23/02/2020 11:18
728 x 90

Ermənistan ordusunda qeyri-döyüş ölümləri və intiharlar ölkə mediasının bir saylı mövzusu oldu - “məzuniyyətdən qayıtdınsa, nəsə verməlisən”...

img

Cari ilin 1 yanvar tarixindən fevralın 13-dək olan müddətdə Ermənistan ordusunun 10 əsgəri ölüb. Onların hamısı qeyri-döyüş şəraitində həyatını itirib.

Qeyd edək ki, ölüm hallarının 2-si iki gün əvvəl qeydə alınıb. Qondarma “DQR” ərazisində yerləşən hərbi hissələrdən birində 20 yaşlı əsgər Vaqram Avakyanın ölümü Ermənistanda yenidən əsgər ölümləri məsələsini gündəmə gətirib. İstintaq tələm-tələsik belə bir qənaətə gəlib ki, əsgər özünəqəsd nəticəsində ölüb. Lakin əsgərin qohumları müstəntiqlərin bu qənaəti ilə razılaşmayaraq, onu basdırmaqdan imtina ediblər. Bildiriblər ki, əsgərin ölüm səbəbləri müəyyən olunmayana qədər dəfni həyata keçirməyəcəklər. İnsident geniş ictimai rezonans doğurub. Nəticədə təkrar istintaq zamanı Avakyanın əsgər yoldaşları David Movsisyan, Xaçik Qasparyan, Spartak Avetisyan barələrində onu ölüm həddinə çatdırmağa görə təhqiqat başlanıb. Ən qalmaqallı məsələ isə o olub ki, saxlananlardan biri - Movsisyan parlamentin keçmiş deputatı Arakel Movsisyanın oğludur.

Artıq Ermənistan mediasında bu mövzu ən çox müzakirə olunan trendə çevrilib. Bildirilir ki, rüşvət və korrupsiya Ermənistan ordusunun iliyinə işləyib. Hətta vəziyyət o həddə çatıb ki, məzuniyyətdən qayıdan əsgərlər zabitlərə nəsə ödəməyəndə onları ölüm həddinə çatdırırlar. Ermənistan parlamenti guya ordudakı neqativliklərin qarşısını almaq üçün qanun layihəsi hazırlamaq istəyir. Açıq şəkildə bildirirlər ki, kriminal cəmiyyətə və dövlətə müharibə elan edib. Ermənistan ordusunda baş verən qeyri-döyüş itkilərinin artımının səbəbi nə ilə izah edilə bilər?

  • Daşdəmir Əliyev: “Bütün bu faktlar bir daha sübut edir ki, Ermənistanda ordu adında olan, əslində isə tərkibi kriminal elementlərlə dolu bir toplum mövcuddur”

Hərbi ekspert Daşdəmir Əliyev qəzetimizə bildirdi ki, Ermənistan ordusunda baş verən bu cür hallar onların nizami orduya sahib olmamaları ilə bağlıdır: “Erməni ordusu SSRİ dağıldıqdan sonra formalaşa bilməyib. Ermənistan ordusunda "dedovşina” erməni cəmiyyətini münaqişənin güclənməsi ehtimalı baxımından qorxudur. Vaqram Avakyanın faciəsi ölkənin müasir tarixində tək hal deyil. Ötən ilin sonlarında Ermənistanı həqiqi hərbi xidmətdə olan əsgər Artur Adjamyanın ölümü bir-birinə vurdu. Onun qohumları da özünəqəsd faktını qəbul etmədiklərini bildirdilər. 2019-cu ilin noyabrında hərbi hissələrdən birinin silah otağında əsgər Erik Arutunyanın cəsədi aşkarlandı. Əsgərlər arasında qeyri-formal dominantlığa səbəb fiziki qüvvə, mənəvi-iradə keyfiyyətləri və yerliçilik prinsipləri əsas resurslardır. Əsgərlərin valideynləri həll olunmayan münaqişə fonunda onsuz da narahat durumdadırlar. Məhz yerliçilik məsələsi də gərginlik yaradan amillərdəndir. Başqa sözlə, "qarabağlılar”ın "gümrülülərə” və yaxud "yerevanlılara” necə yanaşacaqları bəlli deyil. Ermənistanda hərbçilərə münasibət son vaxtlar xeyli dəyişib. Çünki ordu bu cinayətlərin sayını gizlətməyə çalışır. Dövlət imic itkilərinə yol verməməyə cəhd edir. Bu məsələdə müasir erməni ideologiyasında millitarist ritorika həlledici rol oynayır. Əhaliyə yeritməyə çalışırlar ki, erməni mövqeləri güclüdür. Hakimiyyət orqanları və hüquq-mühafizə orqanları süni şəkildə ölüm hallarını azaltmağa çalışırlar. Yüksək rütbəli erməni məmurlarının övladları işğal altında olan Qarabağda öz əsgər yoldaşlarını terror edirlər. Belə informasiyanı erməni kütləvi informasiya vasitələri mütəmadi yayırlar.

2019-cu ildə Ermənistan ordusunda (işğal edilmiş Qarabağ ərazisində dislokasiya olunan bölmələr də daxil olmaqla - red.) baş verən ölüm hadisələrinə dair Ermənistan Hərbi Prokurorluğundan 49 hal, Müdafiə Nazirliyindən 47 hal barədə məlumat toplanıb. Bu məlumatlara 2019-cu ilin oktyabr-noyabr ayları ərzində işğal altında olan Qarabağ ərazisində dislokasiya olunan bölmələrdə ölən hərbi qulluqçuların sayı daxil edilməyib. 3-cü rəsmi mənbə olaraq Ermənistan İstintaq Komitəsinə gəlincə, bu qurumun məlumatlarına əsasən, 2019-cu ildə Ermənistan ordusunda baş verən ölüm hadisələrinin sayı 28 olub. Maraqlıdır ki, İstintaq Komitəsi tərəfindən digər 2 rəsmi mənbənin qeyd etmədiyi 1 hərbi qulluqçunun adı açıqlanıb. Bütün bu faktlar bir daha sübut edir ki, Ermənistanda ordu adında olan, əslində isə tərkibi kriminal elementlərlə dolu bir toplum mövcuddur. Bu psixoloji vəziyyət oradakı gərginliyi daha da artıracaq”.

Məhəmmədəli QƏRİBLİ

Son xəbərlər