Rusiya Xarici İşlər Nazirliyinin (XİN) İnformasiya və mətbuat departamentinin RF XİN-in saytında yerləşdirilmiş şərhində yer alan fikirlərdə qurumun adından Azərbaycandakı seçkilərə münasibət bildirilib.
Sitat: “Seçkilərin müvəffəqiyyətlə keçirilməsi münasibətilə azərbaycanlı dostlarımızı təbrik edirik. Bu seçkilər Azərbaycan rəhbərliyinin ölkənin ictimai-siyasi həyatının demokratikləşməsinə və modernləşdirilməsinə yönəldilmiş islahatlarını əhalinin dəstəklədiyini göstərir”.
Şərhdə deyilir ki, fevralın 9-da Azərbaycan Respublikasının Milli Məclisinə növbədənkənar seçkilər keçirilib: “Azərbaycan Mərkəzi Seçki Komissiyasının məlumatına görə, Prezident İlham Əliyevin başçılıq etdiyi hakim Yeni Azərbaycan Partiyası seçkilərdə liderdir. Milli Məclisdəki 125 deputat yeri uğrunda 1314 namizəd mübarizə aparıb ki, bu da əvvəlki seçkilərlə müqayisədə təqribən iki dəfə çoxdur.
Seçkiləri çoxsaylı yerli (77 mindən çox) və xarici (883), o cümlədən, Rusiyadan müşahidəçilər izləyib. Müstəqil Dövlətlər Birliyinin və Şanxay Əməkdaşlıq Təşkilatının üzvü olan ölkələrin müşahidəçilərinin fikrincə, seçkilər milli qanunvericiliyin tələblərinə müvafiq keçirilib, vətəndaşların seçki hüquqlarının kobud şəkildə pozulması faktları müəyyən olunmayıb”.
RF XİN-dən təəssüflə bildiriblər ki, ATƏT-in Demokratik Təsisatlar və İnsan Haqları Bürosundan, ATƏT-in Parlament Assambleyasından, habelə Avropa Şurasının Parlament Assambleyasından olan müşahidəçilər reallığa uyğun olmayan qərəzli və subyektiv yekun rəylər bildiriblər: “Ümid edirik ki, Milli Məclisin deputat korpusunun yeni tərkibi ilə Rusiya Federasiyasının Federal Məclisi arasında sıx və konstruktiv qarşılıqlı fəaliyyət Rusiya ilə Azərbaycan arasında ənənəvi dostluq və strateji tərəfdaşlıq ruhunda davam edəcək”.
Göründüyü kimi, Rusiya XİN öz adından seçkiləri dəyərləndirməklə yanaşı, həm də Avropa strukturlarının səsləndirdikləri bəyanatları pisləyib. Rusiya tərəfdən ortaya qoyulan sərt və korrekt yanaşma növü nəyin təzahürü sayıla bilər?
- Qabil Hüseynli: “Rusiya öz mesajını verir və Azərbaycanı təsir dairəsindən buraxmaq istəmədiyini bəyan etmiş olur”
Politoloq Qabil Hüseynli qəzetimizə bildirdi ki, bu məsələdə Rusiyanın öz maraqları görünür: “Bilir ki, Avropa qurumlarının məsələyə münasibəti heç də yalnız seçkiyə verilən qiymətdən qaynaqlanmır. Bu həm də ölkələrə təzyiq metodu kimi seçilir. Buna görə də Rusiya öz mesajını verir və Azərbaycanı təsir dairəsindən buraxmaq istəmədiyini bəyan etmiş olur”.
- Elşən Həsənov: “Rusiya bunu yaxşı dərk etdiyi üçün, məhz siyasətini yürüdən qurumun adından sözünü deyir”
Azərbaycan Sosialist Partiyasının sədri Elşən Həsənov isə qəzetimizə bildirdi ki, bu məsələdə seçkiyə münasibət bir vasitədir: “Əslində, fövqəlgüclər öz təsir dairələrini müəyyən edirlər. Avropa qurumları öz rəylərində qərəzli yanaşmalar ortaya qoyurlar. Əminəm ki, bütün bunlar Azərbaycan xalqının rifahı üçün edilmir. Öz geopolitik maraqlarını təmin etmək üçün belə mövzulardan istifadə edirlər. Rusiya bunu yaxşı dərk etdiyi üçün, məhz siyasətini yürüdən qurumun adından sözünü deyir. Yoxsa, seçkinin dəyərləndirilməsini Rusiyadan gələn nümayəndə heyəti aparıb və rəyini müsbət verib”.
Məhəmmədəli QƏRİBLİ
