“Biz ölkəmizi, sərhədlərimizi qorumalıyıq, informasiya sərhədlərimizi, mənəvi sərhədlərimizi elə möhkəm inşa etməliyik ki, heç bir kənar qüvvə bizim nə milli-mənəvi dəyərlərimizə, nə müstəqilliyimizə, nə də gələcək uğurlu inkişafımıza mane ola bilməsin”.
Bu sözləri Prezident İlham Əliyev Kürdəmirdə “ASAN xidmət” mərkəzinin açılışında deyib.
Dövlət başçısı bildirib ki, bütün bunlarla bərabər, biz qapalı şəraitdə yaşaya bilmərik: “Dünyada, regionumuzda gedən proseslər əlbəttə ki, bizə də təsir göstərir. Əfsuslar olsun ki, bu gün regionumuzda proseslər mənfi istiqamətdə gedir, biz bunu görürük. Yeni münaqişə, yeni qarşıdurma ocaqları, müharibələr, vətəndaş müharibələri – bütün bu mənfi meyllər, o cümlədən, iqtisadi sahədə dünyada yaşanan böhran bizə də təsir göstərə bilər və göstərir. Ona görə biz dünyada gedən prosesləri yaxından izləyərək öz addımlarımızı, o cümlədən, taktiki addımlarımızı buna uyğun atmalıyıq. Nəzərə alsaq ki, ölkə daxilində risqlər yoxdur, - nə siyasi risqlər, nə sosial, nə iqtisadi, nə fiziki risqlər, - bütün mümkün olan problemlər kənardan gələ bilər. Həm ideoloji təxribat, - bu barədə mən artıq öz sözümü dedim, - həm də ki, başqa təxribatlar”.
Prezidentin fikrincə, elə etməliyik ki, bizdən sonra gələn nəsillər, gənclər öz fəaliyyətlərini bu istiqamətdə qursunlar: “Təxribatlara uymasınlar, bəzi beynəlxalq təşkilatların yalan məruzələrinə inanmasınlar. Onların arxasında çox ciddi siyasi maraqlar dayanır”.
Bütün bu deyilənlərin fonunda, informasiya təhlükəsizliyi ilə bağlı məsələlərə ekspertlər necə yanaşırlar?
“Ölkənin informasiya təhlükəsizliyinin qorunmasına səy göstərməliyik”
Məsələyə münasibət bildirən ekspert Rəsul Cahangirlinin sözlərinə görə, Prezident İlham Əliyevin bununla bağlı toxunduğu məqamlar çox vacib əhəmiyyət kəsb edir: “Məsələ ondadır ki, müasir dövr informasiya əsridir. İnformasiyalar dünyadakı proseslərə təsir göstərir. Elə vacib informasiyalar var ki, onları qorumaq lazımdır. Azərbaycanı istəməyən qüvvələr var və onlar ölkənin informasiya təhlükəsizliyinə zərər vurmaq istəyirlər. Bəzən bilmədən gənclər bu qüvvələrin təsiri altına düşürlər. Bütün bunlar onu deməyə əsas verir ki, əsrimiz informasiya əsri olduğuna görə belə məsələlərdə diqqətli olmalıyıq. Ölkənin informasiya təhlükəsizliyinin qorunmasına səy göstərməliyik. Bu işi təkcə dövlətin üzərinə atmaq doğru olmaz. Hamı bu işdə üzərinə düşən vəzifəni yerinə yetirməlidir. Kim informasiya və təhlükəsizlik məsələlərinə xüsusi önəm verirsə, bu məsələdə lazımi tədbirlər görübsə, heç şübhəsiz ki, üstünlük əldə edəcək. Bu baxımdan hesab edirəm ki, ölkə başçısının gənclərlə görüşündə səsləndirdiyi fikirlər xüsusi önəm kəsb edir. İnformasiya təhlükəsizliyi baxımından sərhədlərimizin qorunması vacibdir. Bu həm də milli-mənəvi dəyərlərimizin qorunması deməkdir”.
Vidadi ORDAHALLI
