Vüqar Qədirov: "Azərbaycanın bu istiqamətdə atdığı addımlar əvəzsizdir"
Məlum olduğu kimi, Səudiyyə Ərəbistanı Krallığının paytaxtı Ər-Riyad şəhərində keçirilən Ərəb-İslam-Amerika Sammitinə Azərbaycan Prezidenti İlham Əliyev də qatılıb. Ərəb və İslam ölkələri rəhbərlərinin, həmçinin, ABŞ prezidenti Donald Trampın iştirak etdikləri sammit "Birlikdə güclüyük" devizi altında təşkil olunub.
İlk dəfədir keçirilən bu tədbirdə iştirakçı ölkələrin qlobal təhlükəsizliyin, sabitliyin təmin edilməsində, zorakılıq, terrorizm və ekstremizmlə mübarizədə rolu və bu sahədə mövcud əməkdaşlığın daha da dərinləşdirilməsi barədə müzakirələr aparılıb. Sammit iştirakçı ölkələr arasında işgüzar, mədəni və siyasi əlaqələrin tolerantlıq və əməkdaşlığa müştərək inam vasitəsilə daha da gücləndirilməsinə xidmət edir. Tədbirin məqsədlərindən biri də ölkələr arasındakı münasibətlərdə yeni başlanğıcın və hamı üçün daha parlaq gələcəyin təməlinin qoyulmasıdır.
Xatırladaq ki, Azərbaycan bir ölkə kimi Səudiyyə Ərəbistanında keçirilən tədbirin mahiyyətinə uyğun olan çoxlu sayda mühüm addımlar atıb. Buna misal kimi, Azərbaycanın ev sahibliyi etdiyi, tolerantlıq və islam həmrəyliyi mövzusunda tədbirləri göstərə bilərik. Həmçinin, Azərbaycan BMT Təhlükəsizlik Şurasına qeyri-daimi üzvlük dönəmində BMT rəhbərliyilə İslam Əməkdaşlığı Təşkilatının rəhbərliyi arasında görüşün təşkili ideyasını irəli sürdü və həmin təmasın baş tutmasına nail oldu. Qeyd edək ki, terrorizmə qarşı beynəlxalq konfransın keçirilməsi təklifi də Azərbaycanın BMT-də mühüm missiyasını həyata keçirən dönəmdə olub.
Azərbaycanın gördüyü işlər Səudiyyə Ərəbistanında keçirilən tədbirin mahiyyətinin və formatının müəyyənləşməsində nə kimi rola malikdir?
Ekspert Vüqar Qədirovun sözlərinə görə, təbii ki, bu cür tədbirlərin ərsəyə gəlməsində ölkəmizin də böyük əməyi, payı var: "ABŞ prezidentinin ilk səfərini müsəlman ölkəsinə etməsi və orada müsəlman ölkə liderlərilə bir araya gəlməsi yeni yanaşmanın ortaya qoyulmasından xəbər verir. Edilən çıxışlardan da görünür ki, dünyanın inkişafını müsəlman aləmindən xaric təsəvvür etmək olmaz. Dünya liderləri artıq anlayır ki, islamla terrorizm fərqli-fərqli məfhumlardır. Bunun üçün islam və başqa dinlər arasında tolerant münasibəti aşılamaq lazımdır. Tam məsuliyyətilə deyə bilərik ki, Azərbaycanın bu istiqamətdə atdığı addımlar əvəzsizdir. Sivilizasiyaların yaxınlaşdırılması, multikultural dəyərlərin təbliği istiqamətində Azərbaycan əvəzsiz səylər göstərib. Son illər ərzində ölkəmizdə keçirilən beynəlxalq tədbirlərin mahiyyətinə baxdıqda məlum olar ki, biz, bir ölkə olaraq, həm də bəşəriyyətin problemlərinin həllilə dərindən maraqlanmışıq. Artıq bu işlər də öz bəhrəsini verir. Azərbaycan BMT TŞ-yə qeyri-daimi üzv olanda belə bu istiqamətdə fəaliyyətini davam etdirib. Səudiyyədə keçirilən tədbirin də mahiyyəti sərf ölkəmizin göstərdiyi fəaliyyətə uyğundur. Azərbaycan bu siyəsəti öz daxilində də həyata keçirir. Demək olar ki, bu istiqamət dövlət siyasətinin prioritetidir. Ölkəmizdə "Multikulturalizm", "İslam Həmrəyliyi İli"nin dövlət səviyyəsində qeyd edilməsi də buna bariz misaldır".
Məhəmmədəli QƏRİBLİ