Ramil Hüseynov: “Bu amil münaqişənin həllini müəyyən qədər sürətləndirə bilər”
Türkiyə dövləti beynəlxalq aləmdə Azərbaycanın fəal tərəfdarı kimi çıxış edərək, Ermənistan-Azərbaycan Dağlıq Qarabağ münaqişəsinin ədalətli həlli üçün Azərbaycanın göstərdiyi bütün səyləri həmişə müdafiə edib. Belə ki, hələ SSRİ-nin mövcud olduğu dövrdə Ermənistanın Azərbaycana qarşı əsassız ərazi iddiaları və hərbi təcavüzünün genişlənməsi zamanı Azərbaycan xalqının haqq səsi məhz Türkiyə vasitəsilə dünyaya çatdırıldı. Bu işdə Türkiyənin rəsmi şəxslərinin mövqeyi, eləcə də mətbuat və kütləvi informasiya vasitələrinin əhəmiyyətli rolu danılmazdır. Sonrakı dövrlərdə də bu dəstək davam edib.
Prezident İlham Əliyevin seçkilərdən sonra ilk səfərini məhz Türkiyəyə etməsi iki ölkə arasında qardaşlığın, dostluğun göstəricisidir. Keçirilən görüşlər zamanı Türkiyə Dağlıq Qarabağla bağlı mövqeyini bir daha ortaya qoydu. Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevlə keçirdiyi birgə mətbuat konfransında bəyan etdi ki, Dağlıq Qarabağ problemini öz problemi kimi bilir və Türkiyə bu məsələdə Azərbaycana dəstəyini bundan sonra da davam etdirəcək: “Biz ortaq mövqeyimizi Qarabağda da, Afrində də nümayiş etdirmişik. Türkiyə ordusunun “Zeytun budağı” əməliyyatı zamanı Azərbaycan dövləti və xalqı bizimlə olub. Biz də Dağlıq Qarabağ problemini öz problemimiz kimi görmüşük, Dağlıq Qarabağ münaqişəsinin ərazi bütövlüyü, beynəlxalq hüquq prinsipləri çərçivəsində həlli vacibdir. Hərbi və müdafiə sahəsində əməkdaşlığı gücləndirmək niyyətindəyik”.
Prezident İlham Əliyev də, öz növbəsində, bəyan edib ki, Dağlıq Qarabağ məsələsinin həllində Türkiyə qədər Azərbaycana dəstək verən ikinci ölkə olmayıb: “Türkiyə hər zaman bizimlə bərabərdir, bütün beynəlxalq təşkilatlarda Azərbaycanın haqlı mövqeyini müdafiə edir. Bu dəstək və həmrəylik bizə əlavə güc verir”.
İki ölkə prezidentlərinin görüşündən ortaya çıxan nəticə odur ki, Türkiyənin Dağlıq Qarabağ məsələsində Azərbaycana güclü dəstəyi davam edəcək. Ümumən, bu məsələdə Türkiyənin Azərbaycana dəstəyinin artması nə kimi əhəmiyyətli faktordur?
Məsələyə münasibət bildirən VİP-in sədr müavini Ramil Hüseynovun sözlərinə görə, Türkiyənin sözügedən məsələdə Azərbaycana dəstəyini artırması çox böyük əhəmiyyətə malikdir: “Əvvəla Türkiyə hər zaman Azərbaycanın yanında olub və Dağlıq Qarabağ münaqişəsinin ədalətli həllində öz dəstəyini əsirgəməyib. Yəni nə mümkündürsə, onu etməyə çalışıb. Doxsanıncı illərdə Türkiyə Azərbaycanda ordu quruculuğuna öz yardımını göstərib. O zaman Ermənistan Rusiyanın köməyi ilə Azərbaycan ərazilərini işğal edəndə Türkiyə buna qarşı müqavimət göstərib. Nəzərə almaq lazımdır ki, 1993-cü ilin aprelində Kəlbəcər işğal olunandan sonra BMT Təhlükəsizlik Şurasında 822 saylı qətnamənin qəbul olunmasında Türkiyə diplomatiyasının da rolu böyük olub. Ermənistanın işğalçılıq siyasətinə cavab olaraq Türkiyə bu ölkə ilə olan sərhədləri bağladı. Düzdür, o zaman Türkiyənin Azərbaycanın yanında olması Ermənistanın işğalçılıq siyasətini tam əngəlləyə bilmədi. Kəlbəcərdən sonra daha bir neçə rayon işğal edildi. Ancaq nəzərə almaq lazımdır ki, indiki Türkiyə 20 il əvvəlki dövrlə müqayisədə qat-qat daha güclüdür. 2009-cu ildə xarici güc mərkəzlərinin, aparıcı dövlətlərin səylərinə baxmayaraq, Türkiyə Ermənistanla sərhədləri açmadı. Müşahidələr göstərir ki, son illər Türkiyənin Dağlıq Qarabağ məsələsində Azərbaycana verdiyi dəstək daha da artır. Hesab edirəm ki, bu çox önəmli amildir. Nəzərə almaq lazımdır ki, Türkiyənin regional gücü get-gedə daha da artır. Bir sıra dövlətlər Türkiyənin mövqeyini nəzərə alırlar. Bu baxımdan, Türkiyənin Azərbaycana verdiyi dəstəyin artması Dağlıq Qarabağ münaqişəsinin həllini müəyyən qədər sürətləndirə bilər. Təbii ki, burda digər faktorları da nəzərə almalıyıq. Hər halda, görünən odur ki, Türkiyə bu məsələdə nə mümkündürsə, onu edir”.
Vidadi ORDAHALLI
