməsi ilə bağlı mövcud status-kvonun dəyişməməsinə səbəb olacaq. Hətta buna görə Azərbaycan Qarabağı birdəfəlik itirə bilər.
Bunu onunla əlaqələndirməyə çalışırlar ki, Avropa İttifaqı, ABŞ, və digər ölkələr, qurumlar Azərbaycanda keçirilən parlament seçkilərini demokratik baxımdan problemli hesab etdilər. Seçkidən əvvəl AŞPA Azərbaycandakı siyasi məhbusların vəziyyəti ilə bağlı qətnamə qəbul etdi. Rusiya ilə Türkiyə Azərbaycanda keçirilən seçkiləri dəstəkləsə də, bu yetərli deyil: “Belə bir vəziyyətdə Qərb Dağlıq Qarabağla bağlı status-kvonu qoruyub saxlamağa çalışacaq. Çünki Böyük Orta Şərqdə mövcud olan situasiyada aşağıdakı geosiyasi sxem mövcuddur: Azərbaycanda avtoritarizm var, Gürcüstan demokratiyaya qayıdır, Ermənistanda tamamlanmış demokratiya mövcuddur. Pompeo Ukraynanın Krımı itirdiyini söylədi. Bildirdi ki, indi Rusiyadan heç bir şey almaq olmaz. Sabah o, Azərbaycanın Ermənistana uduzduğunu da söyləyə bilər. ABŞ reallıqların tanınması siyasətini elan edir. ABŞ Konqresinin hər iki palatası qondarma “soyqırımı” tanıyıb”.
Bütün bunlardan vəcdə gələn ermənilər belə ümidə qapılıblar ki, guya belə vəziyyətdə dünya Qarabağın Ermənistan tərəfindən işğal edilməsi reallığı ilə barışacaq. Mövcud vəzəyyəti dəyişməyə səy göstərməyəcəklər.
Maraqlıdır, bəs ekspertlər erməni tərəfinin bu iddialarını necə dəyərləndirirlər?
“Bəzi dairələrdə seçki nəticələrinin ləğv edilməsi Azərbaycanın Qərb dövlətləri ilə münasibətlərinə...”
Məsələyə münasibət bildirən politoloq Elşən Manafovun sözlərinə görə, bu, ermənilərin arzusudur: “Reallıq isə iddia olunduğu kimi deyil. Əvvəla Türkiyə və Rusiyanın Qarabağ probleminin tənzimlənməsində birmənalı surətdə Azərbaycan dövlətinin mövqeyini dəstəkləməsi sevindirici haldır. Çünki bunlar bölgə dövlətləridir və Azərbaycanın adıçəkilən dövlətlərlə münasibətləri strateji müttəfiqlik, strateji əməkdaşlıq müstəvisində inkişaf etməkdədir. Lakin unutmaq olmaz ki, ATƏT-in Minsk Qrupunda Rusiya ilə yanaşı, ABŞ və Fransa da təmsil olunur. Bu arada Qərb təsisatlarının seçki ilə bağlı tənqidi fikirləri səsləndi. Ancaq bəzi dairələrdə seçki nəticələrinin ləğv edilməsi Azərbaycanın Qərb dövlətləri ilə münasibətlərinə ölkəmizin maraqları baxımından ciddi və müsbət mənada təsir göstərə bilər. Nəzərə almaq lazımdır ki, Azərbaycanın Avropa dövlətləri ilə ikitərəfli münasibətləri inkişaf edir. Azərbaycanın neft və qaz resurslarının əsas alıcısı Avropa dövlətləridir. Ermənilər, zatən, bir sıra məsələləri təhrif edib qərəzli formada təqdim edirlər. Guya Qarabağ Türkiyə və Rusiyanın dəstəyilə Azərbaycana birləşdirilib. Təbii ki, bütün bunlar ağ yalandır. Qarabağ tarixən Azərbaycan ərazisi olub. Düzdür, Rusiya-ABŞ, Türkiyə-ABŞ münasibətlərindəki gərginlik Qarabağ münaqişəsinin həllinə mənfi təsir edir. Belə vəziyyət status-kvonun olduğu kimi saxlanmasına təsir edə bilər. Ancaq bu o anlama gəlmir ki, Qarabağın Ermənistanın nəzarətində qalmasını dünya qəbul edəcək. Biz danışıqları danışıqlar naminə aparmırıq. Münaqişə Azərbaycanın ərazi bütövlüyü çərçivəsində həll edilməlidir”.
Vidadi ORDAHALLI
