Radikal düşərgə namizədlərinin seçkidə biabırçı nəticələri - hətta bütün dairə üzrə 220 səs alanlar var...
Növbədənkənar parlament seçkisində nəticələri maraqla izlənən dairələrdən biri olan 15 saylı Yasamal 1-ci Seçki Dairəsində əsas mübarizə Azərbaycan Demokrat Partiyasının (ADP) sədri Sərdar Cəlaloğlu, Müsavat Partiyasının başqanı Arif Hacılı və həmin dairəni köhnə parlamentdə təmsil etmiş müstəqil namizəd Ülvi Quliyev arasında gedib.
YAP isə bu dairədən Rauf Nağıyevin namizədliyini irəli sürmüşdü. Lakin lap əvvəldən hakim partiyanın bu namizədinin şansının çox olmadığı məlum idi.
Rəsmi nəticələrə görə, Ü.Quliyev 4071 səs topladığı halda, YAP-ın namizədi 614 səs, Arif Hacılı 291 səs, Sərdar Cəlaloğlu isə cəmi 218 səs yığıb. Bu dairədəki 31 məntəqədən ikisində S.Cəlaloğluya 0 səs, üçündə isə Arif Hacılıya cəmi 2 səs verilib.
Göründüyü kimi, rəsmi nəticələrdə müstəqil namizəd olan Ü.Quliyevin kifayət qədər tanınmış və az-çox təşkilatlanmış partiyaların sədrlərinin hər birindən ayrı-ayrılıqda 20 dəfə artıq səs topladığı göstərilir. Müxalifəti təmsil edən tanınmış partiyaların sədrlərinin topladıqları biabırçı sayda səsin səbəbini nə ilə izah etmək olar?
- Rəfail Becanov: “Bu bir daha göstərdi ki, seçici ilə müxalifətdə olan siyasi partiyalar arasında bir uçurum mövcuddur”
Razi Nurullayevin rəhbərlik etdiyi Azərbaycan Xalq Cəbhəsi Partiyasının funksioneri Rəfail Becanov “Bakı-Xəbər”ə açıqlamasında bildirdi ki, belə bir hal onu da dərindən maraqlandırıb: “Bu məsələni bir qədər fərdiləşdirmək istəməzdim. Başqa müxalifət liderləri də var ki, elə buna bənzər səs toplayıblar. Bu bir daha göstərdi ki, seçici ilə müxalifətdə olan siyasi partiyalar arasında bir uçurum mövcuddur. Söhbət bəzi məntəqələrdə baş verən neqativ hallardan getmir. Problem bundadır ki, həmin partiyaların tərəfdarları seçkiyə gəlib, əsl seçki ajiotajını yarada bilmirlər. Bu da sosial bazaya bağlı olan məsələdir. Sosial bazası tamamilə zəifləmiş radikal müxalifət bunu son nəticələrdə də hiss etmiş oldu. Əhalinin böyük əksəriyyəti dinamikanın, təkamülün tərəfdarı olduğuna görə radikal düşüncəni dəstəkləmir. Biz bunun bir daha şahidi olduq. Müxalifət partiyalarının sədrlərinin olduğu dairələrdə seçki ajiotajı yaranmadı. Bu hal, bütövlükdə, siyasi partiya sisteminə təsir edən məsələdir. Düşünülməlidir ki, hansı siyasi xətlə inkişaf mümkündürsə, o yolla gedilsin. Yoxsa, gələcək nəticələr bundan da pis olacaq”.
Məhəmmədəli QƏRİBLİ
