Qabil Hüseynli: “60-70 min nəfərin içərisindən çıxan bir-iki adam milyon yarım-üç milyonluq Ermənistan əhalisinə qan uddururdu”
Ermənistanda cərəyan edən hadisələr şərti adı “Qarabağ klanı” olan bir qruplaşmanın hakimiyyətdən salınması ilə nəticələnib. Serj Sarkisyanın baş nazir postundan istefa verməsilə Ermənistanı son 21 ildə nəzarətdə saxlayan “Qarabağ klanı”nın sükutu başladı.
“Qarabağ klanı” hələ 1997-ci ilin martında Ermənistanın bütün güc strukturlarını nəzarətinə keçirib. 1998-ci ilin martında isə onlar bütün Ermənistanda hakimiyyətə gəldilər. Prezidentlər Robert Köçəryan və Serj Sarkisyan bu klanın üzvləri idilər. Məhz "Qarabağ klanı"nın hakimiyyəti dövründə - 1999-cu ilin oktyabrında parlamentdə 8 təcrübəli siyasətçinin ölümü ilə nəticələnən insident baş verdi. Klanın əsas rəqibləri olan spiker Karen Dəmirçyan, baş nazir Vazgen Sarkisyan, vitse-spiker Yuri Baxşyan və Ruben Miroyan, nazir Leonard Petrosyan, deputatlar Armenak Armenakyan, Mikael Kotanyan və Henrix Abramyan öldürüldülər. Həmin hadisədən sonra deyilən klan hakimiyyətdə möhkəmləndi və R.Köçəryanın gəlişindən sonra estafet S.Sarkisyana ötürüldü. Sarkisyanın 2-ci müddətə prezidentliyinin başa çatması ərəfəsindən Konstitusiya dəyişikliyinin gerçəkləşdirilməsi təklif olundu. O, baş nazir kimi 3-cü müddətə ölkə rəhbəri qalmağı planlaşdırırdı. Ancaq S.Sarkisyanın istefası “Qarabağ klanı”nın süqutu anlamına gəldi. Fakitiki olaraq Ermənistanda klanlararası mübarizə gedir. Qarabağ və yerli siyasi klanlar arasında mübarizənin sonunu necə proqnozlaşdırmaq olar?
Politoloq Qabil Hüseynlinin sözlərinə görə, Ermənistandakı mübarizənin kökündə duran amil məhz regional faktordur: “Şərti adı “Qarabağ” olan klan uzun müddətdir Ermənistanı idarə edir. Nəticə göz qabağındadır. Onlar hakimiyyətə də Qarabağ kartı ilə gəliblər. İşğalçılıqla nəticələnən müharibədə onların təmsilçiləri fəal iştirak ediblər. Sonra isə erməni xalqını bu amillə şantaj edərək hakimiyyətdə qalıblar. Onların müharibəyə uyğun şəkildə yürütdüyü siyasət artıq xalqı cana doyurdu və nəticədə “Qarabağ klanı”nın Ermənistandakı hakimiyyətinə son qoyuldu. Klanın yenidən hakimiyyətə gəlməsi çox müşkül görünür. 60-70 min nəfərin içərisindən çıxan bir-iki adam milyon yarım-üç milyonluq Ermənistan əhalisinə qan uddururdu. Həm siyasi, həm də iqtisadi cəhətdən hegemonluq etdilər. Nəhayət “Qarabağ klanı”nın Ermənistandakı hökmranlığına son qoyuldu. İndi isə ermənilər bu klanı yalnız Qarabağda qorumağa çalışacaqlar. Təbii ki, Azərbaycan buna imkan verməyəcək. Qarabağ Azərbaycanın ayrılmaz tərkib hissəsidir. Sarkisyan Konstitusiya dəyişiklikləri zamanı ən azı dörd dəfə bildirdi ki, bununla özünün hakimiyyətdə qalması üçün yol açmır. Siyasətdən uzaqlaşacağını və heç zaman baş nazir olmayacağını bildirdi. Amma, zənnimcə, Rusiyanın təhriki və təminatı ilə baş nazir olmağa qərar verdi. Onun əvvəl verdiyi açıqlamalar erməni xalqını bir qədər rahatlatmışdı. Amma onun yalan satması erməni xalqını ayağa qaldırdı. Xalq Sarkisyanı hakimiyyətdən endirməyə qərar verdi. Ermənistanda bundan sonra hakimiyyətdə təmsil olunacaq şəxs həmin klanın üzvü olmayacaq. Belə olmayacağı təqdirdə xalqın qəzəbini yatırmaq çətin olacaq. Bir necə ildən sonra bəlkə onların yenidən hakimiyyətə gəlməsi mümkün ola bilər. Çünki 20 illik hakimiyyətləri zamanı onlar xalqı razı salan heç bir uğura imza atmadılar. Artıq erməni xalqı işğal olunan torpaqlarla öyünməyi sevmir. O acdır, yemək, yaxşı yaşayış tələb edir. O da bir dalğa idi, xalqın heysiyyəti ilə oynayıb hakimiyyəti əllərində saxlaya bildilər. Amma gördünüz ki, əbədi olmadı”.
Məhəmmədəli QƏRİBLİ
