“Mən belə bir Avropa Şurasında olmaq istəmirəm…”
Azərbaycanı utandırmaq üçün istənilən cəhdin özü elə korrupsiyadır. “Trend”in məlumatına görə, bunu Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Avropa Şurası Parlament Assambleyasının yaz sessiyasında çıxışı zamanı deyib.
S.Seyidov Azərbaycandan olduğu üçün fəxr etdiyini qeyd edib: “Fikrimcə, vurğulamaq vacibdir ki, ölkəmi utandırmaq üçün edilən hər bir cəhd, ölkəmi günahlandırmağın özü elə korrupsiyadır. Çünki Azərbaycan bu təşkilata demokratik dəyərlər naminə daxil olub. Əgər siz korrupsiya axtarırsınızsa, o zaman digər ölkələr haqqında, bu assambleyada iclas edənlər haqqında da düşünmək lazımdır. Niyə yalnız Azərbaycan? Axı bir ay bundan əvvəl bu iclas zalında siz Ermənistan xalqı tərəfindən korrupsiyaya görə qovulan Serj Sarkisyanı alqışlayırdınız. Ermənistanın çox demokratik ölkə olduğunu, Sarkisyanın isə Ermənistan xalqını bu təşkilatda təmsil edən demokrat olduğunu təsdiq edənlərdən soruşmaq istəyirəm - cənab Sarkisyan haradadır? Niyə siz özünüzə bu sualları vermək istəmirsiniz?"
O, Azərbaycanın müharibə şəraitində olduğunu xatırladıb: "Biz ərazilərimizi itirmişik. Bizim bir milyondan çox qaçqın və məcburi köçkünümüz var. Biz bura, bu təşkilata ona görə gəlmişik ki, burada hüququn aliliyini tapaq. Lakin bunun əvəzinə yeni terminologiya görürük. Mənim adımı da korrupsiyada hallandırırlar. Mənim adım araşdırma oqranının məruzəsində də keçir, orada bildirilir ki, Seyidovun korrupsiyaya aidiyyəti yoxdur. Mənim adımın həmin sənəddə çəkilməsini dünyaya izah etmək çox çətindir. Bu böyük ədalətsizlikdir".
S.Seyidov Azərbaycanın öz ləyaqəti uğrunda mübarizə aparacağını və qalib gələcəyini deyib: "Çünki biz azadlıq, demokratiya haqqında, Avropa Şurasına deyil, bütün dünyaya aid olan dəyərlər haqqında düşünürük. Mən 18 il əvvəl Avropa Şurasına gələndə lap əvvəldən demişdim ki, bu mənim Şuramdır. Amma indi düşünürəm ki, yox, bu sizin Şuranızdır. Mən belə bir Avropa Şurasında olmaq istəmirəm".
Qeyd edək ki, aprelin 23-də Strasburqda Avropa Şurası Parlament Assambleyasının (AŞ PA) yaz sessiyası başlayıb.
Milli Məclisin Beynəlxalq münasibətlər və parlamentlərarası əlaqələr komitəsinin sədri, AŞ PA-dakı daimi nümayəndə heyətinin rəhbəri Səməd Seyidov və bir qrup deputat sessiyada iştirak edir.
AŞ ayrı-ayrı ölkələrin təcrid olunması siyasəti aparır
Avropa Şurası Parlament Assambleyasının (AŞ PA) bəzi üzvləri korrupsiya tədqiqatı üzrə orqanın hesabatından sui-istifadə edir. Bunu isə AŞ PA-nın yaz sessiyasında Milli Məclisin deputatı Ülviyyə Ağayeva deyib.
Ü.Ağayeva qeyd edib ki, bu məruzənin əsas hədəfi korrupsiya problemini həll etmək cəhdi yox, assambleyanın bəzi üzv ölkələrini qaralamaqdır: “Söhbət "yeni demokratiya" adlandırılan ölkələrdən gedir. Bizim ölkəmiz mürəkkəb siyasi proseslərin baş verdiyi regionda yerləşir. Bütün çətinliklər və risklərə baxmayaraq, biz demokratik dəyərləri müdafiə edirik və təkcə öz maraqlarımız yox, həm də tərəfdaşlarımızın maraqları çərçivəsində işləyirik”.
Deputat həmçinin xatırladıb ki, sanksiyaların tətbiqi səmərəli deyil, çünki təşkilatın hədəflərinə çatmasına kömək etməyəcək: “Biz çalışmalıyıq ki, Avropa Şurasının üzv ölkələri bir-biri ilə daha sıx əməkdaşlıq etsin, ayrı-ayrı ölkələrin təcrid olunması siyasətini həyata keçirməsin”.
AŞ PA-da anti-Azərbaycan qrupların yalan informasiya ilə ölkənin imicini ləkələmək cəhdləri…
Bu gün korrupsiya məsələsi müstəqil şəxslərə və ölkələrə zərər vurmaq üçün siyasi silaha çevrilib. Bunu isə Azərbaycan Milli Məclisinin deputatı Elşad Həsənov Strasburqda Avropa Şurası Parlament Assambleyasının (AŞ PA) yaz sessiyasında deyib.
O, sessiya iştirakçılarını qərəzsiz fəaliyyət göstərməyə, hər hansı iddialara deyil, konkret faktlara üstünlük verməyə çağırıb.
PA-da korrupsiya məlumatlarını araşdırma üzrə müstəqil orqanın qərəzli məruzəsini şərh edən E.Həsənov məruzənin şayiələrə əsaslandığı qənaətinə gəldiyini bildirib: "Hesab edirəm ki, belə sənədlər aydın və dəqiq faktlara əsaslanmalıdır. Mən "orqan yoluna qoya bilməz", "hədiyyə sistematik xarakter daşıyır", "bir çox ölkələr üçün xarakterik", "ola bilsin ki", "ehtimal ki" kimi ifadələr eşidirəm. Sual yaranır: ölkəni belə qeyri-dəqiq və qeyri-müəyyən ifadələrlə necə günahlandırmaq olar? Konkret faktlar olmadan kimisə necə ittiham edə bilərik?"
O qeyd edib ki, araşdırmanın müəllifləri öz iddialarına hər hansı sənədlərə əsaslanmış təsdiq ala bilmədiklərini deyirlər: "Məruzədə mütəşəkkil cinayətkarlıq və korrupsiya adlı qondarma layihədən bəhs olunur. Bu layihə çərçivəsində yayılmış informasiyanı əsassız və qeyri-obyektiv hesab edirəm. Anti-Azərbaycan qruplar bu yalan informasiya ilə Azərbaycanın imicini və ölkəmizlə dostluq münasibətlərini saxlayan siyasətçiləri, ictimai xadimləri və jurnalistləri ləkələməyə cəhd edirlər".
Deputat bir daha təsdiq edib ki, söhbət ölkənin nüfuzuna və onu dəstəkləyənlərə zərbə vurmağa istiqamətlənmiş açıq-aşkar anti-Azərbaycan kampaniyasından gedir: "Azad sözdən sui-istifadə edən bir sıra şəxslər və qruplar bizə qarşı biabırçı kampaniya təşkil edib".
AŞ PA-nı demokratiya və ədalət yox, kim idarə edir?
Avropa Şurası Parlament Assambleyasındakı (AŞPA) korrupsiya məsələsinə dair son hadisələr göstərir ki, artıq bu təşkilatı azadlıq, demokratiya və ədalət idarə etmir. Azərbaycanın AŞPA-da nümayəndə heyətinin üzvü Sevinc Fətəliyeva belə deyib.
S.Fətəliyeva bildirib: "AŞPA sessiyasından sessiyasına istər-istəməz məndə belə bir sual yaranır ki, biz hara gedirik? AŞPA bu cür davranışları, manipulyasiyaları, bəzi şeylərin şişirdilməsi, digərlərinə isə göz yumulması ilə hara gedir? Zaman keçdikcə təşkilatın fəaliyyətində vaxtilə əsaslandığı qaydalar və prinsiplərə əməl olunmur. Korrupsiya məsələsinə dair son hadisələr azadlıq, demokratiya və ədalətin artıq bu təşkilatı idarə etmədiyinin bariz nümunəsidir. Bizim AŞPA-dakı işimiz və fəaliyyətimiz şayiələrə deyil, hər zaman gerçək faktlara əsaslanıb, hər hansı sənədin və ya hesabatın əvvəlində bəyan etdiyimizi onun sonunda heç zaman inkar etməmişik".
Millət vəkili deyib ki, sözügedən hesabatda məntiq və ciddi yanaşmanın olmaması belə bir təsəvvür yaradır ki, Azərbaycana qara yaxmaq, onu bu təşkilatın gerçək gündəmindən kənarda qoymaq məqsədi güdülür: "Bilmək istəyirəm ki, bu cəhdlər nəyə yönəlib? - Azərbaycanı öz demokratiya yolundan döndərməyə? - Azərbaycanın radikallaşmasını istəyirsiz? - Dəyərlərimizi dəyişdirməyə? Cavab olaraq isə “yox” deyirik! Sizi əmin edirəm ki, bu, heç zaman baş verməyəcək. Bütün cəhdləriniz əbəsdir. Azərbaycan heç zaman öz demokratiya yolundan dönməyəcək! Bütün bu hiyləgər oyunlara, təzyiq və ədalətsizliyə baxmayaraq, biz demokratiya dəyərlərinə və AŞPA-nın imicinin sürətlə dəyişməsinə baxmayaraq, bu təşkilata sadiqliyimizi qoruyub saxlayacağıq. Biz müzakirə olunan hesabat ideyasına və bu təşəbbüsə açığıq, çünki korrupsiya şərdir. Lakin bu hesabatın hazırlanma tərzi qəbuledilməzdir!"
Deputat hesab edir ki, hesabat real faktlara əsaslanmır: "Əgər bir nəfər başqasını ittiham edirsə, mütləq faktlar və dəlillər göstərməlidir. Bu gün mən təkcə öz adımdan deyil, illərdir səsini dinləmək istəmədiyiniz bütün Azərbaycan xalqının adından danışıram. Sizlər bu illər boyunca bizim səsimizə kar olmusunuz. Biz torpaqlarımızın digər AŞPA üzvü olan Ermənistan tərəfindən işğal edildiyini deyirik, bizi eşitmirsiniz. Bu səs ədalətin və haqqın səsidir. Əgər həqiqət əvəzinə siz yalnız istədiyinizi eşitmək istəyirsinizsə, o zaman bu təşkilatda ədalət və şəffaflıq böyük sual altındadır və AŞPA-nın imicinə və etibarlılığına ciddi zərbə vurur".
Leyla və Arif Yunusla, Xədicə İsmayılla işləyən Stefan Şennakın da adı korrupsiyaya dair hesabatda...
“Mən bu hesabata ona görə daxil edilmişəm ki, insan haqları müdafiəçiləri, QHT, məhbuslar və onların ailələri ilə görüşmüşəm?” APA-nın məlumatına görə, bu sözləri Avropa Şurası Parlament Assambleyasının (AŞPA) yaz sessiyasının iclasında avstriyalı parlamentar, AŞPA Monitorinq Komitəsinin Azərbaycan üzrə həmməruzəçi Stefan Şennak Müstəqil Araşdırma Qurumunun korrupsiyaya dair hesabatı barədə müzakirələrdə çıxışında deyib.
S.Şennak bildirib ki, bu hesabat onun obyektivlik və professionallığını şübhə altına alır: “Hamı bilir ki, məsuliyyətlərimə necə ölçülü yanaşıram. Mən bir kabus yaşadım. Adım korrupsiyaya dair hesabata daxil edilib. Biz hüququn aliliyi və insan haqları sahəsində problemlərin olduğu ölkələrlə işləyirik. Belə ölkələrlə işləyəndə ehtiyatlı olmaq lazımdır. Mən Arif, Leyla Yunus, Xədicə İsmayıl kimi ekspertlərlə işləmişəm. Hesabatda adımı görəndə dəhşətə gəlirəm. Ola bilər ki, ilkin mətn yayımlanmazdan öncə daha bir araşdırma aparmaq lazım idi. Mən öz şərəfimi qorumaq və nüfuzumu geri qaytarmaq məcburiyyətində qalıram”.
REDAKSİYADAN: Həqiqətən düşündürücüdür ki, qatı müxalif düşüncəli insanlarla işləmiş Şennakın adı korrupsiya siyahısına niyə və necə düşüb. Şennak Leyla Yunusdan, Xədicə İsmayıldanmı rüşvət alıb? Məntiqli suallar AŞ PA-nın Müstəqil Araşdırma Qurumunun Azərbaycanla bağlı korrupsiya hesabatının şübhəli və qərəzli olduğu barədə qənaətimizi bir daha gücləndirir.
Baki-xeber.com
