Prezident İlham Əliyev MDB İcraiyyə Komitəsi müşahidə missiyasının rəhbəri, Rusiya Federasiyası Dövlət Dumasının MDB məsələləri, Avrasiya inteqrasiyası və həmvətənlərlə iş üzrə komitəsinin sədri Leonid Kalaşnikovun başçılıq etdiyi nümayəndə heyətini qəbul edərkən deyib ki, keçirilən növbədənkənar parlament seçkiləri 2018-ci ildə prezident seçkilərindən sonra elan edilən islahatların davamıdır və onlar ardıcıl olaraq həyata keçirilir:
“Hər şey Azərbaycanın dayanıqlı inkişafının təmin olunmasına və demokratik proseslərin genişlənməsinə yönəlmiş ümumi inkişaf strategiyası çərçivəsində gedir. Buna görə də həyata keçirilən struktur islahatları, o cümlədən, kadr islahatları da bir məqsədə xidmət edir: biz yerimizdə saymayaq. Çünki müvəffəqiyyətlərdən arxayınlaşmaq olmaz”.
Ölkə başçısı baş tutan seçkilərə də ətraflı qiymət verib: “Ümumilikdə, 1300-dən çox namizədin olması seçkilərə etimadın göstəricisidir. Bu isə görünməmiş saydır. Əgər onlar seçkilərə inanmasaydılar, öz namizədliklərini verməzdilər və bu qədər vaxt sərf etməzdilər. Mənə həm dünən, həm də bu gün məruzə etdilər ki, proses, ümumilikdə, sakit keçib və heç bir gözlənilməz hal olmayıb. Ona görə də kimsə qalib gəlir, kimsə məğlub olur. Hər kəs reallıqla barışmalıdır. Reallıqlar belədir ki, şərait yaradılıb, maksimum şəffaflıq təmin edilib. Həm də gözlənilməz çətin hava şəraitinə baxmayaraq, Azərbaycan vətəndaşları səs verdilər. Düşünürəm ki, seçki fəallığı da yaxşı olub. Hərçənd başlıca olan bu deyil, əsas odur ki, xalqın seçəcəyi insanlar məsuliyyət hiss etsinlər. Bilsinlər ki, əgər yenə də seçilmək istəyirlərsə, onda dairələrdə iş aparmalıdırlar. Bax, bu, keçmiş parlamentdə çatışmırdı. Buna görə də parlamentin bir çox keçmiş üzvü dairələrdə işləmədikləri üçün seçkilərdə iştirak etmədi. Bu, yeni parlamentin qarşısında duran əsas vəzifələrdən biri olacaq. Çünki bütün ölkənin dayanıqlı inkişafının təmin edilməsi üçün deputat korpusu regionların problemlərini dərk etməlidir, onları üzə çıxarmalıdır və hökumətə, ictimaiyyətə çatdırmaqla onların həllinə kömək etməlidir”.
Göründüyü kimi, ölkə başçısı yeni formalaşacaq parlamentin üzvlərinə əvvəlki sələflərinin buraxdıqları səhvlərə yol verməmələri ilə bağlı çağırış edib. Əsasən də onlara dairələrdəki seçiciləri ilə sıx təmasda olmağı tövsiyə edib. Ölkə başçısının bu fikirlərindən yeni deputatlar hansı nəticəni çıxarmalıdırlar?
Rauf Zeyni: “Bilməlidirlər ki, dairə ilə işləməsələr, bir də seçiciləri 5 il sonra yada salsalar, vəziyyətləri çox acınacaqlı olacaq”
Milli Qeyri-Hökumət Təşkilatları Forumunun rəhbəri Rauf Zeyni “Bakı-Xəbər”ə açıqlamasında bildirdi ki, ölkə başçısının məsləhətindən ciddi nəticə çıxarılmalıdır: “Əslində, buna əməl etmək deputatların borcudur. Ancaq əməl etmədikləri üçün ortaya biabırçı mənzərə çıxmışdı. Biz təbliğat-təşviqat mərhələsində bəzi millət vəkillərinə seçicilərin münasibətini gördük. Orada əsasən “niyə 5 ildə bir dəfə də olsun qapımızı açmayıbsan” iradları söylənirdi. Götürək ki, bunların biri təxribat, digəri öyrədilmiş adamlar idi. Bəs başqaları nə idi? Deməli, iradlarda həqiqət payı da az olmayıb. Prezident də deputatlara çağırış edir ki, seçicilərlə işləsinlər. Bundan yeni formalaşan parlament ciddi nəticələr çıxarmalıdır. Bilməlidirlər ki, dairə ilə işləməsələr, bir də seçiciləri 5 il sonra yada salsalar, vəziyyətləri çox acınacaqlı olacaq. Şükürlər olsun ki, seçkilər çox normal keçdi və baş tutmuş sayılır. Ümidvaram ki, yeni formalaşan parlament öz fəallığı və məsuliyyəti ilə əvvəlkindən fərqlənəcək. Millət vəkilləri elə fəaliyyət göstərməlidirlər ki, ümumən qanunvericilik orqanının nüfuzuna xələl gəlməsin”.
Məhəmmədəli QƏRİBLİ
